Gol e ispetàculu intre La Palma e Calangianus, su pari treuladu lassat sos gadduresos a in antis

Sunt sas prus pagu pronosticadas de su campionadu de Ecellenza ma sunt a in antis cun mèritu. La Palma e Calangianus ant cunfirmadu s’inghitzu bonu issoro de s’istajone, frutu de su giogu bellu, de unu naturale a su giogu de atacu e de s’isconcaditu chi tenent sos pitzinnos. Sos gadduresos si faghent seberare pro s’esperièntzia chi bi ponent in defensa Melino e Budroni, a sos casteddajos intamas mancat unu elementu lughente che a Giorgio Piras pro assentare sas cosas in segus. Su 2 a 2 nàschidu in sa prima mesora de gara est pro de beras giustu mancari chi lasset murrungiare unu pagu sos meres de domo chi no ant ischidu a disfrutare sa superioridade numèrica in s’ùrtima mesora. Est istadu bellu a bìere sa crèschida de su cuncordu intre Sarritzu e Festa dae una banda e Spano e Viani a s’àtera, chi in cada mamentu podent imbentare una giogada chi mudat totu.