S'Italia in corantena fintzas a su trexi de Abrili; sa LND iat a bolli serrai is giogus mancai in s'istadi, ma nc'est chi narada giai ca no

Sa noba fiat boba boba in s'aria, est a nai chi totus ddu sciestus giai, ma de su Guvernu non fiat arribbau ancora nudda de uficiali. Imoi, peròu, ndi seus sigurus a su centu po centu: su “Ministru de sa Saludi”, Roberto Speranza, at cunfirmau chi sa corantena, dda tzerriaus diaici, at a sighiri (a su mancu, aciungeus nosu) fintzas a su trexi de Abrili. Pasca Manna in domu, intzandus, po is sessanta millionis de italianus. «Sa batalla est ancora longa meda» — at nau Speranza in d-unu atobiu in Senato.
Poi aciungit: «Imoi depeus aturai atentus a non fai sbàglius e, pruschetotu, a non si fait pigai de s'afroddiu, poita diaici arriscaus de arrovinai totu su bonu chi seus arrannescius a ndi pesai fintzas a imoi, in totu custu tempus».

In s'interis, abarrat sempri oberta sa chistioni, chi est cussa de importu prus mannu po chini ligit su giassu de Diario Sportivo, apitzus de su sport e de is campiònaus de bòcia.
Sa primu cosa de nai est chi, a cantu parit, nci funt duas campanas: de una parti ddoi funt cussus chi pentzant chi is giogus siant acabaus; de s'atra ddoi funt cussus chi bisant de sighiri, mancai in s'istadi, cun is partidas chi amancant, po detzidi, in campu e non aintru a un ufìciu, chini bincit e chini perdit. Su carraxu prus mannu, peròu, est chi is duas campanas funt in su campanibi de sa pròpriu cresia. Chi su presidenti de sa Lega Natzionale Diletantis, Cosimo Sibilia, po nd'arremonai unu, isperat de serrai is giogus in trinta – coranta diis, mancai in su mesi de Làmpadas e in su mesi de Trìulas, in Sardìnnia, po torrai a is contus nostus, nci funt giai scuadras chi timint chi po cust'annu no nci siat prus nudda de fai, cumenti a su Tortolì, chi currit in su Girone A de su campionau de Promozione, cun is ollastrinus chi feti una pariga de diis faidi ant fatu bessiri una lìtera oberta po sa FIGC innui s'arrexonat apitzus de totus is strobbus chi nc'iant a essi a torrai a incumentzai cun is partidas. De siguru, eus a tenni totu su tempus po ndi chistionai mellus.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020