Bintitres apuntoraus in d-unu ospìtziu in Bitzi: dònnia noba lègia est una surra po is bisus de torrai a giogai a bòcia

Seus lompius a su bintises de martzu e po imoi is cosas a pitzus de su spaniamentu de su Coronavirus non funt andendi pròpriu beni, a su mancu innoi in Sardìnnia: me is ùrtimas oras, difatis, s'est benniu a si sciri chi in Bitzi, in d-unu ospìtziu, nci funt stetius una biga de apuntoraus tra cussus poburus beciteddus: a oi si ndi contant dexiotu e po cumprendi su dannu mannu chi nd'est bessiu aforas bastat a pentzai chi funt bintunu in totu at essi arricius in cussa domu. Ma is nobas lègias non funt spaciadas: puru tra is catodixi infermeris chi ddoi traballant nci funt cincu mobadius. In s'interis, is uspidalis, a cantu parit a castiai is nùmerus, funt is prus ghetaus a pari tra cussus de totu s'Italia: si chistionat de calincuna cosa cumenti a sessantanoi cristianus, tra dotoris e infermeris, chi nd'ant bodditu su virus in su logu de traballu. Martis passau, s'Assessore a sa Saludi Mario Nieddu at chistionau de duuscentus apuntoraus in totus, , est a nai contendi puru cussus chi tzerriaus “operatori sanitari” e traballant, mancai, cun is ambulantzas de su 118, po fai un esèmpiu. Est craru, a pustis de totu cussu chi eus nau fintzas a imoi, chi po bisai de torrai a giogai a bòcia depeus a su mancu abertai chi si firmit su spaniamentu de sa mobadia, sperendi chi, a pustis, su numeru de is apuntoraus ndi calit drabessi. Chi fadeus su contu de cantu nc'ant postu in Cina a ndi bessiri aforas de custu arrori mannu, fortzis po is ùrtimus diis de aprili s'at a incumentzai a intendi calincuna noba bona.

Sa chistioni est: diaderus eus agatai su tempus po acabai is campionaus de is diletantis, con duuscentu mila partidas de giogai ancora, in totu Italia? Chi is cosas funt prus fàcilis po sa Terza Categoria, sa Seconda, sa Prima e sa Promozione, is trumentus nd'arribant pentzendi chi is scuadras de s'Eccellenza, po giogai is play-off po nd'artziai in Serie D, depint atobiai is scuadras de is atras incontradas italianas, e no podeus sciri candu s'ant a scabulli de su malli.


Davide Onnis