Salta al contenuto principale
olbia esultanza

Una stagioni de oru po is de s'Olbia: is biancus abarrant in Serie C po un antru annu

Po is nobas de su Diario Sportivo de custa cida, scritas cumenti a sèmpiri in su sardu chi si fuedhat in su Campidanu de mesu, boleus chistionai de sa stagioni bona e toga meda de is de s'Olbia (chi in sardu si tzerriant, mellus, is de Terranoa), chi currint in su campionau de sa Sèrie C, in su Girone A, po essi pretzisus. In totus custus mesis, a nai sa beridadi, a su mancu po su chi pertocat is articulus scritus (e pesaus) in sardu, de custa chistioni nd'eus chistionau pagu meda (est a nai: giai nudha), poita si sciri cumenti andant is cosas: nc'est sèmpiri calincuna cosa de importu prus mannu de contai, cun su tialu de Covid chi, po nd'arremonai unu, fatu fatu si ndi pigat su logu prus mannu in totus is chistionis e is arraxonamentus de sa genti, est a nai chi meda bortas sucedit chi no arrannesceus a chistionai de atru, cun sa conca prena (prena fintzas a cucuru) de cussus pentzamentus lègius acapiaus a sa mobadia, chi parit (o est) s'ùnica cosa de importu chi est abarrada in sa vida nosta. A nai sa beridadi, poi, cun su Diario Sportivo circaus de contai, mescamente, is contus e is fainas de su mundu de is diletantis, cun d'una biga manna de giogadoris, chi ndi lòmpint giai de dònnia bidda e de dònnia citadi de sa Sardìnnia, chi funt acapiaus cun sa chistioni. Medas bortas e medas cidas, duncas, eus scerau de chistionai de is scuadras sardas chi currint in su campionau de sa Sèrie D, e pruschetotu de is scuadras, funt otu, chi ant scerau de torrai in campu po circai de serrai is giogus de su campionau de s'Eccellenza. Oi peròu, eus decìdiu de chistionai feti de is biancus de sa scuadra de Terranoa, poita si dhu minescint, castiendi a is numerus chi funt stètius bonus a ndi pesai me is trinta e otu partidas chi ant giogau, e poita, de su restu, funt sèmpiri sa segunda scuadra, chistionendi de s'importu chi tenint, chi s'agatat in dì de oi innoi in Sardìnnia, a is pabas feti de sa scuadra de su Castedhu, chi, cumenti totus scieus beni, currit in su campionau de Sèrie A. E intzandus si nci ghetaus, chenza de perdi atru tempus, a castiai ita totu ant cumbinau Daniele Ragatzu e is cumpàngius. A nai sa beridadi, si sciiàt beni, giai de s'istadi passada, chi is giogus podiant essi tostaus po sa scuadra sarda, poita su camipionau de sa Sèrie C est dilicau meda, e tostau, e is scuadras fortis no mancant de seguru. Is de s'Olbia intzandus, si dha funt depia biri contras a is de su Como, po nd'arremonai unu, a is de s'Alessandria, a is de su Renate, a is de sa Pro Vercelli, a is de sa Pro Patria, de su Lecco, de s'Albinoleffe e de su Pontedera, po arremonai is otu scuadras chi ant acabbau su campionau me is primus otu postus; seus chistionendi sèmpiri, est craru, po su chi pertocat su Girone A. Is de su Terranova, duncas, ant batallau, po totu s'annu, contras a scuadras chi nd'arribbant de sa Lombardia, de sa Toscana e de su Piemonte; tra custas, nci funt puru is de sa Juventus, ma no seus chistionendi, est craru, de sa scuadra de is mannus (cun Cristiano Ronaldo e Dybala chi giogant, cumenti meda de bosatrus scint giai, in su campionau de sa Sèrie A, chi est cussu chi pertocat is prus grandus campionis de bòcia), ma de cussa pesada feti cun piciochedhus chi no ant ancora fatu prus de bintri-tres annus de edadi. Sa bidea mia, intzandus, est cussa de torrai a bivi (est a nai, a dhu torrai a bivi contendi is fatus de importu prus mannu) totu su tretu chi is de su Terranova ant fatu, conca a sa salvesa, est a nai conca a sa possibbilidadi de giogai torra, a su mancu po un antru annu, in su campionau de Sèrie C, chi est su campionau prus pitichedhu tra totus cussus chi faint parti de su mundu de is professionistas. Parteus