Pro su Collègiu de Garantzia sos recursos de sa Torres sunt in parte no ammissìbiles e sena fundòriu: abarrat sa sèrie D e s’inibitzione de Capitani

Sa Torres fiat galu isperende ma in pagos creiant chi su Collègiu de Garantzia de s’Isport de su Coni aeret furriadu dae conca a pee su giudicadu de sa Procura Federale de Apellu chi aiat retrocessu in sèrie D su club ruju-brau in intro de s’inchesta Dirty Soccer. A s’acabu de sa Sessione de Udièntzias fatas a su sero at declaradu “in parte no ammissìbiles e in parte sena fundòriu sos recursos presentados dae sa sotziedade Torres e dae Domenico Capitani e Giuseppe Sampino. At cundennadu sas partes chi ant fatu recursu a pagare sos gastos de giudìtziu a sa federatzione intimada, licuidados, pro cada parte, in sa mesura de 1500 èuros, in prus de sos acessòrios de lege. At cumpensadu sos gastos a sas partes costituidas”. Custu cheret nàrrere chi sa sotziedade tataresa at a dèpere sighire a giogare in su campionadu de sèrie D.