Pro ispàssiu, tantu pro passare s'ora

A fàghere sas cosas "per diletto", bortas meda, cheret nàrrere a las fàghere sena tropu interessu, pro ispàssiu, tantu pro passare s'ora. A èssere diletante cheret nàrrere, a un ala, a fàghere una cosa solu pro praghere, non pro professione o guadàngiu, ma a s'àtera cheret nàrrere finas a non tènnere esperièntzia, a èssere pagu pràticu (in sensu malu). E issaras, abarrende in tema nostru, in su diletantismu de su pallone, castiende a sos campionados chi sunt agabende, tocat a torrare a mesurare su faeddu a tenore de su traballu chi chentinas de sardos b'ant postu pro organizare sos campionados e preparare pitzinnas e pitzinnos chi pro meses ant dedicadu impegnu a su "diletto". Sa gara est gara, sos campionados sunt campionados, chi sient organizados e fatos dae istudentes, maniales e pastores o chi bi sient in segus sos professionistas. Su chi tocat a pònnere in evidèntzia est sa positividade de su "diletto", acumpangiada dae su disinteressu pro sa materialidade chi invetzes est guastende dae annos su professionismu, leandechelu atesu mannu dae s'ispàssiu chi ancora agatamus in sos campos prus piticos in totu sa Sardigna (e finas in àteros logos). Benebènnidu siat su diletantismu, sa capatzidade de èssere in su mundu cun s'umiltade e sa fortza de chie ancora ischit pònnere a s'interessu sas làcanas de s'ispàssiu.