duncas de s'acabbu (chi no si dispraxit, cumenti si narat), e duncas de is fuedhus de su presidenti de s'assotziu, Alessandro Marino, chi tenit, est craru, su coru prenu de afrodhiu po sa stagioni bona chi sa scuadra cosa sua est stètia bona de ndi pesai, mancai is strobus e is trumentus siant stètius medas. Poita est berus chi is de su Terranova ant acabbau sa stagioni a su de trexi postu in sa lista, cun coranta-seti puntus in buciaca e su bisu, chi est abarrau biu po una bella pariga de cidas, de ndi cassai adderetura sa brintada me in cussus chi in ingresus si tzerriant "play-off" e chi pertocant is partidas, chi si giogant apustis de s'acabbu de is trintotu giorronadas chi ballint po su campionau, tra is scuadras, de dònnia gironi, chi funt arribadas me is primus cincu-ses postus de sa lista; ma nc'est de si ndi arregodai puru chi, mescamente me in sa prima parti de sa stagioni, is de su Terranova ant tentu una biga de trumentus, no tanti, fortzis, po su chi pertocat sa calidadi de su giogu chi fadiànt biri in campu, ma mescamente po su chi pertocat sa capacidadi de si ndi pigai is tres puntus. Una de is cosas chi parint craras, in dì de oi, est chi is de su Terranova (cun su presidenti Alessandro Marino in primu fila, est craru e si cumprendit) tenint sa bidea de torrai a partiri, puru po s'annu chi benit, cun Max Canzi a sighiri is giogadoris po is allenamentus e is partidas. «Is cosas funt craras, nc'est diaderus pagu de aciungi — scoviat su presidenti de is biancus in d'una ciaciarrada cun is de Tuttomercatoweb —: depeus cumprendi mellus cument funt is cosas, ma podeus giai nai chi nc'est sa gana, sa volontadi de andai ainnantis impari a su mancu po un antru annu, est a nai po sa stagioni de su duamilla e bintunu \ duamilla e binti duus. Candu is annus acabbant mellus de cumenti funt incumentzaus, bolit nai chi seus arrannescius a ndi pesai calincuna cosa de bonu, che seus stètius bonus de cresci, totus impari, de mellorai cumenti a scuadra, cumenti a truma; una cosa chi ballit, duncas, no feti po is giogadoris e s'allenadori, ma puru po totus is dirigentis e is personas chi trabballant impari a nosu. Me is partidas de sa torrada, de su restu — aciungit cun afrodhiu su presidenti Alessandro Marino eus fatu a biri a totus chi podestus giogai e cumbati po cassai is primus postus de sa lista. Seus partius mabi, tropu mabi, custu est berus e si dispraxit, ma seus arrennèscius comentecasiat a donai sa possibbilidadi de giogai, e de cresci, a totus cussus giogadoris prus pitichedhus chi tenestus me in sa rosa: est una òndra po nosu e po totu sa Sardìnnia, poita medas de is piciochedhus chi giogant cun nosu ndi benint pròpriu de s'ìsula. A sa fini de is giogus duncas, fadendi totus is contus, podeus narai chi is cosas si funt andadas beni meda». Marino agoa contat: «Eus fatu giogai calincunu piciochedhu giai forti meda, cumenti est sucèdiu cun Udoh, po nd'arremonai unu, chi nd'est bessiu aforas, dhi naraus diaici, in sa segunda parti de sa stagioni. A narai sa beridadi, Udoh fiat perdendi unu paghedhu sa capacidadi de fai a biri a totus cantu est forti, ma nosu nc'eus ofiu crei a su pròpriu; seus stètius bravus, duncas, a cumprendi chi fiat ancora unu giogadori forti, mancai fessit gioghendi peus de cussu chi podiat e podit fai. Ma in su mundu de sa Sèrie C funt cosas chi sucedint fatu fatu: giogadoris chi mancai trigant a fai a biri a totus cantu ballint, giogadoris chi trigant a fai bessiri aforas totu sa fortza chi tenint aintru, ma chi poi a sa fini nc'arrannescint e donant una manu meda manna de agiudu a sa scuadra e a is cumpàngius. Deu potzu nai feti chi sa scuadra de su Terranova podit essi un agiudu po is scuadras chi giogant me is atrus campionaus puru». Est a nai chi is giogadoris, mescamente is prus giòvunus, chi