Cadoni trabballat po su benidori: sa scumissa est torrai a fai partiri is giogus de is scuadras de Promotzione, Primu e Segunda Categoria

S'arriscu prus mannu de totus, no seus brullendi (e fortzis fortzis unu paghedhu s'iat a praxi), est chi su giogu de sa bòcia potzat acabbai a essi, e duncas diventai una faina feti po is arricus. Dhu scieus beni, mescamente po su chi sucedit innoi in Italia, cun su giogu de sa bòcia chi pertocat millionis e millionis de piciochedhus, partendi de is prus pitichedhus, chi po imoi giogant me is scolas de calciu o me is scuadras de is "pulcini" (diaici dha sas tzerriaus in italianu, a su mancu, ma in sardu iat a benni aforas calincuna cosa cumenti a "scuadra de pudhighinus"), fintzas a arribbai a is scuadras de is piciochedhus prus matucus, est a nai de cussus chi giogant me is "Allievi" o me is "Giovanissimi". Sa chistioni ballit puru po is piciocus chi giogant me is scuadras de sa "Juniores", e po totus cussus, mannus e prus piticus, che dònnia cida currint (ma in custu duamilla e bintunu lègiu e trotu, fortzis prus lègiu e trotu de su duamilla e binti chi, a arrogus e mussius, prangendi e cranciendi, seus arrannescius a si ghetai a is pabas) avatu a una bòcia, me is campionaus de Segunda Categoria, de Primu Categoria e de Promotzione. Totus custus campionaus, cumenti est sucèdiu po is campionaus de is giogadoris prus giòvunedhus, funt frimus de sa fini de su mesi de Ladàmini de su duamilla e binti, e bai circa cumenti ant a bandai is cosas po sa stagioni chi at a benni, cun is dudas chi funt (e abarrant) sèmpiri is pròprias: cantu scuadras ant a podi curri? Nc'ant a essi torra is campionaus de is diletantis? Nc'ant a essi torra is partidas giai in dònnia bidda, cumenti sucediàt ainnantis de custu tialu de pandemia, diaici dha tzerriant in italianu, ainnantis de custu arrori mannu, de custa mobadia chi si nd'est arruta in conca e sighit a fai dannus, e mannus puru. Dannus a sa conca de sa genti, po incumentzai, poita no scieus ancora, ma d'eus a scoberri chitzi meda, totus is arroris chi custus mesis passaus in assètiu, est a nai dònnia unu po contu suu, serraus me is aposentus, chenza podi biri nemus, chenza podi chistionai cun nemus, chenza podi giogai cun nemus. Feti chi pentzaus chi, fintzas a ariseu, su giogu de sa bòcia dhu praticastus in mesu a sa bia, in sa ruga, est facili a cumprendi cumenti is cosas funt cambiendi, e allestru puru, poita in giru o a passillai me in sa bia nc'est sèmpiri prus pagu genti. Mi fait a timi, e meda puru, a nai sa beridadi, totu cussa mudesa chi s'intendit me is bidhas, giai de is otu de su merì, mancai s'òbbrigu de si tupai in domu siat de is dexi. Dhu podiat cumprendi in s'atonzu o in s'ierru, candu is diis funt prus crutzas e scurigas chitzi, ma imoi chi nd'est lòmpiu su beranu (e puru s'istadi), cun is diis chi si faint prus bellas e prus drucis, totu custa mudesa chi intendu, chi s'intendit, est unu buciconi scutu a conca. E a forti puru. Dhu scieus beni: s'òmini tenit bisòngiu de si spreviai, de si spàssiai, po si scaresci, a su mancu po una pariga de oras, de totus is cosas grais e marigosas chi nci funt in custa vida, partendi de is daboris, de is mobodias e de su trabballu, chi est sèmpiri o tropu pagu o tropu fadiosu. Su giogu, duncas, est una de is cosas chi si donant unu paghedhu de scanceriu: ballit po totus is giogadoris, est craru, de calecasiat sport, de calecasiat faina; ma ballit puru po is allenadoris, chi tenint sa passioni, forti e manna meda, de sighiri is piciocus, me is allenamentus aintru de sa cida, diaici cumenti su domìnigu, po is partidas de su campionau. Seus chistionendi de una biga manna de genti chi po immoi, e bai circa fintzas a candu, no podint fai una de is cosas prus togas chi ant agatau de fai in custa fida.

