S'istadi callenti in su mercau po is scuadras sardas: su Biddaxidru imprassat torra Alessio Figos, Umberto Festa at a giogai cun is de su Vecchio Borgo

De sicuru, a su mancu po su mundu de sa bòcia, s'istadi de su duamilla e binti est una de is prus strangias de sèmpiri: su campionau si nd'est sciusciau prima de s'ora e po imoi no si podit sciri candu totu is cosas s'ant aderetzai torra: nosu isperamos chi po sa mitadi de su mesi de Ladàmini is giogus potzant partiri, unu bisiu chi est cussu de totus is scuadras, puru e pruschetotu de cussas chi giogant me is campioaus de is diletantis.
In s'interis, su mercau est buddendi, dònnia dii, e mancu malli, nc'aciungeus nosus: custu bolit nai chi is presidentis nci creint ancora e funt prontus a fai atrus sacrifìcius po custu sport chi fait bessiri aforas de conca mannus e piticus.

Is casteddaius de su Vecchio Borgo de Sant'Elia, po nd'arremonai una, ant serrau is chistionis cun Umberto Festa, atacanti forti meda, de su milli e noicentus norant-unu, chi s'annu passau at bintu su campionau de sa Primu Categoria impari a cussus de su Crabonaxa.

Cussus de su Bosa, invècias, in Eccellenza, sighint a trabballai cun Tore Carboni, giogadori e allenadori de is arrubius-brau giai de su duamilla e catodixi. S'assotziu de su presidenti Salvatore Calaresu me is ùrtimus diis at pigau puru Salvatore Deriu, classi milli e noicentus setanta-noi, una vida cun sa maglia de su Bonorva, cun calincuna cosa cumenti a duxentus e otanta gol in buciaca, spratus in catodixi stagionis.

Tra is scuadras chi funt trabballendi mellus, nc'est de sicuru su Biddaxidru, chi at torrau a portai in domu un atacanti forti cumenti a Alessio Figos, s'annu passau in Eccellenza cun is de su Cràbonia. Figos, nasciu in su milli e noicentus otanta-cuatru, iat donau un agiudu mannu meda a is campidanesus giai a is tempus de sa Sèrie D, cun bintotu gol in sessanta-tres bessidas, e sa bincida de su campionau cun su sartu in Lega Pro. Figos at a giogai, tra is atrus, impari cun Mattia Cordeddu, chi nd'arribat a Biddaxidru, issu puru, a pustis de sa stagioni toga meda cun su Cràbonia.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020