Salta al contenuto principale
olbia calcio

Su Consillu Federali cuncodrat is règulas po serrai sa stagioni: in Sèrie C s'Olbia at a depi giogai is playout contras a is de su Giana Erminio

E duncas ariseu, lunis, s'otu de su mesi de Lampadas, nc'est stetiu s'atobiu de su Consillu Federali, in Roma, de importu mannu, nd'eus giai chistionau medas bortas, po totu su mundu de sa bòcia, partendi de sa Sèrie A fintzas a arribai a sa Secunda Categoria.

Po su chi pertocat sa Sèrie A e sa Sèrie B, ant pigau po bona sa bidea de su presidenti de sa FIGC, Gabriele Gravina: e intzandus, chi su campionau si depessit torra a firmai, intru su dexi de su mesi de Trìulas, po cruppa de cussu tiau de Covid-19, o po calecasiat atru motivu, s'ant a podi giogai is partidas de "playoff"e "playout", po decidi sa scuadra chi bincit su scudetu, po decidi puru is scuadras chi ant a giogai in Coppa sa stagioni chi benit e po decidi puru is scuadras chi nd'ant a depi cabai in sa categoria prus bascia, est a nai cussas chi tzerriasus "retrocessionis".

Po cussu chi pertocat sa Lega Pro, invècias, no ant potziu fai atru chi amitti torra chi po cust'annu is giogus funt sciusciaus: e duncas ndi atziant in Sèrie B is primas tres scuadras de is tre gironis, est a nai su Monza, Vicenza e Reggina; ndi cabant in Sèrie D invecias Gozzano, Rimini e Rieti; apustis, gratizas a is partidas de "playout" e de "playoff" s'ant a connosci puru is nominis de is atras scuadras. Tra custas, s'Olbia puru at a depi torrai in campu me is ùrtimas diis de su mesi de Làmpadas: is biancus, chi funt sa terza scuadra in lista, ma partendi de basciu, ant a depi batallai contras a is de su Giana Erminio: sa primu partida s'at a giogai a su "Bruno Nespoli", sabudu su bintiseti de su mesi de Lampadas, sa torrada invecias tres diis apustis, su martis trinta, a su "Città di Gorgonzola".

Fortzis su carraxiu prus mannu, peròu, nd'est bessiu aforas po su chi pertocat sa Sèrie D: is decisionis apitzus de is promotzionis po is primus scuadras de is listas funt stetias cunfirmadas, diaici cumenti po is retrocessionis. Nudda de fai, duncas, a su mancu po imui, po is trentun scuadras chi nd'ant pesau su comitau "Salviamoci": tra custas nc'est puru su Budoni, chi po cumenti funt is cosas oi nd'iat depi cabai in Eccellenza.

In questo articolo
Squadre:
Campionato:
Argomenti:
Stagione:
2019/2020
Tags:
Serie C