Promotzione: Idolo e Ilvamaddalena faint festa; nudda de fai po is play-off: Lanteri e Biddàxidru abarrant a buca asciuta

Sa de su duamilla e dexianoi \ duamilla e binti fiat potzia essi una stagioni toga meda po su mundu de sa bòcia, a su mancu po cussu chi eus biu me is primus cincu mesis de su campionau: in totus is cuìndixi gironis, partendi de cussu de s'Eccellenza, passendi de is duus de sa Promotzione e de is cuatru de sa Prima Categoria, finzas a nd'arribai a is otu de sa Secunda Categoria, no nc'est stetia, difatis, una scuadra chi est arrannescia a donai una bella surra, cumenti si narat, a totus is atras e a si ndi bolai assoba in conca a sa lista.
Antzis, candu mancànt calincuna cosa cumenti a otu giorronadas, is giogus po ndi artziai de categoria fiant ancora obetus po medas scuadras, ma su virus, cumenti scieus beni, nd'at sciusciau totu.

No s'abarrat pròpriu nudda, intzandus, de sa batalla in Eccellenza po su primu postu de sa lista, tra is de su Carbònia, is de su Castiadas, is biancu-nieddus de s'Ossese e is de sa Nuorese: in Sèrie D ndi atziant is mineràrius, gràtzias a is cincuantacuatru puntus bodditus in bintitres partidas; po is biancu-birdis, imoi, abarrat feti de isperai in sa cata de su chi tzerriant "ripescaggio".

A contus fatus, est andada beni meda puru po is piciocus de s'Idolo de Arthana, chi apustis de bintiduas partidas s'agatànt in su primu postu de sa lista, cun corantacincu puntus, otu in prus de su Sant'Aleni de Cuartu, dexi in prus de su Biddaxidru, chi fiat cumbatendi impari a cussus de su Buddusò, a is de su Bidda Matzràxia e a is de s'Andromeda de Sriugus Donigalla po brintai me is giogus de is "play-off".

Su pecau prus mannu, fortzis, pertocat su Girone B: tra s'Ilvamaddalena, primu de sa lista cun cincuanta-seti puntus, e is de su Tiesi, ci funt feti ses puntus; su disprexei pru mannu, ndi seus sigurus, tocat a is tataresus de sa Lanteri, chi ant fatu ispantus cun catodixi bìncidas in bintiduus bessidas e fiant currendi a forti meda.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020