Khalì moet dae Viterbo, su pitzocu de 20 annos senegalesu ex Olbia at sinnadu in s’esòrdiu in su big match de Grosseto

Esòrdiu cun gol. Mbaye Babacar at infustu gosi sa prima gara cun sa màllia de sa Viterbese, a su 3’ de su big match in Grosseto: in sos isvilupos de un’àngulu tiradu dae Giannone, at corpidu de conca ponende sa botza in palas de Lanzano, faghende gosi cuntentos una chentena de tifosos castrenses presentes in s’istàdiu Zecchini. Su senegalesu de sa leva ’95 in Sardigna est prus connotu cun su annomìngiu de Khalì, leadu dae s’Olbia s’annu coladu cando in su retiru de Arona l’aiant propostu a su mister Pierluigi Scotto chi l’aiat chertu deretu. In màllia bianca at fatu ruolos diferentes, a comintzu s’esternu in defensa e su trecuartista de manca in su 4-2-3-1 chi agradaiat a su tècnicu tataresu. A bias titulare, a bortas postu in gara comintzada at marcadu a s’acabu de campionadu 9 gol, una incùngia manna pro chie at cumpridu 20 annos su 6 de cabudanni coladu.