Castiadas, Mereu tenet fide. “Como castiamus a totus dae su bassu ma podimus essire dae sos casinos, su fùbbalu alligru at a remplassare cussu de sa timoria”.

Su chi contaiat non fiat a colare su turnu in Copa Itàlia contra de sa Nuorese, una de sas mègius de su girone mancari chi s’Annunziata siat calada in campu sena giogadores de importu. Su Castiadas at pèrdidu 1 a 0, carinnende in antis su vantàgiu cun Coquin e posca su parègiu cun Anedda, su tècnicu nou Bernardo Mereu at provadu s’iscuadra chi at paregiadu 0 a 0 cun s’Astrea a s’”esòrdiu suo” in antis cun su 4-4-2 e posca cun su 4-3-3. “So prexadu meda pro su traballu fatu dae s’iscuadra e pro sa partida giogada contra de sa Nuorese – narat su tècnicu cuartesu originàriu de Triei – ca cussu chi m’interessaiat a bìdere est istadu giai avaloradu. Frau pro nàrrere at giogadu comente internu in unu ruolu chi no aiat mai fatu in antis, sos inditos sunt istados medas pro mene, pro sa sotziedade e pro sos giogadores etotu subra su traballu chi depent sighire a fàghere”.