Is scuadras sardas de bòcia currint concas a sa stagioni de su duamilla e binticincu - duamilla e bintises

E duncas, atacu a scriri custus fueddus candu seus lòmpius (e gràtzias a Deus ca su tempus sighit a curri, sighit a passai po mei puru...) a su bintunu de su mesi de agustu, e fintzas a immoi si iat a podi narai chi est andendu totu beni: basca gei megat a ndi fai ancora, e meda puru, e custa iat a podi essi una nova bona, mescamente po totus is turistas chi nci funt in s'isula in dì de oi, e mescamente po is chi nd'ant a arribbai me is diis e me is cidas de su benidori, a su mancu fintzas a candu no at a acabbai, no at a spaciai s'istadi po su chi pertocat su duamilla e binticincu. 

Sa basca manna chi est sighendi a fai, invècias, iat a podi essi una nova lègia (ddi naru diaici, mancai is novas lègias, lègias diaderus, iant a podi essi atras...) po totus cussus chi depint trabballai, po totus cussus, duncas, chi no funt ancora andaus in vacantza e po cussus ca, mancai, cumenti est sucèdiu a mei, de su restu, is vacantzas ddas ant spaciadas. 
E po su chi mi pertocat, e gràtzias a Deus (m'acudu a narai), mi seu potziu pigai unu pagheddeddu de pàsiu, est a narai su tanti de tempus chi seu arrannèsciu a mi pigai po studai sa conca, cumenti si narat, e po torrai a carrigai is fortzas e is energias (chi mi permiteis de manigiai custus fueddus, a su mancu, isperendi ca su chi seu circhendi de si contai potzat benni a essi craru), ca de su restu, po torrai a incumentzai cun sa stagioni nova, chi at a essi, mi parit bastanti craru, cussa de su duamilla e binticincu – duamilla e bintises, mancant feti una parighedda de cidas. E duncas, at a tocai feti abertai chi ndi brintit su mesi de Cabudanni e intzandus, nc'eus a essi, cun totus is scuadras prontas po si bivi atrus noi mesis de partidas, de spàssiu, de gol e de ispantus. 

Cumenti eis a podi cumprendi a solus, is cosas chi nci funt de si torrai a contai, e chi pertocant, est craru, su mundu de is giogarodis diletantis chi nci funt in s'isula, no funt pagus, ca giai giai, cumenti si narat, no sciu de innoi incumentzai (ca parit una brulla, chi dda pongiu diaici, ma a sa fini est sa beridadi). 

In s'interis chi si scriu, in s'interis chi scriu custus fueddus e custu artìculu, duncas, totus is scuadras chi ant a curri me is campionaus chi sigheus cun su Diàriu Sportivu (e megu a chistionai, duncas, de is scuadras sardas chi ant a batallai in su campionau de sa Sèrie D, passendo, est craru, po is scuadras chi ant a curri in su campionau de s'Ecellenza, e me is duas listas de sa Promotzioni, puru, e fintzas a arribbai a is scuadras chi ant a fai parti de su campionau de sa Primu Categoria, e de sa Segunda Categoria, chi est su campionau prus piticheddu, ddi naraus diaici, tra totus cussus chi sigheus, dònnia dì, po totu is nois mesis de giogus) funt acabbendi de cuncodrai is rosas cosa insoru: est a nai ca funt sparendi is ùrtimus cropus (chi mi permiteis de manigiai custus fueddus e chi mi permiteis, duncas, de giogai unu pagheddeddu, ma unu paghededdu feti, a fai su poeta) in sa fentana de su mercau de s'istadi, chi est una de is cosas prus spassiosas (eia, megu sèmpiri a chistionai de su mercau, deu creu ca gei si cumprendit, berus est?) de sighiri po is tifosus. 

E chi apa a tenni su tempus, mancai, eus a andai a castiai, impari, si cumprendit, cumenti funt postas is cosas, partendi mancai de is scuadras prus fortis chi ddoi funt in Sèrie D e in Ecellenza. 
Ma cumenti si naru sèmpiri, cumenti s'arrapitu fatu fatu, no sciu mai cali legas apa a pigai ainnantis de mi ponni a ddu fai; est a nai ca no sciu mai cali arrastu apa a sighiri, ainnantis de mi nci ghetai, a fundu e susu, in su chi depu fai, in su chi si depu contai. 