giogant e crescint me in sa scuadra de su Terranova iant a podi essi de importu mannu po totus is atras scuadras chi mancai currint me is campionaus prus pitichedhus. Torrendi a is fuedhus de su presidenti Alessandro Marino, est pròpriu berus chi is de su Terranova, mescamente me is primas tres giorronadas, ant tentu prus strobus de cussu chi, fortzis, s'abertànt: in sa primu bessida (contras a is de su Pontedera), difatis, is biancus sighius de mister Max Canzi ant pèrdiu, in domu, cun su rèsultau de unu a zeru; in sa segunda partida chi ant giogau po su campionau, invècias, nd'ant pigau una bella surra (dhi naraus diaici...) in domu de is de s'Alessandria, chi ant bintu fadendi cuatru gol, cun is de s'Olbia chi funt arrannescius, invecias, a ndi fai feti unu. A sa de tres partida puru, chi s'est giogada su seti de su mesi de Ladàmini, is de su Terranova ant pèrdiu, in domu, contras a is de sa Pro Patria, chi si ndi funt pigaus is tres puntus chi dhoi fiant badda badda in su campu, gràtzias a su rèsultau de unu a zeru. Est a nai chi, apustis de tres giorronadas, is biancus s'agatànt a s'ùrtimu postu, chentza nesciunu puntu in buciaca e s'umori unu paghedhu primau, e si cumprendit beni su poita. Su primu puntixedhu de sa stagioni nd'est duncas arribbau feti a sa de cuatru giorronada, in domu de is de su Pro Sesto 1913, candu is de su Terranova funt arrannescius a cassai unu parègiu, gràtzias a su gol fatu de Pennington, candu mancànt feti cincu minudus a lòmpi a su de noranta minudu, est a nai a s'acabbu de sa partida. Puru in sa partida contras a is de su Livorno (una scuadra cun d'una grandu storia a is pabas, fadendi su contu chi is arrubius ant giogau puru in su campionau de sa Sèrie A fintzas a una pariga de annus fait) is de su Terranova nd'ant cassau feti unu puntu, cun d'unu gol, torra, pesau me is ùrtimus cincu minudus de sa partida, ma is cosas fiant ponendusì mellus po su chi pertocat sa calidadi de su giogu e sa manera de si ponni in campu e de cumbati. A nai sa beridadi (e bastat feti a castiai is numerus po si nd'acatai) is biancus ant fatu calincuna cosa cumenti a ses parègius de sighiu; s'ùrtimu est stètiu cussu in domu de su Como, cun sa partida chi est acabbada cun su rèsultau de duus a duus, ma a nai sa beridadi, po crupa de su tialu de su Covid is partidas cun is de sa Luchese e cun is de su Como funt stètias spostadas. Sa primu bincida po is biancus, duncas, nd'est arribada feti a sa de undixi giorronada, in sa partida contras a is meris de domu de sa Pistoiese 1921, apustis (dhu arregodaus) de sa surra chi is de su Terranova nd'iant bodditu in domu, in sa partida contras a sa Pergolettese, chi si fiàt serrada cun su resultau de cuatru a unu po is allenus. Apustis de cussus cuatru pinnigosus, intzandus, is piciocus sighius de Canzi funt stètiu bonus a ndi pesai sa conca, fortzis in d'unu de is momentus prus lègius de totu s'annu; puru sa partida contras a is de sa Pistoiese (chi s'est giogada su cuindixi de su mesi de Dònniasantu) est incumentzada mabi, cun is meris de domu chi ant aciapau su gol gràtzias a sa giogada de Chinellato, a su de binti-seti minudu de su primu tempus. Po fortuna peròu, is de s'Olbia nd'ant pesau sa conca gràtzias a su tiru de is undixi metrus scutu de Ladinetti, a su de coranta-duus minudu in su primu tempu, e apustis, in su segundu tempus, nd'est arribbau puru su gol fatu de Giandonato, a su de noi minudu in su segundu tempus. Apusis de sa primu bìncida, is de su Terranova funt stètius bonus a cassai is tres puntus po atras dexi bortas in totu: sa segunda bìncida est arribbada su bintinoi de su mesi de Dònniasantu, in sa partida in domu contras a is piciochedhus de sa Juventus (chi eus giai arremonau), cun su resultau de duus a unu. In s'ùrtimu domìnigu de su mesi de Idas, invècias, est