Eus incumentzau s'articulu chistionendi, de su restu, de su giogu de sa bòcia cumenti a faina feti po arricus: est a su mancu de su mesi de Abrili chi me is giornalis si ligit de cussa chi tzerriant "super-lega", est a nai unu campionau cun totus is scuadras prus fortis de s'Europa. Sa chistioni est bessida aforas su dexianoi de su mesi de Abrili, candu, aici parit, a su mancu, a ligi totus is novas chi ndi funt aproilladas, cuindixi scuadras ant agatau s'acordiu po ndi pesai unu campionau totu nou. Is scuadras chi ant tentu custa bidea funt doxi: seus chistionendi de is de s'Arsenal, de su Chelsea, de su Liverpool, de su Manchester City, de su Manchester United e de su Tothenam, po su chi pertocat is ingresus; po su chi pertocat su campionau de is ispagnolus, is scuadras funt su Real de Madrid, su Barcellona e s'Atleticu de Madrid; po s'Italia, invècias, si chistionat de is tres scuadras prus fortis (e arricas) chi nci funt: is de sa Juventus, is de s'Internazionale e is de su Milan. A custas doxi, s'iant podi aciungi atras tres scuadras, chi iant a podi essi: is de su Paris Saint German, is de su Bayern de Monaco e is de su Borussia de Dortmund. In prus, nc'iant a podi essi atras cincu scuadras in sa cursa, sceradas tra cussas prus fortis de is atrus campionaus europeus natzionalis. Custu campionau nou, est a nai sa Super-Lega, nd'iat a podi pigai su postu de sa Champions League (cussa chi in italianu, me is annus passaus, tzerriastus "Coppa dei Campioni") e de cussa chi, fintzas a oi, seus costumaus a tzerriai sa "Coppa Uefa" puru. Pròpriu po custu, is de s'Uefa ant artziau sùbbitu sa boxi po circai de difendi is interessus cosa insoru, est a nai, e est craru, chi is de s'Uefa no tenint nisciuna gana de si fai binci e brincai de cussas chi funt, peròu, is scuadras prus mannas e prus arricas in totu Europa e chi imoi funt adderetura pentzendi de curri in d'unu campionau pesau de issas a totu, e fortzis no nc'iat a essi nudha de strangiu, a nai sa beridadi, in d'unu mundu, cumenti cussu de sa bòcia de is grandus scuadras e de is grandus campionis, chi bivit, a su mancu aici si parit a bortas, feti po su dinai. In custu manera, est craru, su dinai iat a finiri totu me is buciacas de is grandus assotzius sportivus chi dhoi funt in Europa, chentza de essi pretzius, duncas, cun is de sa Uefa, chi po imoi, funt, e funt sèmpiri stètius, is meris de is giogus. Propriu po custu, sa dì avatu a totu de sa prima nova chi nd'est bessida a pillu, de parti de is de sa lega noba, est a nai is scuadras chi ndi iant a bolli pesai sa "Super-Lega" (diaici dha tzerriant), is de s'Uefa si funt acutus a fai bessiri unu comunicau, innoi si ligit, tra is atras cosas, ca "is assotzius chi funt trabballendi a custa faina iant a podi essi bogaus aforas de totus is giogus e campionaus natzionalis, europeus e fintzas de cussus mondialis". Is giogadoris de custas cuindixi scuadras, duncas, no iant a podi giogai is campionaus mondialis e europeus, tra is atrus. In sa bidea de is cuindixi scuadras chi ndi funt pesendi sa Super-Lega, is campionaus natzionalis iant a podi sighiri cumenti a sèmpiri, est a nai chentza nesciunu strobu. Su giogu si parit craru: po imoi si ndi cumprendit ancora tropu pagu po essi segurus de sciri cumenti ant a bandai is cosas, poita su budrellu, naraus diaici, s'est alluttu feti de pagu tempus, ma podeus giai pentzai chi is de s'Uefa, is de sa FIFA (chi funt cussus chi manigiant e sighint is fainas de su giogu de sa bòcia in totu su mundu) e is scuadras europea chi iant a bolli brintai in cussa chi tzerriant sa Super-Lega isperant giai de agatai un acordiu chi potzat acuntentai totus. Tra is possibbilidadis, nc'est puru cussa de biri is scuadras prus fortis e arricas curri in d'unu campioau europeu a parti, cun totus is atras scuadras chi ant a abarrai asuta de s'amparu de is de s'Uefa. Sinuncas, e ballit uguali, is cuindixi scuadras chi nd'iant a bolli pesai unu giogu, unu campionau feti po arricus, funt circhendi de acoitai a torrai a aderetzai is règulas chi pertocant sa Champions League, cun is chistionis e is arrexonamentus chi funt andendi ainnantis giai de una pariga de annus, a nai sa beridadi, e no feti de oi, de seguru; sa bidea est cussa de rennovai is cosas po su duamilla e binti-cuatru, ma sighendi a curri diaici, cun is bideas e is chistionis, su mundu de sa bòcia iat a podi essi ghetau a fundu 'e susu (cumenti si narat me in bidha mia) giai a partiri de custa istadi.