E duncas, po primu cosa si ia a podi contai ca sa stagioni po su chi pertocat is campionaus de s'Ecellenza e de sa Promotzioni at a incumentzai, at a partiri (cumenti sucedit de una bella pariga de annus, a fai beni is contus) a sa metadi de su mesi de Cabudanni, est a nai su catodixi; is campionaus de sa Primu Categoria e de sa Segunda Categoria, invècias, cumenti a dònnia annu de su restu (e sa cosa toga de sa vida, mi parit de podi narai custu puru, po giogai a fai unu pagheddeddu su filosofu puru, e no feti su giornalista sportivu, est ca is cosas torrant a s'arrapiti, annu po annu, sèmpiri agualis), ant a incumentzai duas cidas prus a tradu, est a nai, duncas, in s'ùrtimu fini de cida de su mesi de Cabudanni (e parit una brulla, su de chistionai de s'ùrtimu fini de cida de su mesi de Cabudanni candu no ndi seus ancora bèssius de su mesi de agustu, ma chi su Cielu at a bolli custu beni po mei, e po bosatrus puru, est craru, gei nci dda eus a fai a ndi bessiri aforas de custa istadi puru, chi est cussu chi isperu, a su mancu), chi at a essi cussu de su bintotu. 

E seu contendusì custas cosas po si fai a cumprendi, tanti po incumentzai (ca de calincuna parti apa a depi incumentzai, mi megu a solu a solu) ca teneus bastanti tempus po podi castiai, impari, e po podi arrexonai (sèmpiri impari, si cumprendit) apitzus de totus is novas chi pertocant is campionaus. 

Po su chi pertocat is partidas de sa Copa Italia, invècias, is giogus ant a torrai a partiri pròpriu custu fini de cida chi est arribbendindi, est a narai su binticincu de su mesi de agustu, a su mancu custu at a balli po is scuadras sardas chi currint in su campionau de sa Sèrie D (a partiri, duncas, de is de su Budoni e de is de su Muristeni, chi, cumenti s'eis arregodai mellus de mei puru, funt arribbadas me is primus dus postus de sa lista po su chi pertocat su campionau de s'Ecellenza de s'annu passau. E chi no fessit diaici, deu seu innoi a fai custu trabballu pròpriu, e  puru, po s'arregodai cumenti funt cuncodradas is cosas po sa stagioni de su duamilla e binticincu – duamilla e bintises). 

Is scuadras de sa Promotzioni e de s'Ecellenza, invècias, ant a depi abertai feti una cida, feti seti diis, duncas, ainnantis de torrai a ndi cabai in campu, cun is partidas de sa Copa Italia chi ant a torrai a incumentzai in s'ùrtimu fini de cida de su mesi de agustu, in su dominigu chi at a essi su de su trintinu, s'ùrtima dì, tra is atras cosas, de su de otu mesis de s'annu.

E mancu malli, ddu torru a arrapiti ca de seguru mabi no fait, ca su tempus sighit a andai ainnantis, ca cun totus is arroris chi s'omini est bonu a cumbinai, cun totus is arroris chi s'omini ndi pesat in custu mundu, a bortas mi benit de pentzai ca seus basaus de sa bona sorti, e de sa fortuna, a podi ancora chistionai de bòcias e de campionaus. 
Chi fadeus su contu de totus is gherras, de totus is dannus chi nci funt in custu mundu dònnia dì, eia, de totus is arroris chi si ndi proint in conca (e si ndi iant a podi proi in conca) mi intendu basau de sa bona sorti a podi chistionai, impari a bosatrus, de su mercau de is giogadoris, de partidas, de gol, e de is listas de is campionaus. 
E cumenti mi praxit a fai me is artìculus chi ndi pesu in sardu (e mescamente in su sardu chi si chisionat, chi si fueddat in su Campidanu de mesu), circu de nci stichiri, in mesu a is chistionis chi pertocant su mundu de sa bòcia, puru una pariga de novas chi mancai nd'arribbant de su restu de su mundu (chi mi permiteis de fai custu giogu cun is fueddus, e chi cumprendeis su chi si bollu narai), o mancai, ballit aguali, mi praxit a nci stichiri calincuna lega chi, mancai, cun su giogu de sa bòcia (chi est sa lega de importu prus mannu po su giàssu de su Diàriu Sportivu, e deu creu ca si cumprendat beni) nci brintat pagu e nudda, ma a sa fini ddu scieis beni cumenti dda pentzu: su de depi scriri, po su prus, apitzus de is partidas, de is scuadras de bòcias, de is resultaus e de is campionaus no mi iat a depi fai tupai is ogus, e is origas; est a nai ca in s'interis ca deu chistionau de su giogu de su càlciu (custu est su trabballu cosa mia, de su restu, e po custu trabballu, po su de tenni custu trabballu, po ddu narai mellus puru, torru gràtzias a su Cielu dònnia dònnia dì, e torru gràtzias, puru, po totus is personas, is collegas cosa mia chi trabballant impari a mei, chi su Cielu ddus potzat mantenni sanus e prexaus), in su restu de su mundu (ma sa chistioni ballit puru e mescamente po s'isula stimmada cosa nosta, chentza de si ndi andai tropu atesu, duncas) sucedint, e sighint a sucedi, cosas bonas e cosas lègias. 

