Lanteri a innantis cun is giòvunus, Robbi: «Traballaus cun is pipius de candu aproillant po giogai a bòcia po sa primu borta»

A bortas po binci is partidas e lompi fintzas a is primus postus de sa classifica no serbit a spendi una biga de dinai po cunvinci is giogadoris prus fortis a giogai po tui; a bortas abastant is bideas, unu bisu, unu stìddiu de passièntzia e sa gana de traballai, dònnia dii cun is pipius piticus, chi ant a essi is òminis de crasi. In Sa Lanteri de Sassari funt giai de prus de ses annus chi sighint diaici, cun Giuliano Robbi, s'allenadori de sa primu scuadra, chi tenit sempri un'ogu, unu fueddu bonu po is piciocus prus piticus.

«Seus una scuadra de giovunus; teneus undixi “fuori-quota” e feti undixi giogadoris prus matucus; candu si ndi strupiant una pariga totu paris no sciu cumenti fai; su domìnigu acabaus is partidas cun cuatru, cincu piciocheddus in campu, chi funt fadendi a biri a totus cantu funt fortis; sa sotziedadi si interessat meda a custu fatu, funt prexaus meda po cumenti funt andendi is cosas». Agoa aciungit: «Seus una de cussas scuadras, ma no funt medas, chi traballant cun is pipius de candu aproillant po giogai a bòcia po sa primu borta, fintzas a candu arribant a sexi-dexasseti annus. Po imoi is cosas funt andendi beni, agoa at a tocai a biri ita totu at a sussedi».

Sa Lanteri est abetendi chi acabint is traballus in su campu nou, chi at a essi fatu cun erba artifitziali. «Deu pentzu chi is piciocheddus ant a benni cun pru gana a giogai anche nosu; ca no nci funt medas scuadras chi tenint unu campu in mesu a is domus e a is pratzas de sa citadi, innui nci podis arribai a pei puru». Robbi no biiit s'ora. «In custas diis funt ponendi s'arena e is perdixeddas, ddu sciu poita nci bivu ananti. Spereus chi totu siat prontu po friargiu, poita po imoi seus gioghendi a Uri: no est de sicuru sa cosa mellus po sa genti chi benit a si biri. Iat a essi bellixedu giogai in Sassari».