Salta al contenuto principale
villamassargia 2019/2020
Su Li Punti invècias torrat a trabballai in campu

Crabònia e Bidda Matraxia si depint frimai po crupa de su virus, is de s'Ilvamaddalena atziant sa boxi: «Nisciunu si narat ita depeus fai»

A nai sa beridadi, s'iat a essi praxiu incumentzai sa cida cun is nobas de su mercau e mancai, cun is contus apitzus de is partidas chi totus is scuadras sardas funt fadendi po si cuncodrai e essi prontas po candu ant a partiri torra is campionaus, s'ùrtimu domìnigu de su mesi de Cabudanni, e prima ancora, cun sa Coppa Italia, chi po is de s'Eccellenza e de sa Promozione at a partiri giai de custu domìnigu chi benit, est a nai su trexi, cun su primu turnu.

Invècias si tocat ancora chistionai de su Covid chi, a cantu parit, no si bollit lassai in paxi e sighit a si donai strobus e pentzamentus legius.

Is giogadoris de duas scuadras sardas, difati, funt serraus in domu, po cussu chi tzerriant "isolamento fiduciario": seus chistionendi de is de su Bidda Matraxia, chi me is ùrtimas ora at agatau unu giogadori cun sa mobaidia, chi peròu stait beni e po fortuna no est tenendi trumentus, e de is de su Crabònia, chi currint in su campionau de Sèrie D e che pròpriu mèrcuis passau si funt atobiaus cun is arrubius-brau po una partida de allenamentu.

Is de su Crabònia, comentecasiat, iant giai decidiu de si frimai po su sàbudu e po sa dii avatu, po si torrai a biri, totus impari, su lunis. Is de su Bidda Matraxia, invècias, ant depiu sciusciai sa partida contras de is de Sa Baronia, chi fiat po sa dii de su sàbudu.

Is duas scuadras imoi depint abarrai frimas e abetai chi totus is giogadori fetzant is esamis po cumprendi cantu apuntoraus nci funt: is allenamentus iant a podi torrai a partiri giòbia o mancai cenàbara.

In s'interis, is de su Li Punti, chi currint po su campionau de Eccellenza, ant arriciu is resultaus de is esamis e imoi, giai chi funt totus sanus, podint torrai a trabballai in campu.

Su trumentu prus mannu, peroù, pertocat is de s'Ilvamaddalena, chi ndi funt artziaus de sa Promozione in su campionau de Eccellenza: me is diis passadas, unu giogadori at scrobetu de tenni su virus e un antru abarrat serrau in domu de su binticincu de su mesi de Agustu e est ancora abetendi de fai is primus esamis, diaici cumenti a totus is atrus cumpangius.
Pròpriu po custu, sa sotziedadi s'est fata intendi cun d-unu comunicau, innoi, tra is atras cosas, si ligit: «Mancai siant passadas dua cidas de candu is de s'Ilvamaddalena ant incumentzau a abarrai serraus in domu insoru, e mancai siat passada una cida de candu unu giogadori at scrobetu de essi apuntorau de su virus, fintzas a oi nisciunu at nau o fatu nuda po is atrus piciocus de sa rosa. Custu fatu si donat pentzamentus, contendi che no scieus ancora cantu tempus nc'at a bolli po ndi bessiri de custa storia, cun is de su Servizio Sanitario Regionale chi abarrant citius». Apustis si ligit ancora: «No podeus prus domandai a is nostus giogadoris de abarrai serraus in domu, cosa chi ant fatu cun cuscèntzia, chenza nisciunu òbbrigu, contendi puru su fatu chi medas de issus funt babbus de familla e trabballadoris».


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Campionato:
Argomenti:
Stagione:
2020/2021
Tags:
Serie D
Eccellenza