Etzellèntzia a 18 iscuadras, sa FIGC dat ufitzializade a su recùperu de su Ploaghe

A sa fine lompet su sèberu prus lògicu chi prèmiat su Ploaghe, torra ammìtidu in Etzellèntzia e, a cadena, su Girasole in Promotzione e s'Oristanese in Prima categoria. Su comitadu regionale de sa FIGC at detzìdidu de illargare s'Etzellèntzia a 18 iscuadras cun s'ispera chi giai a s'agabbu de su mese de trìulas si potzat torrare a 16 iscuadras cun s'ammissione de s'Arzachena e de su Fertilia in sèrie D. In s'ùrtima riunione de su Consìgiu Federale est lòmpida duncas sa detzisione chèrfida dae Ploaghe, Girasole e Oristanese chi aiant partetzipadu a sos play off in sas categorias issoro sena de tènnere sa seguresa de pòdere passare a s'àtera, prus de totu pro su club tataresu chi aiat bìnchidu sos isparègios, mentras sos ogiastrinos e sos aristanesos aiant pèrdidu sas garas issoro. De cunsighèntzia, sos postos disponìbiles in Segunda categoria, pro cumpletare s'orgànicu, passant dae 6 a 7.