E duncas, m'acudu a si narai ca custa istadi apu fatu duus mesis aforas de sa Sardìnnia, chentza de telefunu e duncas chentza de podi sciri totu su chi fiat sucedendi in s'isula stimmada cosa mia. 
E pròpriu sa dì ca seu torrau in s'isula (fiat sa primu dì de su mesi de agustu, tra is atras cosas) seu bènniu a sciri, de unu tziu, in s'interis chi abertammu su trenu in Tattari po mi ndi torrai innoi in Bidd'e Sorris, e duncas in su Campidanu de mesu, ca in su mesi de Lampadas, ma mescamente in su mesi de Treulas, calincunu gèniu (mi benit de ddu tzerriai diaici, mancai su fueddu chi mi benit in conca, su fueddu chi ia a bolli manigiai siat un antru) at pentzau beni (su dimmoniu duu currat, cumenti si narat in bidda mia etotu) de ponni fogu. 
E duncas, seus arribbaus torra a chistionai (po fortza) de unu de is dannus prus mannus chi pertocant s'isula cosa nosta, e sa storia andat ainanntis, gei ddu eis a cumprendi, gei ddu eis a sciri mellus de mei puru, de annus e annus; e duncas, cust'annu puru funt sparessias (est a nai: abruxadas) zonas e zonas tra is prus bellas chi tenestus in Sardìnnia (e intendu unu dabori forti a depi manigiai su verbu a su tempus passau, chi cumprendeis su chi seu circhendi de si narai), e chi immoi no nci funt prus: su fogu si nci papat, in una pariga de minudus, fortzis feti in una mes'ora, su chi sa natura nd'at pesau in centu annus, chi no calincuna cosa de prus puru. 
E megu a chistionai, megu a pentzai, po nd'arremonai unu, a Punta Molentis, unu de is logus de mari prus stimmaus (de is turistas, est craru, ma de is sardus puru) chi nci funt acanta de Crabonaxa, e chi immoi, invècias, no esistint prus, ca su fogu, de su restu, fait custu trabballu: ndi sciusciat a terra totu, matas e domus, chentza nesciuna pietadi. 
E dònnia borta, mi parit una cosa de macus: feti unu macu, difatis, podit arribbai a abruxai su logu innoi bivit. 
E si biri, mi megu a solu a solu, ca a calincunu de nosu (chistionu de nosu sardus, si cumprendit, berus est?) ddi praxit prus a bivi in su desertu. 
E su chi mi timu de prus est ca, chi sigheus diaici (cumenti mi parit de podi narai), in su giru de una pariga de annus (chi mi permiteis de imboddiai sa chistioni diaici, cun custus fueddus), de s'isula stimmada cosa nosta, ca fintzas a centu annus fait depiat a essi una perda de oru in su mari, unu paradìsu, at a abarrai feti s'arregodu, feti is cartolinas: po su restu, nc'at a essi feti su desertu, su nudda, o, chi si praxit de prus cumenti sonat: s'inferru. 

E mi parit, diaderus, una cosa de macus chi calincunu arribbit a ponni su fogu a su logu innoi bivit, e mi parit una cosa de macus ca, apustis de annus e annus innoi, in s'istadi, intendeus sèmpiri sa pròpriu cantznoni (est a narai: sa Sardìnnia est pighendi fogu), nesciunu siat ancora arrannèsciu a agatai unu modu po avitai ca custas cosas sucedant. E deu abarru, no nc'eis a crei, po una borta, chentza de fueddus. 

E mancu malli, mi megu a solu a solu candu arribbu, candu m'agatu a arraxonai apitzus de cosas lègias e marigosas cumenti a custas, ca su trabballu cosa mia pertocat feti (e naru feti po modu de narai) is campionaus de bòcia de is diletantis. 

E duncas, no potzu fai atru, po custu mengianu (e ddu sciu deu puru chi est una cosa chi no si iat a depi fai...), de augurai dònnia gènia de mabi, dònnia gènia de dabori a cussus disisperaus (m'est beniu de manigiai custu fueddu, ma cussus chi tèngiu badda badda in conca funt peus puru, si ddu torru a narai) chi ant pentzau beni de abruxai is logus (calincunu at postu fogu puru innoi acanta de Bidd'e Sorris puru, e custa puru est una cantzoni, lègia meda, chi intendu de una bella pariga de annus, fintzas tropus) innoi biveus totus. 
Ca sa cosa lègia, deu creu, est pròpriu custa (e cun custa dda serru puru e diaici dda acabbu de mi pigai totu custu febi): chini ponit su fogu a su logu no est abruxendi feti domu cosa sua (chi unu ponessit su fogu feti in domu sua, mancai, nci iat a essi prus pagu de murrungiai), ma est abruxendi, mi parit bastanti craru puru, sa domu de is atrus, sa domu de is fillus, de is nebodis, sa domu de totus cussus chi ant a arribbai in cust'isula (e megu a chistionai de totus cussus chi ant a nasciri in custa isula me is annus chi ant a benni puru, e duncas in su benidori, cumenti si iat a podi narai, e sèmpiri chi su Cielu at a bolli custu beni po nosu). 

