Metadi de Serie A in corantena, s'atra metadi no biri s'ora de ndi torrai a is campus po is allenamentus

Cun totu s'Itàlia serrada aintru de domu po sa corantena, prus o mancu de su dexi de su mesi de Martzu, sa chistioni apitzus de is allenamentus de is giogadoris est oberta, pruschetotu de is de Sèrie A e de is chi giogant no po spàssiu ma po trabballu e chi naraus “professionistas”; is atrus, naraus de sa Ecellèntzia fintzas sa Tertza Categoria, depint abetai novas de su Guvernu. In s'interis chi sa genti no nci podit stupai aforas de is aposentus mancu po una passillada, scuadras medas ant sighiu a fai atobiai, mancai a trumixeddas, est a nai cuatru o cincu personas, is  “tesseraus” intzoru. De una parti parit brulla chi no fait arriri mancu po nudda, poita ca is giogadoris fadendi diaici s'iant a podi apuntorai e ndi boddì su virus, ma depeus pentzai puru chi in d-unu mundu, su de sa bòcia, aingirau de su dinai, is giogadoris funt un'interessu, una sienda e cumenti si fait po is màchinas e is machinàrius andant amantènnius beni. Sa Federatzioni de is dotoris sportivus at consillau de abertai assumancu a su tres de su mesi de Abrili, mancai su Casteddu, is de sa Latzio e is de su Nàpoli iant detzidiu in d-unu primu tempus de torrai a partiri giai de su binti-tres de su mesi de Martzu; invècias atras scuadras, cumenti e sa Juventus etotu, chi est in corantena impari a Inter, Fiorentina, Sampdòria, Verona, Udinese e Atalanta, iant a preferri a abetai, est craru, e iant a bolli ponni a menti a Damiano Tommasi, su presidenti de s'Assòtziu de is giogadoris italianus. Tommasi at scritu, apitzus de sa chistioni, una pariga de fueddus chi funt bessius pròpriu in su giassu de sa Aic: «Torrai a partiri imoi cun is allenamentus — si ligit —  est una cosa foras de sentidu perunu. O calincunu si pentzat diaderus de nci godangiai fadendi totu custu? Ma a mei mi parit perigulosu meda».


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020