arribbada sa de tres bìncida, contras a is de su Lecco, cun su rèsultau de unu a zeru. Is biancus si ndi funt pigaus is tres puntus prenus puru in sa partida, sèmpiri giogada in domu a su "Bruno Nespoli", contras a is de su Grosseto. Custu bolit nai chi, a sa fini de is partidas de s'andada, is de su Terranova teniànt in buciaca calincuna cosa cumenti a binti-duus puntus, e s'agatànt a su de cuindixi postu in sa lista. Me is partidas de sa torrada, invècias, is biancus ant torra bintu contras a is de sa Pro Sesto 1913, in domu, cun su rèsultau de cincu a zeru; contras a is de su Como, sèmpiri a su "Bruno Nespoli", cun sa partida chi s'est giogada su tres de su mesi de Martzu e est acabbada cun su resultau de tres a zeru. Sa partida contras a su Como est stètia de importu mannu, poita (fortzis) est stètia s'incumintzu de su perìudu prus bonu, in totu s'annu, po is biancus, chi funt arrannescius a binci atras tres partidas de sighiu, partendi de cussa contras a is meris de domu de sa Pergolettese, cun su resultau de tres a zero po is sardus; passendi de s'unu a zeru, pesau in domu contras a is de sa Pistoiese, cun sa partida chi s'est giogada su trintunu de su mesi de Maju (custu po crupa de su Covid, est craru, poita a nai sa beridadi sa partida si depiàt giogai su catodixi de su mesi de Martzu), e apustis cun sa bìncida, sèmpiri po unu a zeru, agatada contras a is de sa Carrarese, su dexiaseti de su mesi de Martzu. S'ùrtima bìncida po is de su Terranova, a su mancu po custa stagioni, nd'est arribbada invècias a sa de cuindixi giorronada, in sa partida contras a is de su Renate, cun is sardus chi si ndi funt pigaus is tres puntus gràtzias a is gol fatus de Ragatzu e Gagliano, chi ant arrespustu a su gol fatu de Guglielmotti a su de cuatru minudu in su primu tempus. A sa fini de is giogus duncas, is de su Terranova nd'ant cassau dexi bìncidas, cumentui eus giai contau, dexiaseti parègius e undixi partidas perdias; is gol fatus funt stètius calincuna cosa cumenti a coranta-seti, cumenti coranta-seti funt is gol chi nd'ant pinnigau in trinta e otu bessidas. Po custu, si cumprendit s'afrodhiu de mister Max Canzi, chi una pariga de cidas fait at contau: «Po mei sa scuadra de su Terranova est sa primu bidea chi tengiu in conca, sa primu iscera; in totus custus annus chi apu fatu innoi in Sardìnnia mi seu sèmpiri intendiu stimau e apretziau. Depu torrai gràtzias a custa sociedadi: candu is cosas fiant andendi mabi m'ant donau sa fortza e sa serenidadi che deu apu provau a trasmitiri a totus is piciocus de sa scuadra. Seus arrannescius a ndi pesai unu campionau, una stagioni bona meda e a fai spassiai e spreviai totus is tifosus cosa nosta, chi est sa cosa de importu prus mannu». Puru su diretori sportivu de is biancus, Tomaso Tatti, at spendiu fuedhus drucis po is piciocus de sa scuadra e po s'allenadori: «Is primus cidas de sa stagioni no funt stètias facilis, mancu po nudha; ma seus stètius bonus, e bravus, a ndi pesai sa conca candu is cosas si fiant ponendi mabi po diaderus. No est stètiu facili giogai totus cussas partidas s'una avatu de s'atra, cun pagu diis po si pasiai; is giogadoris podiant essi fadiaus meda, si cumprendit, e invècias ant bogau aforas su coru, su carateri, e diaici sa scuadra nosta est torrada a partiri, prus forti, fortzis, de su chi pentzastus. Est craru, po cumenti si fiant postas is cosas, me is ùrtimus cidas mescamente festus puru bisendi da bidea de ndi cassai is play-off; chi estus bintu contras a is de su Novara fortzis estus potziu isperai fintzas a s'ùrtima partida de su campionau, ma andat beni meda diaici puru».


 

Attività realizzata col contributo della Regione Sardegna. IMPRENTAS 2020-2021. LR 22/2018 art. 22

In questo articolo
Squadre:
Campionato:
Argomenti:
Stagione:
2020/2021
Tags:
Serie C