E feti arraxonendi apitzus de custas cosas, podeus cumprendi beni de su dannu mannu chi si nd'arribbat dònnia borta chi calincunu gèniu (eia, torru a manigiai custu fueddu) pentzat, beni, de allumiai sartus e padentis. 
E ancora abarraus innoi, apustis de annus e annus, a circai de cumprendi cali funt is motivus (chi nci funt motivus futus, e deu creu pròpriu de nou) chi portant una persona a tenni su disigiu de ponni fogu a unu logu: fortzis sa sàngia (po manigiai unu fueddu, diaici fadeus unu pagheddeddu de gramatica puru, ca mabi de seguru no fait, chi apu sèmpiri intèndiu narai, a su mancu innoi in bidda, e mescamente, pruschetotu candu fia unu pipieddu e andammu a is scolas medias), fortzis s'imbìdia, fortzis su dinai (bai e circa chi calincunu nd'at a pesai calincunu arriabi po su de fai unu trabballu diaici malu, tontu e fintzas pudèsciu, mi benit de ddu narai diaici, a su mancu). 

E seu seguru ca estus a podi abarrai innoi a nd'arrexonai impari po oras e oras, chentza de agatai nesciuna arrespusta, ca a bortas sa tontesa chi s'omini tenit in sa conca sua (sa miseria chi tenit in s'anima, si iat a podi narai diaici puru) est chentza fundu, cumenti m'est bèniu de scriri. 

E cumenti s'apu narau ainnantis, giai giai immubagora, fortzis est mellus, po diaderus, chi si nci fuiaus (chi si nci fuiaus a fundu e susu, cumenti si narat in Bidd'e Sorris) me is chistionis chi pertocant, de acanta, su giogu de su càlciu po cumenti est cuncodrau in Sardìnnia, ca giai nc'est basca (eia, oi puru, chi est su bintunu, gràtzias a Deus parit ca su sobi siat imbuddidendi po beni totu su logu) e nc'ammancat feti de si pigai totu custu febi ca, cumenti eis a sciri mellus de mei puru, fait benni ancora prus basca (candu unu est nervosu, eia, ddi parit totu ca su sangui cosa sua siat totu buddi buddi aintru de is venas). 

E duncas, chi seis de acòrdiu cun mei, deu ia a partiri andendi a castiai cali funt stètias is scuadras chi funt stètias torradas a piscai (seu circhendi de furriai, in sardu, su fueddu ca in italianu sonat cumenti a: ripescata). 
Eia, si nd'eis a arregodai, duncas (e chi no si ddu arregodais no depeis timi de nudda, ca deu seu innoi, puru e pròpriu, po si torrai a arregodai cumenti funt cuncodradas is cosas) ca eus serrau is contus (e is artìculus) cun sa stagioni de su duamilla e binticuatru – duamilla e binticincu chistionendu de is ùrtimas partidas chi si funt giogadas, e chi pertocant is play-off (po dda narai a sa moda ingresa), e chi funt is partidas chi si giogant tra totus is scuadras chi funt arribbadas a su segundu postu de sa lista de is campionaus cosa insoru. 

E duncas, cumenti eis a sciri giai, cumenti s'eis a arregodai, custas partidas serbint mescamente po scerai is scuadras ca apustis ant a benni torradas a piscai, cumenti est sucèdiu. 
Custu bollit narai, mi parit bastanti craru (ma no si sciit mai, e duncas si ddu torru a spiegai, a bortas chi calincunu de bosatrus, o fintzas calincuna de bosatras no si ddu siat scaresciu), ca impari a is scuadras chi ant bintu is campionaus cosa insoru, e chi funt arribbadas duncas a su primu postu de sa lista, nd'ant cassau su sartidu de categoria (s'artziada de categoria, cumenti si iat a podi narai) puru cussas scuadras chi funt arribbadas me is primus postus, apustis de essi giogau is partidas de is play-off. 

E duncas, andaus a biri cumenti funt cuncodradas is cosas. 
Po immoi si potzu narai, feti, in prus de su chi s'apu narai immubagora, ca sa nova cun is nominis de is scuadras chi funt stetias torradas a piscai nd'est bessida aforas su seti de su mesi de agustu (su seti de custu mesi etotu, duncas), candu is dotoris chi sighint is fainas (e chi trabballant) de su Consillu Diretivu de su Cumitau Regionali, apustis de is atobius chi nd'ant pesau su cincu e su ses (e seus chistionendi, est craru, sèmpiri de su mesi de agustu), ant decìdiu, apustis de nd'essi arraxonau po beni, de ndi pesai is duas listas chi pertocant su campionau de sa Promotzionu cun dexiotu scuadras (e duncas, a fai is contus nci poneus pagu meda, benint a essi trintases scuadras in totu po su chi pertocat is giogus de sa Promotzioni), ca fiat, de su restu, su pròpriu tanti de scuadras chi nci fiant s'annu passau etotu. 
E duncas, eia, si iat a podi narai, po incumentzai, ca tra s'annu passau e cust'annu no nci funt novas de importu (est a nai, mellus, ca tra sa stagioni de su duamilla e binticuatru – duamilla e binticincu e tra sa stagioni de su duamilla e binticincu – duamilla e bintises, chi est cussa chi est giai giai po partiri, no est mudau nudda. Est a narai, duncas, ca is cosas funt abarradas agualis, a su mancu po su numeru de is scuadras chi ant a curri in su campionau). 