Po motivus diversus, e cun custu torraus a chistionai de is fainas de su mundu de sa bòcia de is diletantis sardus, in Sardìnnia puru a giogai a bòcia funt feti is otu scuadras chi ant decidiu de torrai in campu, in su mesi de Abrili, apustis de giai cincu mesis de nudha. A nai sa beridadi, is scuadras chi ant decìdiu de abarrai aforas de is giogus, est a nai chi ant decìdiu de castiai is atrus, tenint is arrexonis cosa insoru: ndi pesai una partida, o unu campionau, sciendi giai chi sa genti (est a nai is tifosus) no ant a podi andai e brintai àintru a su campu a castiai is giogadas prus togas e bellas de is giogadoris, est unu fatu chi si ponit, chi si lassat in pitzus una tristura diaici manna chi fortzis is fuedhus no bastant a dha contai. Su giogu de sa bòcia, mescamente cussu chi pertocat is diletantis, est una faina chi serbit, chi agiudat, tra is atras cosas, a fai atobiai is personas. Poita is personas tenint bisongiu de si atobiai apari, e de candu est incumentzau totu custu dannu mannu de sa mobadia e de is apuntoraus (e, mescamente, de su riscu chi nc'est, de fai apuntorai is atrus), is logus innoi is cristianus s'atobiànt, fintzas a s'atra dì, a su mancu, funt stètius serraus. Is assotzius sportivus, tra is atras cosas, ndi pesant cussus cuatru arriabis, dònnia domìnigu, cun su dinai chi fadiant bendendi sa cosa de bufai a is tifosus (tra birras e caffè) e cun su dinai chi ndi ingolliant cun is billetus de is intradas; chentza custu dinai, est craru, is scuadras prus pitichedhas no podint sighiri a bivi, a bandai ainnantis, poita is spesas de sighiri no funt pagus. Is scuadras de s'Eccellenza, duncas, po torrai a partiri, ant depiu ponni in contu de fai is esamis a is giogadoris (calincuna cosa cumenti a binticincu \ trinta piciocus po dònnia rosa) ainnantis de dònnia partida, isperendi che is de su Guvernu donint is agiudus in dinai, cumenti ant promìtiu. In prus, e no est chistioni de pagu, nc'est sèmpiri su riscu, e mannu puru, de ndi ingolli su virus e de apuntorai diaici totus is cumpàngius puru, chi diaici iant a depi abarrai frimus po duas-tres cidas, chenza podi trabballai. Pròpriu custa, a su mancu aici si parit, est una de is chistionis prus callentis. Ma custas règulas, di seus segurus, no ant a balli feti po sa stagioni de su duamilla e binti \ duamilla e bintunu, ma ant a essi is règulas de sighiri puru in sa stagioni chi at a benni, in cussa de su duamilla e bintunu \ duamilla e binti-duus. Chi si dhu arregodaus beni, giai s'annu passau, est a nai in su mesi de Cabudanni, candu fiant po partiri is giogus de sa stagioni noba, sa primu apustis de s'arribbu de su Covid, calincuna scuadra tra cussas chi depiant curri me is campionaus de Primu e de Segunda Categoria, ndi fiat bessida de is giogus ainnantis de s'incumintzu (est cussu chi ant fatu is de s'Allai, po nd'arremonai una). In custa istadi puru, est cussu chi timeus, a su mancu, eus a depi bivi una situatzioni uguali: cantu scuadras ant a sparessi? Cantu bidhas e cantu piciochedhus ant a abarrai chenza sprèviu e chentza spàssiu?

Giai me is annus passaus, is strobus chi is scuadras teniant candu trabballànt po ndi pesai is rosas e po arrannesci a agatai su dinai po pagai is iscritzionis a is campionaus no fiant pagus, antzi. Timeus, duncas, chi is cosas ant a bandai sèmpiri peus, ma po oi no si boleus fasciai sa conca ainnantis de tenni su dannu.

