S'Olbia sighit cun is allenamentus: contras a su Giana Erminio is biancus si giogant sa Sèrie C; po is de sa Sèrie D iat a podi essi un'istadi callenti

Chi sa Sèrie A est torrada a partiri, pròpriu sa cida passada, cun is partidas de sa Coppa Italia, cumenti totus bisamus, a pustis de prus de noranta diis de contantena e "lockdown", imoi tocat puru a sa Sèrie B torrai a allui is luxis me is campus: sa die bona iat a depi essi cussa de crasi, su dexiaseti de su mesi de Làmpadas, cun sa batalla tra is de s'Ascoli contras a is de sa Cremonese. Prusaprestu, me is ùrtimas oras nd'est aproillada aforas una nova chi, mancai, no at a fai prexei a is sportivus: unu giogadori de su Venèzia, difatis, est stetiu agatau cun su virus in corpus, apustis de unu esami fatu cenabara passau, su doxi de su mesi de Làmpadas. Totu sa scuadra, duncas, cumenti narant is règulas, est brintada in cussa chi tzerriant "corantena fiduciaria": nudda de fai po is allenamentus, imoi no si podit fai atru chi abetai po ndi cumprendi calincuna cosa in prus. Sa partida de sabudu chi benit, est a nai su binti, tra is de su Venèzia e is de su Pordenone, iat a podi sartai.

In Sèrie C, invècias, at a tocai a s'Olbia, nd'eus giai chistionau, ndi cabai in campu, me is ùrtimus diis de su mesi, po onorai is caboris de sa Sardìnnia: is blancus si dh'ant a depi biri contras a is de sa Giana Erminio, chi funt traballendi totus impari, e po imoi chenza nisciunu problema, est a nai chentza apuntoraus a pustis de is primus duus girus de esamis fatus, de mercuis passau. Is biancus allenaus de mister Oscar Brevi, invècias, ant torrau a incumentzai sa dii ainnantis, su martis, e sabudu ant giogau una partida tra issus a totu, po sighiri cun su preparamentu. In Sèrie D, invecias, is cosas sighint a essi traballosas meda: sa truma de scuadras chi nd'iant a depi cabai in Eccellenza, apustis de is decisionis pigadas de is de sa FIGC, promitint giai de sighiri sa batalla me is aulas de is  tribbunalis. Po custu motivu puru, tra is atrus, sa stagioni de is semi-professionistas iat a podi incumentzai prus tradu de is atrus annus, est a nai de su binti de su mesi de Cabudanni.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020