E duncas, fadendi su contu de totus is scuadras chi ndi funt depias cabai de categoria (in Promotzioni funt stètias tres in dònnia lista, e duncas, ses in totu), is de su Cumitau ant dèpiu torrai a piscai cuatru scuadras tra cussas chi iant serrau sa stagioni a su segundu postu in sa lista in su campionau de sa Primu Categoria de s'annu passau. E po essi prus pretzisus, puru, depeus acudi a narai, puru, ca is de sa Cos, chi funt arribbaus a is ùrtimus postus me in su campionau de sa Sèrie D de s'annu passau, funt stètius piscaus torra po curri, ancora (e seus prexaus po issus, est craru), in su campionau de sa Sèrie D, e custu bollit narai, tra is atras cosas, ca is de su Sant'Aleni de Cuartu funt arrannèscius a ndi artziai in su campionau de s'Ecellenza. 

E duncas, apustis de totu custu chi s'apu contau, is de su Comitau ant decìdiu de ndi fai artziai in su campionau de sa Promotzioni is de su San Giorgiu de Peifugas (chi funt stètius segurus de podi giogai in su campionau de sa Promotzioni, e duncas funt stètius segurus de ndi cassai s'artziada de categoria, apustis chi ant scipiu ca is de su Sant'Aleni ndi fiant artziaus in Ecellenza), e impari a issus, ant a giogai in su campionau de sa Promotzioni po su chi pertocat su duamilla e binticincu – duamilla e bintises is de sa Frecia Parte Montis de Mòguru, chi iant pèrdiu sa partida finali (e seus chistionendi de is play-off, est craru berus?) pròpriu contras a is de su San Giorgiu de Peifugas, is de sa Baunese, chi ant serrau is play-off a su de tres postus in sa lista, e fintzas is casteddaius de su Vecchio Borgo Sant'Elia (chi ant serrau is play-off a su de cuatru postus in lista). 

Arribbaus chi seus a custu puntu de sa chistioni, si potzu narai, puru, ca po su chi pertocat su campionau de sa Primu Categoria, nc'ant a essi torra, po cust'annu puru (cumenti est sucèdiu, de su restu, in totus custus ùrtimus duus-tres annus), cuatru listas cun sexi scuadras in dònnia lista. 
E duncas, po su chi pertocat sa Primu Categoria puru, is de su Cumitau ant torrau a piscai is de s'Academia Sulcitana, impari a is de su Sorso 1930 (chi iat pèrdiu sa partida finali de is play-off), a is de su Macumere, a is de su Biddamanna de Strisaili e impari a is de su Supramonte de Orgòsolo. 
Po su chi pertocat sa Segunda Categoria, invècias, po immoi, po oi, si potzu contai feti ca nc'ant a essi otu listas, cun calincuna cosa cumenti a catodixi scuadras in dònnia unu, po seti partidas a sa cida. E si potzu narai puru, duncas (ma de sa cosa nd'eus a chistionai mellus in su benidori, custu est pagu ma seguru, fadendi su contu ca is giogus de sa Segunda Categoria ant a partiri po ùrtimus, impari a cussus de sa Primu Categoria etotu, ma feti in s'ùrtimu fini de cida de su mesi de Cabudanni, sèmpiri chi su Cielu s'at a fai lompi a sa fini de su de noi mesis de s'annu puru, e isperendi ca in s'interis, diaici m'acapiu torra a cussu chi s'apu contau ainnantis, nesciuna de is personas chi bivint in s'isula tengiat sa bidea bona, e megu a brullai, de torrai a ponni fogu a su logu), ca cust'annu, a su mancu po su chi pertocat su campionau de sa Segunda Categoria, no nc'ant a essi scuadras chi ant a abarrai a castiai is atras: est a nai, duncas, ca, chi si ddu arregodais (desinò nci pentzu deu a si arregodai torra cumenti fiant cuncodradas is cosas in su passau, est a narai, in su campionau de s'annu passau, chi fiat cussu de su duamilla e binticuatru – duamilla e binticincu, mi parit bastanti craru) s'annu passau dònnia cida nci fiant seti partidas, cun una scuadra chi peròu si depiàt pigai unu dominigu de pasiu, ddi naraus diaici, e custu siat in sa lista de partidas chi balliant po s'andada (cumenti seus costumaus a ddas tzerriai) e puru, mi parit bastanti craru, po su chi pertocat is partidas de sa torrada. 

