Giuseppe Mastinu ndi atziat in Serie A cun su Spezia , in Promozione sa Tharros imprassat Andrea Sanna

Su duamila e binti at fatu diaderus de totu po essi un annu trotu, marigosu e ghetau a pari, e cussu chi s'est sucediu cun cussu tiau de virus est ancora in sa conca e me is pentzamentus de totus, e seus sigurus chi no serbit nemancu aciungi unu fueddu.

Su mundu de sa bòcia, peròu, est circhendi de andai aranti, ancora prus a forti de is atras istadis, aicci si parit a su mancu, po torrai a partiri tra duas cidas cun is partidas.

In s'interis, ndi seus chistionendi giai de una pariga de mesis a nai sa beridadi, is sotziedadis funt trabballendi in su mercau, dii e noti, po acabai de cuncodrai is rosas.
Is nobas de oi, peròu, incuminzant cun d-unu auguriu: andat deretu conca a Giuseppe Mastinu, s'atacanti de su Spezia chi nd'est artziau in Serie A, impari a is cumpangius, gratzias a sa bincida in sa partida de is play-off contras a is de su Frosinone.
Mastinu, nasciu in Tattari, in Sardinnia at giogau cun is de s'Alzachena, trexi gol in norantases bessidas, tra su duamila e noi e su duamila e trexi; cun is de su Budoni, po undixi gol in trinta partidas, in su duamila e trexi \ duamila e catodixi e, apustis, de su duamila e catodixi fintzas a su duamila e sexi, cun is de s'Olbia.

Mastinu at tentu, me is ùrtimus annus, infortunius legius e strobus chi no d'ant permitiu de giogai totus is partidas, ma imoi sa vida dhi donat sa possibbilidadi de si dha gherrai cun is giogadoris prus fortis, in su campionau de is professionistas chi, est craru, est su prus sighiu de is tifosus de totu Italia.

Po oi serraus, invècias, cun d-una noba chi pertocat is de sa Tharros, chi ant a curri in su campionau de Promozione, sighius de mister Tonio Madau: su presidenti de is biancus-arrubius, Tonio Mura, est arranesciu a cunvinci Andrea Sanna, nasciu in su milli e noicentus otanta tres, a torroai a giogai in Aristanis, innoi fiat giai stetiu me is primus annus de sa carriera cosa sua. Sanna nd'aproillat apustis de sa storia cun is de s'Alzachena, innoi at bintu su campionau de Serie D e giogau, po duus annus, in Lega Pro.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020