Salta al contenuto principale
Serie A
Gravina: «Seus un'ispera po totu s'Italia»

Is giogus torrant a partiri su doxi cun sa Coppa Italia, po su campionau su Casteddu in campu su binti de su mesi de Làmpadas

Seus intraus, giai de tres diis, a nai sa beridadi, in su Mesi de Làmpadas, e is novas de importu mannu no mancant de siguru: totus funt abetendi chi sa Sèrie A torrit a partiri, e iat a essi ora puru, nc'aciùngeus nosus, a prus de noranta diis de s'urtimu partida.
Imoi, po su prexiu de totus is tifosus, teneus puru i datas cun totu su programma de is partidas chi nci funt de giogai ancora, cosa chi ballit puru po sa Coppa Italia: seus chistionendi de calincuna cosa cumenti a centu e binticuatru garas, cumentzendi de is cuattru chi ant a balli po is recuperus de sa de binticincu giorronada: su sàbudu, su binti de su mesi de Làmpadas, at a tocai a Torino e Parma, si partit a is seti e mesu de merì.
Apustis at a arribai s'ora de su Casteddu e de s'allenadori nou Walter Zenga, cun is arrubius-brau chi a is dexi mancu cuartu de su noti ant a batallai in domu de cussus de su Verona po cicai de ndi ingolli is tres puntus.

Sa dii avatu, seus chistionendi de su dominigu, su bintunu de su mesi de Làmpadas, at a tocai a Atalanta e Sassuolo e, agoa, a Inter e Sampdòria.
De su lunis, su bintiduus, su campionau at a sighiri cun sa de bintises giorronada.

Custu po su chi pertocat su campionau de is professionistas mannus de sa Sèrie A, ma is giogus ant a torrai a partiri giai de sa cida innantis: difatis su cenàbara de su doxi de su mesi de Làmpadas nc'at at a essi de giogai sa partida de sa torrada de sa semi-finali po sa Coppa Italia, dd'eus giai arremonada, tra sa Juvèntus e su Milan e cussa tra su Nàpoli e s'Inter, sa dii avatu. Chini bincit s'at atobiai su mercuis de sa cida avatu, est a nai su dexiaseti, po s'ùrtima partida, in Roma.

Si cumprendit beni, est craru, totu s'afrodhiu de su presidenti de sa Figc, Gabriele Gravina, chi at scoviau in d-una ciaciarrada: «Apu biviu una batalla tra mei e mei atotu — contat Gravina — candu su virus si nc'at potau a timi diaderus chi totu su mundu de sa bòcia si ndi potessit sciusciai de unu momentu a s'atru. Custu giogu torrat a partiri poita est un'ispera po totu s'Italia, eus a circai de arregodai, in su coru, totus cussus chi no nci funt prus e is chi funt prangendi e sunfrendi ancora po is mortus».

In questo articolo
Campionato:
Argomenti:
Stagione:
2019/2020
Tags:
Serie A