E custu bollit narai (po manigiai atrus fueddus) ca po su chi pertocat su campionau de sa Segunda Categoria, a su mancu (ma sa chistioni ballit puru po is scuadras de s'Ecellenza, de sa Promotzioni e puru po is scuadras chi ant a curri in su campionau de sa Primu Categoria), totus is scuadras nd'ant a cabai in campu dònnia fini de cida, de su mesi de Cabudanni e fintzas a arribbai, cumenti a dònnia dònnia annu, de su restu, fintzas a su mesi de Maju (ma de custu nd'eus a torrai a chistionai mellus, mancai, candu ant a bessiri is calendàrius, cumenti ddus tzerriai, ma nc'est de crei, in dì de oi, chi est su bintu de agustu, chi nc'at a passai a su mancu un antru mesi ainnantis de sciri calincuna cosa de prus). 

E immoi chi seus arribbaus a custu puntu de sa chistioni, deu creu ca sa cosa mellus chi si potzat fai, chi podeus fai, est cussa de andai a castiai, impari (fadendi su contu ca s'apu giai mesu arremonau sa cosa) cumenti funt cuncodradas is listas de is campionaus ca eus a sighiri, po cust'annu puru (sèmpiri chi su Cielu at a bolli custu beni po nosu, po mei e duncas po bosatrus), cun su giàssu de su Diàriu Sportivu: e duncas, eia, deu pentzu ca si potzat incumentzai andendi a castiai cumenti funt cuncodradas is cosas po su chi pertocat s'Ecellenza, e apustis eus andai a castiai cumenti is dotoris de sa Lega Natzionali de Diletantis de sa Sardìnnia ant pesau is listas po su chi pertocat sa Promotzioni, e diaci, apustis, eus a sighiri cun is listas de sa Primu e de sa Segunda Categoria. 

Po su chi pertocat sa Sèrie D, invècias, fadendi su contu ca ant a essi is primus a torrai a partiri cun is partidas, giai de custu fini de cida chi est arribbendindi, nd'eus a chistionai mellus, mancai, sa cida chi at a benni (in s'artìculu chi nd'at a bessiri aforas tra seti diis, duncas); e podeis pigai custa cosa chi s'apu narau pròpriu immubagora, chi apu scritu pròpriu immoi, cumenti chi fessit una promissa; e gei ddu scieis cumenti andant is cosas, e scieis puru cumenti seu fatu deu po is chistionis chi pertocant su trabballu cosa mia: e duncas, chi si promitu una cosa, mi praxit a dda fai. 
E duncas, eia, is tifosus de is scuadras sardas chi ant a curri in su campionau de sa Sèrie D po su campionau de s'annu duamilla e binticincu – duamilla e bintises ant a depi tenni unu pagheddeddu de passièntzia, ca est una de is cosas de importu prus mannu (eia, megu a chistionai de sa passièntzia), chi nci funt in custa vida. 

Ma torras a nosu, duncas, e a is chistionis acapiadas a su campionau de s'Ecellenza. 
E duncas, eia, cumenti s'apu giai arremonau ainnantis, cust'anni in su campionau prus mannu chi teneus in s'isula (su campionau de importu prus mannu tra cussus chi si giogant in s'isula, po ddu narai mellus puru) ant a curri sexi scuadras in totu, e po primu cosa tocat a narai, puru, ca is de su Barisardo ant tentu strobbus mannus, e duncas no si funt iscritus po curri po su campionau de cust'annu, e si dispraxit meda, mancai, in dì de oi, deu no potza sciri ita totu est sucèdiu, ma mancai apa a scoberri calincuna cosa me in custas oras etotu e si nd'apa a chistionai torra de sa cosa me is cidas chi ant a benni. 
Po oi si potzu narai ca, eia, sa vida de una scuadra de bòcia, a bortas, est giai giai aguali a cussa de una persona: oi stais beni e curris allirgu, cras mancai no nci ses prus. 
Ca su de tenni, su de mantenni in peis un assòtziu de bòcia no est una cosa facili, e si cumprendit beni, cun totus is cosas chi ddoi funt de sighiri. In prus, cumenti s'apu giai arremonau ainnantis, is de su Cos, ca nd'ant buscau sa cabada de categoria, poita s'annu passau funt arribbaus me is ùrtimus postus de sa lista de su campionau de sa Sèrie D, funt stètius torraus a piscai e duncas, antzis ca giogai e curri in su campionau de s'Ecellenza, cumenti ddis iat essi tocau de fai, ant a giogai, torra, in su campionau de sa Sèrie D. E seus prexaus po issus, mi parit bastanti craru puru. 

