Su mesi de Ladàmini si serrat chenza giogus: in Sèrie D nudda de fai po is de su Lanusè, po su Latte Dolce, po is de sa Torres e de su Cràbonia

Cussu chi est arribendi at a essi unu domìnigu unu pagheddu sbuidu, naraus diaici, po is tifosus de is scuadras sardas de bòcia, cun is campionaus de Eccellenza, de Promozione, de Prima e de Secunda Categoria chi si torrant a studai, apustis de su lockdown incumentzau me is primus diis de su mesi de Marzu.

Su mesi de Ladàmini, intzandus, po meda genti s'at a serrai chenza prexus, e po chini fiat pentzendu, e pruschetotu isperendi, de sighiri is scuadras sardas chi currint in su campionau de Sèrie D, no nd'arribant nobas bonas.

Duncas no nc'at a essi nudda de fai, de siguru, po su chi pertocat sa partida tra is de su Lanusè, chi depiant giogai, in domu insoru, contras a is de su Latina: de cussu chi s'est beniu a sciri me is ùrtimas diis,difatis, a cantu parit una persona chi fait parti de sa truma chi sighit is giogadoris de sa scuadra ollastrina nd'at bodditu su virus. Is de su Lanusè, duncas, depint abarrai in assètiu, chenza si podi allenai, abetendi de fai is esamis po cumprendi mellus cumenti staint is cosas.
Sa partida, a cantu scieus in dii de oi, s'at a arrecuperai su dexiotu de su mesi de Donniasantu, de mercuis.

Is de su Lanusè sa cida passada ant bintu sa partida, foras de domu, contras a is de s'Afragolese: mancu a dhu fai aposta, in sa scuadra campana puru dhoi funt personas chi nd'ant ingotu sa mobadia; custu bolit nai ca sa partida chi s'iat depi giogai dominìgu, in Tatari, in domu de is de su Latte Dolce, at a sartai.

Is chistionis funt acapiadas, s'una cun s'atra, a trassa de cadena: sa scuadra sighia de mister Stefano Udassi at sartau puru sa partida chi si depiat giogai, pròpriu sabudu passau, contras a is lazialis de su Vis Artena, chi ant scrobetu de tenni unu giogadori apuntorau de su tiau de su Covid e pròpriu po custu imoi no ant a podi giogai mancu sa partida contras a is de sa Torres, e po imoi no si sciri candu d'ant a podi torrai a arrecuperai.

Nudha de fai nemancu po is de su Cràbonia, chi depiant partiri po andai a giogai in domu de su Giugliano, ma is napoletanus no ndi funt potzius cabai in Sardinnia a giogai sa partida contras a su Murerà, sa cida passada, poita teniant calincuna cosa cumenti a undixi cristianus apuntoraus.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020