Salta al contenuto principale
nuorese esultanza

Su campionau de s'Eccellenza sighit a andai ainnàntis: is de su Castiadas bìncint contras a is de su Budune; Matteo Lecca arregalat is tres puntus a is de sa Ferrini

Su campionau de is de s'Eccellenza sighit a andai ainnàntis, mancai nci siant ancora strobus e trumentus marigosus po medas scuadras (is de su Bosa, de s'Arbus, de su Porto Rotondo e de su Li Punt no ant giogau), ma cussu chi si fait pru prexei, e tocat a du nai, est chi totus impari funt cumbatendi, cun coru mannu, passièntzia e conca, contras a su spaniamentu de su tiau de virus.

Scieus puru chi po is dirigentis de is assotzius nc'est meda traballu de fai, prus de cussu chi fadiant giai me is annus passaus, poita funti issus chi depint arriciri is tifosus a su campu e depint atendi a totus is fainas, cumenti narat su chi tzerriant "protocollo": est a nai, po nd'arremonai feti una pariga, assegurai chi nisciunu de cussus chi ndi brintant tengiat sa callentura, o assegurai chi totus tengiant sa mascheredda avatu, o assegurai chi is personas si nd' abarrint stesiadas s'una cun s'atra.
Dhu cumprendeus beni, no est facili, e dhu sciestus giai, ma su chi s'importat de prusu, in dii de oi, e che pròpriu ariseu merì si funt giogadas is partidas chi ballint po sa de cuatru giorronada.

E intzandus, po alligerai su coru, podeus puru castiai is risultaus: is de su Castiadas si gosant su primu postu in sa lista, cun catodixi puntus in totu, gràtzias a sa bìncida po 4 a 1 boddita in domu de is de su Budune, cun Serra e Porcheddu chi faint duus gol a cada unu.

Cun feti duus puntus in mancu, a su de duus postu in sa lista, nci funt is biancu-nieddus de s'Ossese, chi si ndi pigant unu puntu in sa batalla contras a is de sa Nuorese: is birdis – asullus fiant bincendi sa partida po tres a unu fintzas a dexi minudus de sa fini, ma Chelo e Gueli ant agatau is giogadas chi funt serbidas po cassai is piciocus de mister Marco Sanna, po su prèxiu de mister Giuseppe Cantara e de totus is tifosus de sa scuadra de domu.

A su de tres postu in sa lista, cun noi puntus, nci funt is casteddaius de sa Ferrini, impari a is arthanesus de s'Idolo: sa scuadra de mister Pinna at bintu sa partida, una de cussas de importu prus mannu de sa giorronada, po unu a zero, gratzias a su gol de Matteo Lecca, unu piciocheddu piticu, de feti dexi-otu annus, chi est brintau in campu candu nci fiant de giogai feti binticincu minudus.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Campionato:
Argomenti:
Stagione:
2020/2021
Tags:
Eccellenza