Salta al contenuto principale
idolo lorenzo cocco

S'Idolo abetat s'Arborea, Cocco: «No podeus prus fai arregalus a is atras scuadras»

S'Idolo bolit torrai a binci, e de pressi puru, a pustis de s'ùrtimu bessida de su sexi de su mesi de friàrgiu, candu est arribada sa de tres pèrdida, in sa batalla contras a is biancus-birdis de su Sant'Aleni de Cuartu, chi si ndi funt pigaus is tres puntus gratzias a su tres a unu cuncodrau de Mura, Mboup e Caddeo. Is ogliastrinos non perdiant de su cincu de gennàrgiu, cun s'unu a zero pesau a su “Comunale La Pineta Sturrusè", in Arthana, de su Buddusò, cun cincu bìncidas de sighiu me is primus cincu partidas, in sa torrada de su campionau: seus chistionendi de su tres a duus scutu in facci a cussus de su Tonara, su cincu a unu cabau in sa partida contras a su Seùlu, su duus a unu, in domu, ghetau contras a sa Monteponi de Bidda de Cresia e is duas bìncidas po unu a zeru, unu de fatu a s'atru, contra a is casteddaius de sa Sigma de Amicis e contra a su Tortolì, in su derby. Po imoi peròu Lorenzo Cocco e is cumpàngius tenint otu puntus in prus de su Sant'Aleni, noi in prus de cussus de su Biddaxidru e dexi in prus pròpriu de su Buddusò, ma no podint prus arrui chi no bolint sciusciai totu cussu de bonu chi nd'anti pesau fintzas a oi.
«Nosu depeus feti sighiri a traballai cumenti eus fatu fintzas a imoi — contat Lorenzo Cocco —, chentza si fai pigai de is timorias e de is penzamentus. Sa lista nemancu dda castiaus, no serbit a nudda, tanti: nosu scieus chi si tocat a binci, dònnia domìnigu in dònnia campu; no podeus prus fai arregalus a is atras scuadras».
Po sa primu bessida de su mesi de martzu, s'Idolo s'at agatai ananti is grogus-bleu de s'Arborea, chi ndi lompint a pustis de su unu a zero ghetau in sa bìncida contas a su Biddaxidru.
«Is partidas funt totus traballosas: depeus arrannesci  a ndi bogai totu cussu chi teneus aintru a su coru, assinuncas is cosas si faint marigosas meda. Si serbint is tres puntus po torrai a curri, nc'est diaderus pagu de aciungi».

Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Squadre:
Giocatori:
Campionato:
Argomenti:
Stagione:
2019/2020
Tags:
Promozione
Girone A