Latte Dolce a in antis e cun sa defensa mègius, Garau: “Nos agradat a istare gosi in artu ma a bìnchere est peleosu. Petzi 3 retes collidas? Meressimentu de sos cumpàngios e de su preparadore Pinna”

Su portieri est che a su binu, prus imbetzat e prus est bonu. Pierpaolo Garau est che a custu, a 32 annos si cunfirmat intre sos interpretes de gabbale in su ruolu, lu narant sos nùmeros proite est su prus pagu bìnchidu de su campionadu e ca lu narant sas prestatziones, semper de balia pro una iscuadra che a su Latte Dolce chi no est de badas chi est in su cùcuru de sa classìfica de Eccellenza paris cun s’Atletico Uri. In s’ùrtimu turnu sos tataresos sunt andados a bìnchere su big match in domo de su Sant Teodoro, chi arribat dae una bìnchida in Tonara cun sa torrada in su cùcuru de sos gadduresos. Unu 2 a 0 sicu chi ismànniat sas cuotatziones de sos biancu-mèscrinos pro brincare de categoria. “Cun custa bìnchida amus dadu unu messàgiu forte – ammitit Garau – mancari chi so de su parre de comintzu de campionadu est a nàrrere chi semus sulenos, chi sa sotziedade non nos at mai pedidu de bìnchere e mai postu palos”.