Salta al contenuto principale
Carbonia

Serie D: su Lanusei pigat a bussinadas is de sa Nuova Florida, su Cràbonia si ndi pigat is tres puntus me is ùrtimus minutus contras a su Latte Dolce

Funt passadas giai ses diis de s'ùrtima giorronada de su campioau, sa de noi, po su chi pertocat is scuadras sardas de sa Sèrie D, chi funt totus cabadas in campu su binti-tres de su mesi de Idas, francu is de s'Altzaghena, chi depiant giogai contras a is de su Latina, ma sa partida est sartada po crupa de su Covid.
Cun is festas po Paschixedha chi funt giai scarescias, abarrat allutu, peròu, s'afrodhiu de is giogadoris, de is allenadoris e de is tifosus, cun is giogus chi ant a torrai a partiri su ses de Gennargiu de s'annu nou, est a nai su duamilla-e bintunu, e totus isperaus chi potzat essi prus bonu de su duamilla e binti, no feti po su mundu de sa bòcia ma puru, est craru, po totus is atras fainas e atividadis.

Andaus intzandus a castiai, impari, is ùrtimus resultaus, partendi de sa bìncida de importu mannu meda de is de su Lanusè ca, in domu cosa insoru, ant fatu cincu gol a is strangius de
sa Nuova Florida: su primu gol nd'arribat a su de binti-duus minutu, cun Callegari chi arrannescit a donai una carvada de pei a sa bòcia, scuta in mesu a s'area de rigori de Arvia, in mesu a una truma manna de aversarius. Apustis de cincu minutus, nd'arribat su secundu gol, fatu de Attili; su Lanusè sighit a curri e a giogai beni meda e arranescit a stampai sa porta de is strangius torra cun Attili, cun Bonu e cun Floris, cun d'unu tiru de is undixi metrus.

Sa partida de importu prus mannu de sa giorronada, a su mancu po is scuadras sardas, fiat cussa tra is de su Cràbonia e is tataresus de su Latte Dolce: a sa fini de is giogus e de is noranta minutus, faint festa is de domu, chi funt arrannescius a binci po tres a duus, pròpriu me is ùrtimus minutus, gràtzias a su gol fatu de Odianose, chi est arrannesciu a si procurai unu tiru de is undixi metrus e cravat sa bòcia a is pabas de su portieri de is tataresus, Urbietis. Is atrus gol de is de su Cràbonia funt stetiu fatus de Cestaro, a su de trinta-tres minutu de su primu tempus, e de Cappai, a su primu minutu de giogu in su segundu tempus. Su Latte Dolce, invecias, at fatu duus gol cun Roberti, su primu chi est balliu po su zero a unu , e su secundu chi est balliu po su duus a duus.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Campionato:
Argomenti:
Stagione:
2020/2021
Tags:
Serie D