Omar Porru cun s'Andromeda po torrai a partiri prus a forti: «Custu giogu est sa vida mia»

S'Andromeda, sa scuadra de calciu de Siurgus Donigala, est bolendi sempri prus in artu: domìnigu passau difatis, gràtzias a is tres bussinadas donadas, foras de domu, a cussus de su Villamassargia, is grogus-nieddus ant postu is manus apitzus a sa bìncida de ses e imoi bolint acabai s'annu in bellesa, cun sa partida, de importu mannu meda, contras a s'Idolo de Arzana: is piciocus de mister Mario Masia s'agatant a su primu postu de sa classifica e ant a fai de totu po torrai agoa cun is tres puntus in buciaca. S'Andromeda perou, ananti a is tifosus cosa sua, at pèrdiu feti una borta fintzas a imoi, su dexi de su mesi de donniasantu, contras a is casteddaius de sa Sigma.
Chi is cosas funt andendi diaici beni est puru poita s'allenadori, Fabio Casula, podit traballai impari a giogadoris fortis e cumenti si spetat.

Sa stòria de Omar Porru est bella meda de contai e, in prus, est aguali a cussas de medas atrus chi giocant po spàssiu. A nai sa beridadi, nci funt piciocus, mannus e prus piticus, chi pròpiu no scint abarrai chenza de bòcia.
Porru at tastau sa Serie D, de su duamilla e undixi fintzas a su duamilla e trexi, cun su Selargius; apustis nci dd' at acabada in s'Eccellenza, cun Porto Corallo e Muravera, e cun is sarrabesus at bintu su campionau. In su duamilla e quindixi giogat torra in Serie D, po s'ùrtima borta: su traballu difatis no ddi lassat tempus po is allenamentus e diaici, po duus annus, Omar ndi depit fai de mancu.
Ma in su duamilla e dexiaseti su disigiu est tropu forti, e intzandus torrat a incumentzai in s' Havana de Santu 'Asili 'e Monti, in Seconda Categoria

«Custu giogu est sa vida mia — contat Omar Porru — no apu mai pentzau de dd'acabai. Ma a binticuatru annus depu circai puru de guadangiai su dinai chi mi serbit po bivi. Su calciu m'agiudat a abarrai prexau, est totu cussu chi bollu e no nc'at a essi nudda chi m'at a frimai».


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020