Duncas, is scudras chi ant a curri in su campionau de s'Ecellenza po s'annu duamilla e binticincu – duamilla e bintises funt: is de s'Atletico de Uri, chi ndi funt cabaus (mellus puru: funt torraus) in Ecellenza pròpriu cust'annu, apustis de una bella pariga de annus chi ant fatu in su campionau de sa Sèrie D; is de su Uddusò, ca invècias ant bintu su campionau de sa Promotzioni, in sa lista B, e nd'ant cassau, in campu, si cumprendit beni, sa possibbilidadi de curri in su campionau prus mannu chi teneus in Sardìnnia, e immoi eus a biri cumenti si dda ant a gherrai. In su campionau de s'Ecellenza ant a curri puru is de su Lanusè, impari a is de su Tortolì, chi funt arribbaus a su segundu postu in su campionau de sa Promotzioni de s'annu passau po su chi pertocat sa Lista A e chi funt stètius piscaus torra, apustis de essi arribbaus a su segundu postu me is partidas finalis (cussas chi tzerriaus play-off, a trassa de is ingresus). 
E sigheus diaici, mancai, cun is scuadras chi ant a curri in su campionau de s'Ecellenza: e agataus, duncas, is de su Crabònia, is de su Calanzanos, is casteddaius de sa Ferrini (ca funt de domu, ddi naru diaici, in su campionau prus mannu chi si giogat in s'isula), is de s'Igrèsias, is de s'Ilva de Sa Maddalena, is de sa Nuorese (chi cust'annu nd'ant pesau una rosa, una scuadra toga meda, ma de custu, mancai, nd'eus a chistionai mellus me is cidas chi ant a benni), is de sa Polisportiva Ossese (sa scuadra, si cumprendit, chi nd'ant pesau in Ossi e chi currit in su campionau de s'Ecellenza de unu bellu arrogu de tempus), is de su Santa Teresa de Gallura (o sa scuadra de su Longone, cumenti si narat, mellus puru, in sardu); is de su Sant'Aleni de Cuaru (chi pròpriu s'annu passau ant bintu is partidas finalis, is play-off, po su chi pertocat sa Promotzioni); is de su Taloro de Gavoi, is de su Tèmpiu e is de su Crabonaxa. 

Cumenti s'apu giai arremonau, duncas, is giogus, est a narai su campionau po s'annu de su duamilla e binticincu – duamilla e bintises, e seus sèmpiri chistionendi, est craru, de su campionau de s'Ecellenza, ant a torrai a partiri su catodixi de su mesi de Cabudanni, tra prus pagu de trinta diis, duncas. 

