Is scuadras de sa Promotzione e de sa Primu Categoria torra in campu su binti-ses de su mesi de Cabudanni

In s'istadi, dhu scieus beni, sa bòcia si firmat e is scuadras sardas si nci ghetant in sa fentana de su mercau, po circai de cuncodrai is rosas po sa stagioni chi at a benni. Is amigus de Diario Sportivo, de prus de dexi annus, sighint is fainas e is stòrias de totus is assòtzius, partendi de is de sa Sèrie D, fintzas a arribbai a is scuadras prus pitichedhas chi currint me is campionaus de Segunda Categoria. Diaici is tifosus si spàssiant a sighiri totus is girus chi faint is giogadoris prus fortis, chi si ndi andant de una scuadra po ndi aproillai in d'un atra, e nc'est de nai chi in custas ùrtimas cidas funt arribbendi una biga manna (cumenti si narat in bidha mia) de nobas chi pertocant su mercau, e duncas no boleus perdi atru tempus in strolichènzias.

S'ùnica cosa chi m'iat a praxi a nc'aciungi est unu bisu, un'ispera: totus si ndi arregodaus beni cumenti funt andadas is cosas in custus ùrtimus duus annus, no feti po su chi pertocat su mundu de sa bòcia in Sardìnnia (e in Italia puru) ma po su chi pertocat totus is fainas e is atividadis de sa genti, ca cussu tialu de Covid (e cussa chi, in italianu, tzerriaus "pandemia") chi nd'at ghetau a pari totu sa vida cosa nosta, e a pagu a pagu seus circhendi de torrai a bivi cumenti festus costumaus a fai, mancai nci siat sèmpiri sa timoria chi is trumentus lègius e is disprexeis ndi potzant torrai, cumenti acabbat s'istadi e nd'intrat su mesi de Cabudanni. Is de sa LND e mescamente is de su Cumitau Regionali Sardu, in s'interis chi nosu si gosaus su sobi e su mari, funt trabballendi dì e noti po ndi pesai is giogus chi ant a balli po s'annu duamilla e bintunu \ duamilla e binti-duus; mancai in custus duus annus is buciacas de sa genti si funt sbuidadas de dinai, e meda puru, e si cumprendit beni su poita, cun totus is atividadis chi funt depias abarrai serradas po crupa de su virus e de is règulas chi is de su Guvernu nd'ant depiu pesai po cumbati su spaniamentu de sa mobadia, is scuadras sardas funt arrannèscias a su pròpriu a ndi ingolli su tanti chi serbit po pagai is iscritzionis a is campionaus e po circai de ndi pesai is rosas; is dudas prus mannas, intzandus, pertocant su mundu de sa Segunda Categoria, chi est su prus dèbbili po su chi pertocat su dinai de spendi e chi est cussu chi nd'iat a podi sunfriri de prus de totu custu dannu chi si nd'est protziu in pitzus, ma de su chi si cumprendit in dì de oi, mancai totu su disisperu e su trumentu chi eus biviu in custus duus annus (e impari a nosu, totu su mundu de su sport, no feti in Sardìnnia, est craru), is scuadras chi ant a curri me is campionaus de sa Segunda Categoria nci funt, e funt medas, cumenti a dònnia annu. Seus feti abertendi, duncas, de cumprendi cumenti ant a essi cuncodradas is listas (cussus chi in italianu si tzerriant "gironi"), ma scieus giai chi is de su Cumitau funt circhendi de ndi pesai otu listas, cun dexi-doxi scuadras s'unu, e fadendi su contu de is tempus chi eus biviu, chi seus bivendi, no si parit una cosa de pagu importu, antzis. Sa cosa de importu prus mannu, duncas, cumenti festus narendi, est chi sa bòcia torrit a curri (impari, est craru, a totus is piciocus cosa nosta), poita est frima de tropu tempus: is campionaus, difatis, e si dhu arregodaus beni, e cun disprexeri, funt stètius sciusciaus me is ùrtimas diis de su mesi de Làdamini de s'annu passau, e no funt prus torraus a partiri, cosa chi no ballit, est craru, po cussas otu scuadras de s'Eccellenza chi in su beranu, sa cida avatu a su domìnigu de Pasca, funt torradas in campu, po duus mesis de partidas, po si giogai s'artziada in Sèrie D. Ma chi bogaus custas otu scuadras de is contus, po totus is atras no nc'est stètiu prus spàssiu.