Me is cidas passadas, tra is atras cosas, apu tentu s'ocasioni de chistionai cun Bruno Piroddi, chi est stètiu s'ùrtimu presidenti de s'assotziu sportivu de sa bidda innoi bivu, est a nai s'U.S Villasor, de Bidd'e Sorris. Sa scuadra est stètia sciusciada de duus annus, est a nai chi de duus annus is piciochedhus de sa bidha no tenint prus sa possibbilidadi de giogai a bòcia in d'unu campionau pesau de is de sa FIGC e de sa LND; is spesas de sighiri po ndi pesai una rosa funt sèmpiri prus artas, e is piciochedhus chi giogant funt, de su restu, sèmpiri prus pagu. Est po custu chi Bruno Piroddi, po su benidori, aici m'at contau, a su mancu, isperat in agiudus de is de su Comunu, a partiri da su sìndigu e de s'assessori a su sport. In s'interis, in su campu "San Biagio", nci giogant is de sa San Marco, chi currint po su campionau de s'Eccellenza. E is poberus piciochedhus de sa bidha mia ita podint fai? No nc'est sa possibbilidadi de brintai a su campu a biri sa partida, cumenti eus giai contau, e diaici s'unica cosa chi si podit fai est s'atobiai me in su corratzedhu chi nc'est afaci de su campu (e chi iat a depi serbiri po portai is canis a curri e a fai is bisòngius), cun d'una bocia de pigai a carvadas de pei, e cun duas portas pesadas cun cuatru perdas e una pariga de arrugus de linna. Una cosa chi, a bolli nai sa beridadi, no s'iat a podi mancu fai, chi pentzaus chi is atobius tra cristianus funt controius, mescamente candu sa regioni est pintada de arrubiu, de cabori de arangiu e fintzas de grogu. E diaici, apu biu Bruno Piroddi, s'ùrtimu presidenti de s'assotziu sportivu de sa bidda mia, chi est abarrau in peis po prus de cincuant'annus, castiai cussus cuatru piciochedhus gioghendi a bòcia me in su logu innoi, a bortas, andant a curri is canis; e m'est patu de dhu podi intendi, su disprexei in su coru de Piroddi, chi est uguali, de su restu, a su disprexei chi tenint in su coru totus cussus chi no podint prus curri po si spàssiai e si spreviai, cumenti fadiant, a su mancu, fintzas a s'annu passau.

Is de s'Eccellenza, in s'interis, e dhu scieus beni, funt torraus in campu pruschetotu poita funt acapiaus cun sa chistioni de is chi tzerriaus retrocessionis cun is scuadras de sa Sèrie D; est a nai chi is scuadras chi ndi cabant abasciu de sa Sèrie D, poita funt arribbadas me is ùrtimus postus de sa lista, no podint andai a giogai torra in d'unu campionau chi est abarrau studau po un annu interu; ita funt gioghendi a fai, intzandus? Est diaici, duncas, chi is campioaus de s'Eccellenza ant arriciu, de parti de is de su Coni e de sa FIGC e puru de is de su Guvernu, sa possibbilidadi de essi craculaus a trassa de is giogus de importu natzionali, mancai s'iant, a nai sa beridadi, campionaus regionalis. Po custu si cumprendint beni is fuedhus de Gianni Cadoni, chi a sa fini de sa partida tra is de su Castiadas e is assèminesus de sa San Marco, chi est stètia sa primu partida de s'Eccellenza in su duamilla e bintunu, at contau: «Deu apa a fai unu giru, dònnia domìnigu, me is campus innoi si giogant is partidas, mi parit diaderus una de is mellus cosas chi si potzant fai, po abarrai acanta, est a nai a su costau de is scuadras chi ant scerau de torrai a giogai. Dhu fatzu cun gana bella, cun coru prenu de isperas e cun grandu prexu. Torrai a fai partiri is giogus e is campionaus, mancai cun pagu scuadras (feti otu n.d.r), est stètia una cosa unu paghedhu traballosa, e dhu sciestus, si dhu abetastus, ma festus isperendi de torrai a biri is giogadoris currendi avatu a una bòcia. Seu prexiau po is otus scuadras chi and decìdiu de torrai a giogai: est unu segnali de importu mannu meda po totu su mundu de sa bòcia de is diletantis in Sardìnnia e imoi no podeus fai atru ca isperai chi totu custu dannu lègiu chi seus circhendi de si ndi scabulli de pitzus de prus de un annu potzat sparessi allestru, diaici po sa stagioni chi at a benni ant a podi torrai a curri, a giogai e a batallai totus is atras scuadras puru chi po imoi ant decìdiu de abarrai frimas».

 

Attività realizzata col contributo della Regione Sardegna. IMPRENTAS 2020-2021. LR 22/2018 art. 22