E immoi chi nci seus, podeus andai ainnantis cun custa lega etotu, cun sa chistioni chi eus pigau, e podeus castiai cali funt is scuadras, invècias, chi ant a curri in su campionau de sa Promotzioni, chi po cust'annu puru est stètiu prètziu in duas listas. 
Po su chi pertocat sa Lista A (chi est cussa chi pertocat is scuadras chi ddoi funt in su Sud de sa Sardìnnia, ddi naru diaici, isperendi chi si cumprendat), duncas agataus: is de s'Arborea (chi, po cust'anni puru, ant'essi sighius de Battolu, e  incumentzu a si ddu arremonai, ma deu creu ca de sa cosa, e duncas, de totus is novas chi nd'arribbant de su mercau, nd'eus a chistionai mellus me is cidas chi ant a benni); is casteddaius de s'Atleticu, is de sa Baunese (chi funt arribbaus a su segundu postu a is pabas de su Cannonau de Jerzu in su campionau de sa Primu Categoria de s'annu passau), chi funt stètius piscaus torra, is de su Calcio Pirri, is de su Cannonau de Jerzu, chi apu arremonau pròpriu immubagora e chi ant essi sighius, po cust'annu puru, de un allenadori bravu cumenti a Andrea Piccarreta; is de su Castiadas, is casteddaius de su Cus (chi est, si ddu arregodu, sa scuadra chi nd'ant pesau is de s'Universidadi de Casteddu); is de sa Frecia Parte Montis, chi funt stètius piscaus torra, fadendi su contu ca s'annu passau ant serrau su campionau, e duncas sa stagioni de su duamilla e binticuatru – duamilla e binticincu a su segundu postu, a is pabas de is de su Samugheo); is de su Guspini, is de s'Ovodda (chi ant a sighiri a curri, est a narai, a trabballai cun Manuel Moro sètziu in sa panchina de sa scuadra), is de su Samugheo (chi apu arremonau pròpriu immoi); is de su Ceraxius; is de su Terraba Frantziscu Bellu, is aristanesus de sa Tharros, is de su Tonara, is de s'Uda, is casteddaius de su Vecchio Borgo Sant'Elia, chi funt stètius piscaus torra de sa Lista A de su campionau de sa Primu Categoria; e serraus is contus po su chi pertocat sa Lista A de su campionau de sa Promotzioni cun is cidresus (diaici ddus tzerriaus, a su mancu, diaici ddus tzerriaus innoi in Bidd'e Sorris, fadendi su contu, in prus, ca is duas biddas abarrant a calincuna cosa cumenti a binti chilometrus s'una de s'atra) de sa Villacidrese. 
Po su chi pertocat sa Lista B, e megu a chistionai, deu creu chi siat bastanti craru, sèmpiri de su campionau de sa Promotzioni, intzandus agataus: is de s'Alghero (sa scuadra prus manna, ma no est s'ùnica, est craru, chi nd'ant pesau in sa citadi de s'Alighera); is de s'Altzaghena, is de s'Atleticu de Bono, is de su Bonorva, is de su Bosa, is tattaresus de su Campanedda (chi s'annu passau nd'ant cassau sa bìncida de su campionau cosa insoru, gràtzias a una stagioni toga, ma toga meda), is de su Casteddusardu, is de su Coghinas, is de su Ilartzi (chi ndi funt cabaus in Promotzioni apustis de unu bellu arrogu de tempus chi ant fatu in su campionau de s'Ecellenza); is de su Li Punti (torra, issus puru, in su campionau de sa Promotzioni, apustis de una bella parighedda de annus, parighedda a sa sarda, si cumprendit, chi ant fatu currendi in su campionau de s'Ecellenza); is de su Logusantu, is de sa Macumerese, is de s'Ozierese de Otieri, is de su San Giorgiu Peifugas (chi ant serrau sa stagioni de s'annu passau a is pabas de is de su Campanedda etotu, ma chi funt stètius bonus a ndi cassai su sartidu de categoria gràtzias a is ùrtimas partidas, cussas de is play-off, chi ant giogau beni meda); is de su Istintinu, is de su Thiesi (piscaus torra issus puru, a trassa, pròpriu, de is de su San Giorgio de Peifugas); is de su Tuttavista de Gartellì e, serraus sa lista, is de s'Usinese, chi funt circhendi, e custu giai de una bella pariga de annus, de binci su campionau e de ndi cassai s'artziada in su campionau de s'Ecellenza, ma po immoi no nci funt ancora arrannèscius, e eus a biri, duncas, cumenti ant a andai is cosas cust'annu. 

Su chi podeus giai narai, est chi, a su mancu diaici si parrit, at a essi unu campionau bellu, togu, e spassiosu meda, po su prexu de totus is tifosus, e sa chistioni, est craru, ballit po su campionau de sa Promotzioni ma puru po cussu de s'Ecellenza. 

E duncas, eia, su campionau de sa Promotzioni at a partiri sa pròpriu dì de cussu de s'Ecellenza, est a narai, duncas, su catodixi de su mesi de Cabudanni. 
E immoi, duncas, no depeus fai atru ca abertai ca is de su Cumitau de sa Lega Natzionali de is Diletantis, po su chi pertocat sa Sardìnnia, ndi boghint aforas su calendàriu cun totus is partidas. 

Sa nova prus lègia chi si depu donai, po oi, est ca su logu (e mescamente su tempus) chi tèngiu po scriri s'artìculu in sardu po sa de tres cidas de su mesi de augustu est bellu ca spaciau, ma si promitu, giai de immoi, chi eis a agatai unu bellu tanti de rigas cantu custas (chi no calincuna cosa in prus puru) tra seti diis, est a narai, cumenti a sèmpiri, de su restu, giòbia chi at a benni: e duncas, si naru giai chi eus a depi chistionai no feti de is scuadras sardas chi ant a curri in su campionau de sa Sèrie D (cumenti s'apu promitiu giai, de su restu), ma s'ammancat (m'ammancat, ca a sa fini seu deu su chi ndi depit pesai su trabballu) de andai a castiai cumenti funt cuncodradas is cosas po su chi pertocat su campionau de sa Primu Categoria (is cuatru listas de su campionau de sa Primu Categoria, po ddu narai mellus puru), e apustis (e feti apustis! Est craru) nc'at a essi, puru, de andai a castiai cumenti funt postas is cosas po su chi pertocat is otu listas de su campionau de sa Segunda Categoria, ma su tempus nc'at a essi de seguru, fadendi su contu, mescamente e pruschetotu, ca is giogus, est a narai is campionaus, de sa Primu e de sa Segunda Categoria ant a partiri torra, cumenti s'apu giai arremonau, de su restu, feti s'ùrtima cida de su mesi de Cabudanni. 

E duncas, po immoi depeus feti circai de serrai, in sa manera mellus chi podeus, su mesi de agustu, circhendi, mancai, de no si fai scallai de sa basca lègia chi ancora est fadendi. 
In s'interis, si imprassu a forti.






Attività realizzata col contributo della Regione Sardegna. IMPRENTAS 2024-2025. LR 22/2018 art. 22