A cantu parit, duncas, tra dexi diis at a torrai a partiri sa "Copa Italia" po is scuadras de s'Eccellenza, chi est una de is novas prus bonas chi podeus donai in dì de oi (e, apustis de cussu chi eus scritu, su poita si cumprendit beni): su bintinoi de su mesi de Agustu, intzandus, de domìnigu, nc'ant a essi is partidas chi ant a balli po s'andada de su primu turnu de sa Copa; cun sa torrada chi s'at a giogai su domìnigu avatu, est a nai su cincu de su mesi de Cabudanni. E dhu boleus nai cun totu sa fortza chi teneus in su coru: ta cosa bella chi est chi su domìnigu, tra pagu tempus, at a torrai a essi sa dì de sa bòcia. Bisus e isperas, narastus: isperaus feti chi is giogus potzant lompi fintzas a sa fini, e is de sa LND e de totus is Comitaus Regionalis, funt pentzendi beni (aici si parit, a su mancu) de ndi pesai listas cun prus pagus scuadras de su chi festus costumaus a biri; prus pagus scuadras in d'una lista bolit nai, mescamente, chi nc'ant a essi prus pagus partidas de giogai e, duncas, chi su virus depessit torra donai daboris maus a sa genti, nc'iat a essi prus tempus, in custu modu, de recuperai is partidas chi ndi depessint sartai. Custa est s'ispera de chini est pesendindi is giogus e, est craru, sa ispera nosta, chi cussus giogus (e totu cussa stòrias) dhu sus contaus a is atrus, cun is fuedhus chi podeis ligi, de prus de dexi annus, in su giassu de su Diario Sportivo, est chi is cosas potzant andai beni, po cantu pertocat sa saludi de is giogadoris (e de is tifosus puru), e po cussu chi pertocat is giogus; chi potzant duncas acabbai in campu, chenza tropus strobus. Eus a biri, diaici si narat a su mancu, cumenti ant a andai is cosas.

Po serrai sa chistioni chi pertocat sa Copa Italia, duncas, is scuadras chi ant a curri funt dexiaseti: nci funt is de sa Villacidrese, chi funt stètius piscaus de is scuadras chi fiant in Promotzione e ant pediu de ndi artziai in Eccellenza, ma no nc'ant a essi is de su Budune, chi ant domandau de ndi bessiri aforas de is giogus. Pròpriu po custu, is de s'Arbus, is de su Gùspini e, dhus eus giai arremonaus, is de sa Villacidrese ant a giogai cussu chi in italianu si tzerriat "triangolare": chi at a binci at a sighiri a andai ainnantis in sa Copa, cun sa segunda partida de is tres chi dhoi funt de fai chi s'at a giogai de mèrcuis, sa primu dì de su mesi de Cabudanni. E si praxit a dhu nai, a parri nostu no nc'est modu mellus de incumentzai unu mesi de importu diaici mannu.
E intzandus, est craru, totus is scuadras funt torrendi a partiri cun is allenamentus: ballit po cussas de sa Sèrie D e de s'Eccellenza, ma imoi ballit puru po is de sa Promotzione e de sa Primu Categoria, chi ant a torrai a partiri, cun is partidas de is campionaus, in s'ùrtimu domìnigu de su mesi de Cabudanni, cumenti a dònnia annu, chi at a essi su binti-ses. In s'interis peròu, dhu festus narendi ainnantis puru, is assòtzius funt sparendi (diaici dhi naraus) is ùrtimus cropus in su mercau, po s'afrodhiu mannu de is allenadoris, est craru, chi no bint s'ora de torrai a cabai in campu cun totu sa truma de piciocus, ma ballit puru po totus is tifosus.
Po su chi pertocat sa Promotzione, e custa est una nova de importu mannu meda, no nc'at a essi sa Copa Italia, custu po circai de giogai prus pagu partidas e circai de agiudai, diaici, a acabbai is campionaus; su dexianoi de su mesi de Cabudanni, peròu, s'at a giogai sa partida chi at a balli po sa finali de sa Copa de s'annu passau (seus chistionendi de su duamilla e dexianoi \ duamilla e binti), tra is de s'Usinese e is de sa Macomerese; ancora no si sciri innoi s'ant atobiai is duas scuadras po giogai sa partida (e po circai de ndi cassai sa Copa) ma po imoi scieus chi sa partida at a essi de dòminigu, sa cida ainnantis de s'inghitzu de is partidas de su campionau. Chi is de sa Primu Categoria, duncas, impari a is de sa Promotzione, ant a depi abertai a su binti-ses de su mesi de Cabudanni, cumenti eus giai acinnau ainnantis, po torrai a incumentzai cun su spàssiu, totus is scuadras de sa Segunda Categoria ant a torrai a partiri su primu domìnigu de su mesi de Ladàmini, est a nai su tres. Arribbant novas bonas (e si fait prexei meda meda, est craru) puru po is piciochedhus prus piticus: is campionaus de sa Juniores ant a torrai a partiri chitzi, ma ancora no scieus candu; is scuadras regionalis de is Allievi e de is Giovanissimi, invecias, ant a torrai a partiri cun is giogus, cumenti a is mannus, su binti-ses de su mesi de Cabudanni. Po su chi pertocat su campionau de s'Eccellenza, e cun custu serraus sa chistioni, ant a torrai a partiri su doxi de su mesi de Cabudanni. Chi dhu castiaus de innoi, duncas, cun totu custas novas, su mesi de Cabudanni chi at a brintai tra doxi diis si parit unu de is prus drucis de is ùrtimus annus: no s'abarrat atru de fai chi isperai po su beni, de su sport e de is cristianus.

