Oi in Casteddu s'adiosu a Franco Masia: òmini de sport

Nci est andau, a pustis de maladia longa, dumìnigu a 59 annos, Franco Masia, stòricu allenadori de is giòvunus de su Casteddu, meda connotu in citadi, no sceti po su sport e su futbàlu, ma prus che totu cumente persona. Masia fiat su babu de Davide e Alessandro, chi fiant in sa scoadra de is giòvunus de su Casteddu de candu  fiant pipius, e Alessandro imoi bistit sa màllia de su Lanusei (sèrie D). Est su fradi de Maurizio, ex tènnicu de sa scola de futbàlu Johannes, e de Roberto, giogadori e tènnicu. Oi a is dexi de mengianu in Piazza Giovanni in Casteddu, meda tènnicus de su mundu de su futbàlu e meda giogadoris (chi ant fatu is primus passus in custu mundu cun issu), cun is amigus, si funt stringius a sa famillia. A in antis de meda genti comòvia, su predi, a sa fini de sa missa, at arregodau, in sardu, ca "Sa vida est cumente su entu: candu acabat, no avisat".