Selargius ko grae meda, s'Arzachena isperat ancora, Latte Dolce faghet casi su miràculu

Mancari chi duas apant bìnchidu (Arzachena e Olbia), 1 apat paregiadu (Latte Dolce) e duas apant pèrdidu (Selargius e Budoni), sa de 32 dies de campionadu est istada pagu a favore de sas iscuadras sarda, e non solu pro ite ca diat tocare a contare ca at pèrdidu finas su Porto Torres, ma ca sos KO de su Selargius e Budoni, podent sententziare sa retrotzessione de àteras duas iscuadras isulanas in prus de cussa de sos turritanos. Infatis, sos casteddajos ant pèrdidu contras a su Palestrina, chi at superadu Latte Dolce e Budoni, faghende intrare sos gadduresos in sos playout paris a sos tataresos. Sos play out diant a pòdere èssere annullados pro sa distàntzia de 10 puntos intre sa de tres e bator ùrtimas, chi como est de 9 puntos. Custu podet acuntèssere giai dumìniga su 27, cando su Budoni at a ospitare s'Arzachena, su Selargius giogat in domo de sa Lupa Roma e su Latte Dolce at a retzire su San Cesareo. De seguru sos casteddajos e sos ismeraldinos ant a fàghere de totu pro si giogare sa salvesa a sos isparègios. Ma at a èssere difìtzile a evitare chi siant duos derby, pro ite iscuadras comente a Astrea, Anziolavinio, Sora e Isola Liri no ant a giogare intre issas; intames, Maccarese e Palestrina s'ant a pòdere giogare su bonus de su Porto Torres e at a èssere tosta a las torrare a sodigare.