Incumentzaus duncas cun is novas chi pertocant su mercau cun is de su Muristeni de su presidenti Marco Carboni, chi at arregalau, dhi naraus diaici, a s'allenadori de sa scuadra, Nicola Manunza, unu giogadori forti meda chi iat a podi fai beni meda impari a is campidanesus: seus chistionendi de Antonio Fantasia, un atacanti forti meda de Otieri, nasciu in su milli e noicentus noranta-tres, chi me is ùrtimus annus at giogau impari a is de su Gùspini, apustis de s'esperièntzia cun is de s'Ossese, cun is de sa Macomerese e cun is de su Fonne. Cussu de Fantasia est su de otu achistu chi is de su Muristeni ant fatu in custa fentana de su mercau; s'atacu, in dì de oi, parit forti meda: Fantasia at a giogai impari, difatis, cun Antonio Mossa, nasciu in su milli e noicentus noranta-noi, chi at scerau de abarrai po un antru annu impari a is asullus-biancus; cun Yann Fangwa, unu piciochedhu francesu, nasciu in su duamilla e unu, chi nd'arribbat apustis de is esperièntzias fatas cun sa camisedha de su Murera; cun Federico Anedda, nasciu in su milli e noicentus noranta-ses, chi ndi torrat in sa scuadra de su Campidan'e mesu apustis de is esperièntzias cun is de su Samassi, Istintinu, Tortolì e s'Andromeda de Seurgus Donigala. In prus, Manunza, sèmpiri po su chi pertocat s'atacu, at a podi contai apitzus de Alessio Idda, su prus pitichedhu de edadi de is cincu giogadoris chi eus arremonau, e chi at giai giogau me in su campionau de Eccellenza impari a is castedhaius de La Palma e impari a is asseminesus de sa San Marco. Po su chi pertocat is scuadras sardas chi currint in su campionau de sa Sèrie D, arribbant novas de importu mannu de is de s'Altzaghena, chi ant agatau s'acordiu, pròpriu in custa diis, cun d'unu difensori de esperièntzia manna meda: seus chistionendi de Cristian Sosa de Luca, nasciu in su milli e noicentus otanta-cincu in Uruguay, chi s'annu passau at giogau impari a is de su Livorno, in Sèrie C, cun binti-tres partidas fatas. Sosa est unu giogadori de importu mannu po s'allenadori de s'Altzaghena, Nappi: su diretori sportivu, Antonello Zuchi, est arrannesciu a dhu cunvinci a ndi aprolillai in Sardìnnia, apustis de is esperièntias, togas medas, in Sèrie B cun is camisedhas de is de su Gallipoli e de su Cittadella e in Sèrie C, cumenti festus incumentzendi a nai, cun is camisedhas de su Taranto, de su Venezia, de s'Alessandria, de su Modena, de su Fano e de su Sicula Leonzio.

