Is de sa Sèrie A sighint a curri po torrai in campu; po totus is atrus at a essi un istadi callenti

Totu su mundu de sa Sèrie A, ballit po is giogadoris ma puru, pruschetotu, po is tifosus, est abetendi s'atobiu de pusti-crasi, giobia, su bintotu de su mesi de Maju, chi nc'at a essi tra is de sa Federcalcio, is de sa Lega e su ministru de su sport, Vincenzo Spadafora: tra is atras cosas, ant a depi arrexonai e, isperaus detzidi, po torrai a fai partiri is giogus e, duncas, is partidas de su domìnigu.

Nc'at a essi de chistionai e de agatai un acòrdiu, ancora, apitzus de su "protocollo" (pròpriu cumenti ant fatu po torrai a partiri cun is allenamentus in truma manna), est a nai sa lista de fainas de sighiri po torrai in campu chenza nci perdi sa saludi, nareus diaici. Apustis, est cussu chi, a su mancu, isperaus, at a tocai puru a sa Sèrie B.
Parint invècias ghetadas a pari meda is cosas po sa Sèrie C: is de sa Lega Pro, difati, ant sèmpiri nau de no podi sighiri is règulas po cumbati su spaniamentu de su virus, prus po una chistioni de dinai che de atru.

In s'interis, me is urtimas oras funt arribendi puru is novas po su mundu de is diletantis e de cussus chi tzerriant "semi-professionistas", partendi de is de sa Sèrie D, chi funt, est a nai, s'acapiu tra is campionaus regionalis, da s'Eccellenza fintzas a sa Terza Categoria, cun cussus natzionalis.
Cenàbara passau, difatis, su Cunsillu Federali at scioberau de ndi sciusciai totus is campionaus, cumenti est sutzediu, po nd'arremonai una pariga, in Frància e in Inghilterra, chi ant pigau custa detzisione giai de diora. Imoi nc'at a essi de cumprendi cumenti aderetzai is cosas me is listas, po cussu chi pertocat is promotzionis e pruschetotu is retrocessionis, una chistioni chi in Frància, po nai, at allutu giai certidus; in Italia puru is cosas parint agualis: po is presidentis de is Comitaus Regionalis at a essi un'istadi callenti meda poita, si cumprendit giai de imoi, ant a depi atendi a unu traballu mannu e fadiosu.

Attività realizzata col contributo della Regione Sardegna. LR 22/2018 art. 22, comma 2. Avviso 2019-2020