Salta al contenuto principale
sibilia lnd
Gravina: «Seus cichendi su modu prus futu po cuncodrai is cosas»

FIGC e LND traballant po fai partiri torra is campionaus, Sibilia: «Dhoi funt prus de unu millioni de giogadoris chi no bint s'ora de cabai in campu»

De sicuru no est stetiu unu duamilla e binti assebiau po is de sa Federatzioni e po is de sa Lega Natzionali de is Diletantis: su virus difati, cumenti scieus beni, at sciusciau totus is giogus prima de s'ora, e duncas nc'est stetiu bisòngiu de su traballu e de is arrexonamentus de totus is dotoris chi sighint is chistionis de su mundu de sa bòcia me is uficius, partendi de Cosimo Sibilia e de Gabriele Gravina.
In d-unu primu tempus, si dhu arregodaus beni, totus is isfortzus funt serbius po torrai a fai partiri su trenu de sa Sèrie A e de is professionistas; apustis nc'est stetiu de aderetzai is cosas me is listas, cun is promotzionis e is retrocessionis de sa Sèrie C fintzas a sa Secunda Categoria.
Imoi si oberrit un antru capitulu de sa storia, est a nai cussu chi pertocat s'incumintzu de sa stagioni noba. Spetat pròpriu a Sibilia e Gravina, tra is atrus, a circai de crariri is cosas.

«Cussu chi obeus totus est torrai a partiri apustis de su lockdown, ballit puru po su mundu de sa bòcia e pruschetotu de is diletantis» — contat su presidenti de sa LND Cosimo Sibilia.
Chi agoa aciungit. «Fintzas a oi, peròu, no nc'est nisciuna certèsa apitzus a sa stagioni de su duamilla e binti \ duamilla e bintunu. Nosu eus fatu de totu, cun is agiudus in dinai, po nd'arremonai unu, ma mancant ancora is règulas po podi torrai a giogai in campu po is partidas de is campionaus: est una cosa chi seus domandendi de diora, ma nisciunu ancora s'at arrespustu. Nci funt calincuna cosa cumenti a doxi mila sotziedadis, prus de unu millioni de giogadoris, mascus e feminas, chi no bint s'ora de sciri chi ant a podi torrai a giogai a sa fini de s'istadi».
Gravina puru, me is diis passadas, at nau sa sua apitzus de sa chistioni: «Deu m'auguru chi nd'arribit chitzi unu vacinu, ma in s'interis eus a depi traballai po cuncodrai unu protocollo sanitariu chi potzat essi prus fàcili de sighiri puru po is diletantis. S'eus atobiai chitzi po cumprendi cumenti fai partiri torra is campionaus».

In questo articolo
Campionato:
Argomenti:
Stagione:
2020/2021
Tags:
Eccellenza