Salta al contenuto principale
sibilia lnd
«Chenza de is aspetadoris in campu amancat sa mellus parti de sa cosa»

Sibilia castiat ainnantis: «Sa LND nc'at sèmpiri cretiu: fai partiri torra is campionaus de is professionistas est stetia sa bìncida prus manna»

Su duamilla e binti no est stetiu de sicuru un annu santzeru, no feti po su mundu de sa bòcia, est craru, cun cussu tiau de virus chi at frimau totus is fainas, incumentzendi de cussas chi pertocant is trabballus de sa genti, fintzas a nd'arribai a cussas chi pertocant is spassius.
Imoi dhu podeus tzerriai a forti: su chi eus biviu in totu custus mesis, est a nai su mabi chi eus cumbatiu totus impari, est stetiu unu de is dannus prus mannus de is ùrtimus cincuanta annus, ma a cantu parit, po fortuna, is cosas funt torrendi a s'aderetzai: is scuadras de is diletantis, po nd'arremonai una, funt giai murighendi po ndi pesai is rosas po s'annu chi benit; is de sa Sèrie A e de sa Sèrie B, invècias, cumenti scieus beni, funt torradas in campu po serrai totus is giogus, mancai chenza aspetadoris, una chistioni de importu mannu, no feti po su chi pertocat su dinai e s'economia, est a nai s'arrichesa, de is associatzionis.

Cosimo Sibilia, su presidenti de sa Lega Natzionali Diletantis, sciri beni meda chi su benidori at a essi ancora acapiau a is numerus e a is nobas chi ant arribai apitzus de su Covid: difati nc'est calincunu chi timit giai chi in atonzu ant a torrai is daboris, ma po imoi est mellus a no nci pentzai.

«Tra su mesi de Cabudanni e cussu de Ladàmini — at scoviau Sibilia me is diis passadas —, sèmpiri chi su Covid no si ndi sciusciat is cosas, eus a torrai a essi is atoris principalis po su chi pertocat su sport e su fùbbalu».

Sa LND at giogau una de is partidas de importu prus mannu in totu sa storia cosa sua. «Nosu ci seus sèmpiri stetius, puru candu is cosas pariant marigosas meda e pariàt chi no nci fiat nudda de bonu po su bendori». Agoa aciungit: «Su trabballu chi eus fatu est stetiu mannu: seus arrannescius a fai partiri torra su mundu de sa Sèrie A e de sa Sèrie B, impari a is play-off de sa Lega Pro. Nisciunu crediat chi si podessint acabai, in campu, is campionaus de is professionistas, ma nc'est de arregodai chi est unu ispetàculu a metadi, poita chenza de sa genti chi fait su tifu, amancat sa mellus parti de sa cosa».

In questo articolo
Campionato:
Argomenti:
Stagione:
2020/2021
Tags:
Coronavirus