S'Istintinu bincit puru contras a su Thiesi, Secchi: «Chi parò sa Lanteri no perdit mai po is play-off is cosas funt tostadas»

E cun cussa de domìnigu passau, funt cincu: cincu cumenti is bìncidas, una avatu de s'atra, boddidas de cussus de s'Istintinu me is ùrtimas cincu bessidas, una cosa mai sutzedia, in custu campionau, cun Secchi e is cumpàngius chi imoi si gosant, cun prexeri mannu meda, su duus a zero scutu a faci a is piciocus de su Tiesi, po una de is partidas prus togas giogadas cust'annu. Is istintinesus allogant diaici atrus tres puntus e sighint a curri avatu de s'Ilva de Sa Maddalena, sa primu de sa lista, chi tenit calincuna cosa cumenti a dexaseti puntus in prus de is piciocus de mister Scotto, una cosa foras de conca chi pentzaus chi in s'istadi is biancu-asullus pariant una de is scuadras prus fortis, ma agoa toccat a biri ita narat su campu, poita a bortas no abastat a tenni una biga de giogadoris bravus po binci. Sa Lanteri de Tattari, invecias, sa de tres in lista, est lòmpia a corantatres puntus, dexi in prus de s'Istintinu, a pustis de su duus a unu arregortu in sa partida contras a su Pasada.

Giovanni Secchi chistionat craru e tundu; duncas, no nc est abisòngiu miga de si cuai:
«Eus pèrdiu medas partidas in su duamilla e dexanoi, a nai sa beridadi po crupa nosta, pruschetotu; fortzis eus giogau chenza de sa gana chi serbit, chenz'e conca; fortzis pentzastus de podi binci mancai chenza de essi a su centu po centu, ma is cosas funt andadas totu in un'atra manera».
Agoa aciungit: «Contras a s'Ilvamaddalena eus pèrdiu una partida in undixi contras a dexi; issus ant fatu duus gol me is urtimus binti minudus. Contras a cussus de s'Oscherese, in sa primu bessida, eus fuliau unu puntu, poita eus fatu unu dannu mannu cun s'arrègula de is fuori quota; a Usini eus pèrdiu po unu a zeru e issus ant fatu gol cun d-unu tiru de is undixi metrus; contras a su Valledoria s'amancant meda giogadoris, conta feti chi a pustis de is primus corantacincu minudus femus giai perdendi po tres a zeru». Secchi serrat sa chistioni. «Nosu boleus fai de totu po cassai sa Lanteri, ma chi issus no perdint mai, no nc'at a essi stòria».

Attività realizzata col contributo della Regione Sardegna. LR 22/2018 art. 22, comma 2. Avviso 2019-2020