Po is giogadoris diletantis at a essi unu mesi de daboris, ma is de sa Sèrie D sighint a cabai in campu

No at a essi fàcili abarrai chenza bòcia po unu mesi, pruschetotu imoi chi festus torrendi a nci fai sa buca, naraus diaici: in d-unu primu tempus pariat chi is allenamentus, mancai dònnia unu po contu sù, abarrendi stesiaus s'unu cun s'atru, podessint sighiri a andai ainnantis, ma is de su Guvernu nc'ant postu pagu a ndi sciusciai is bisus de is giogadoris diletantis: nudha de fai, a su mancu, e dhu scieus giai, fintzas a su 24 de su mesi de Donniasantu.
Est cussu chi si podit ligi in s'ùrtima tzirculari fata bessì aforas de is de su Viminale, pròpriu po crariri sa chistioni.
A cantu parit, po is de su Guvernu, su sport no est una faina de importu po sa saludi de sa genti, ma feti una manera cumenti un atra, mancai, po passai duas oras in cumpangia; cumenti chi fessit aguali, po nai, a andai a baddai.

Diaici, apustis de sa serrada po totus is palestras, e apustis de sa controida chi pertocàt totus is piciocus piticus e is pipius chi giogant me is campionaus provincialis, nd'est arribada una surra manna, dha tzerriaus diaici, po totus is atrus.

Is campionaus s'ant a frimai, intzandus, a su mancu po cuatru domìnigus e nc'at a essi de cumprendi, apustis de totu custu tempus, cumenti s'ant a agatai is cambas de is giogadoris. Ma nd'eus a torrai a chistionai.
In s'interis, cun s'Eccellenza, sa Promozione, sa Prima e sa Secunda Categoria frimas, in Sardìnnia ant a sighiri is giogus feti po is de sa Sèrie D: su chi si tzerriat "Dipartimentu Inter-regionali" at domandau a totus is scuadras, e duncas a is presidentis, chi si dha intendiant ancora de sighiri a cabai in campu, arrispetendi, est craru, totus is règulas, cumenti ant fatu, de su restu, fintzas a oi.

S'arrespusta est stetia crara: centu e binti-tres assotzius, de is centu e sessanta-ses chi currint me is campionaus de is semi-professionistas, ant fatu a cumprendi de essi de acordiu. E intzandus, po sa Sèrie D dominìgu nc'at a essi sa de ses giorronada.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020