Mercuis arricu de novas po is scuadras sardas: is de sa Sèrie D ant a connosci is listas; ses scuadras in campu po sa Copa Italia

Est unu mèrcuis arricu meda, cumenti no ndi bivestus de tempus, po su mundu de sa bòcia de is diletantis sardus.
Po incumentzai, custu mericeddu, a partiri de is duas, nc'ant a essi novas de importu po su chi pertocat is giogus de sa Sèrie D e, duncas, po is centu e sessanta ses scuadras chi ant a curri me is campionaus: is de sa LND funt trabballendi po cuncodrai is listas, est a nai cussus chi in italianu tzerriaus "gironi".
Apustis at a essi su tempus puru po su calendariu de totus is partidas, chi at a bessì tra crasi e sabudu, su dexianoi de su mesi de Cabudanni.
Is ses assotzius sardus, seus chistionendi de is de s'Alzachena, de su Crabònia, de su Lanusè, de su Latte Dolce de Tàttari, de su Murera e de is de sa Torres, abetant de connosci is nomis de is atras scuadras chi, fortzis, (chi is cosas abarrant agualis a is atrus annus passaus) nd'ant a lompi de su Làzio e de sa Campània.

In s'interis, a partiri de is cuatru de merì, nc'ant a essi torra tres partidas de sa Coppa Italia de Promozione: is primus a ndi cabai in campu funt cussus de su Istintinu, chi si dha depint gherrai contras a is de su Valledoria, po cussu chi in italianu tzerriaus "triangolare". Oi tocat a is de su Poltu Turre, invècias, abarrai a castiai, apustis de sa bìncida, po duus a unu, boddita de is arrubius-brau in domu pròpriu de su Valledoria, in sa primu partida giogada sabudu passau.
A is ses e mesu, duncas, at a tocai a is de Arroli, chi arricint a su "Campo Comunale" de sa bidha is de su Seulu, chi domìnigu passau ant serrau sa partida contras a s'Andromeda de Sriugus Donigalla cun su resultau de tres a tres; is grogus-nieddus si podint arreposai, pentzendi giai a sa prossima gara chi s'at a giogai domìnigu chi benit, su binti de su mesi de Cabudanni.
A is ses e mesu at a tocai puru a is de su Tiesi, chi andant a si dha giogai a Bonorva, in su campu comunali "Cicchito Chessa", po sa primu partida uficiali de s'annu.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020