Arribbant una biga de novas puru de is scuadras chi ant a curri in sa Primu Categoria: si fait prexei, poita custu bolit nai chi, in d'unu modu o in d'un antru, puru is scuadrixedhas prus pitichedhas funt arrannescendi a abarrai strantaxas, mancai totus is strobus. E duncas, parteus cun is de su Cabuderra, chi ant agatau s'acordiu, po sa stagioni chi est intrendi, cun d'unu giogadori de esperièntzia manna cumenti a Gianluca Recano, nasciu in su milli e noicentus otanta-tres, chi est unu de is difensoris prus fortis chi nci funt in dì de oi in Sardìnnia. Recano, difatis, at giogau, me is ùrtimus duus annus, cun is de su Gùspini e cun is castedhaius de La Palma. Recano, chi est nasciu e cresciu in Napoli e at giogau impari a sa scuadra de is piciochedhus de is asullus, est lòmpiu in Sardìnnia in su duamilla e ses, est a nai giai cuindixi annus fait, po giogai in su Ceriaxius; apustis, at giogau puru impari a is de su Progetto Sant'Elia, in Castedhu, chi at agiudau a bìnci su campionau de s'Eccellenza de su duamilla e dexi \ duamilla e undixi; impari a is de su Castiadas, de su Tortolì, de su Vecchio Borgo de Sant'Elia, torra cun is de su Ceriaxius, cun is de su Carloforte e cun is de s'Arbus.
Is de su Cus Cagliari, chi est sa scuadra pesada de s'universidadi de Castedhu, faint invecias sciri chi ant a sighiri a donai is crais de sa scuadra me is manus de Claudio Meloni, s'allenadori chi at trabballau impari a is piciocus me is ùrtimus mesis. Is castedhaius iant fatu domanda po ndi artziai (cun cussus chi in italianu tzerriaus "ripescaggi") in su campionau de sa Promotzione, ma no nc'est stètiu nudha de fai e diaici s'agatant a curri torra in su campionau de Primu Categoria. Sa bidea est cussu de arribbai me is primus postus de sa lista, ma ant a serbiri atrus giogadoris po binci, e pròpriu po custu in domu de is universitàrius funt trabballendi po acabbai de ndi pesai sa rosa.
Afrodhiu mannu, invecias, in domu de is de sa Verde Isola, sa scuadra de Carluforti, chi nd'est artziada in Primu Categoria gràtzias a cussus chi in italiani naraus ripescaggi. Is giallu-birdis, intzandus, no perdint tempus e agatant subbitu s'acòrdiu cun su difensori Paolo Uccheddu, nasciu in su milli e noicentus otanta-seti, e cun Matteo Cosa, nasciu in su milli e noicentus noranta-cincu. Totu e duus is piciocus ant giai giogau impari cun is camisedhas de is de su Crabònia, de s'Arbus e de sa Monteponi de Bidd'e Cresia. Uccheddu at giogau puru impari a is de su Gùspini, me is partidas de su campionau de s'Eccellenza chi si funt giogadas tra su mesi de Abrili e su mesi de Làmpadas.
Arribbant novas de importu mannu puru de is de su Badesi, chi ant a sighiri a trabballai impari a s'allenadori Matteo Serra; su portieri at a essi torra Simone Deliperi, unu de is prus fortis chi nci funt in dì de oi in Sardìnnia, chi s'annu passau at agiudau is de sa Torres cumenti a "preparatore dei portieri", diaici dhu tzerriaus in italianu. Ant a giogai po un antru annu in su Badesi su capitanu Salvatore Orra, s'atacanti Michele Moretti, su centrucampista Matteo Piana, su difensori Musa Jatta e is fradis Pinna. Po su chi pertocat is facis nobas, dhi naraus diaici, nd'arribbant Piergianni Spezzigu, nasciu in su milli e noicentus noranta-noi, chi at giogau me is ùrtimus mesis in su Valledoria; Matteo Secchi, unu difensori nasciu in su duamilla, chi iat giai giogau cun is de su Tergu, de su Valledoria, de su Sorso e is nugoresus de sa Nuorese; Gavino Fiori, nasciu in su milli e noicentus otanta-ses, unu difensori de grandu esperièntzia chi at giogau impari a is de su Bonorva, a is de su Buddusò, cun is tattaresus de su Li Punti, cun is de s'Ulumedu e cun is de su Santu Tiadoru; Roberto Pala, nasciu in su milli e noicentus otanta-ses, un atacanti chi nd'arribbat apustis de is esperièntzias cun is camisedhas de su Sènnaru, de s'Ilva de La Maddalena, de su Tempiu, de su Buddusò e de su Sorso.

 

Attività realizzata col contributo della Regione Sardegna. IMPRENTAS 2020-2021. LR 22/2018 art. 22