Sa finale playoff Fertilia-Porto Corallo s'at a gioghare in Santa Justa

S'at a giogare dumìniga su 4 de maju a sas 4 de merie in su campu nèutru de Santa Justa sa finale

playoff de Ecellèntzia intro de Fertilia e Porto Corallo. A primora s'isparègiu pariat destinadu a su tzentru federale de Sa Rodia de Aristanis, invetzes est istadu detzìdidu de impreare torra sa sea giai seberada s'annu coladu pro sa finale de Copa Itàlia de Ecellèntzia intro de Olbia e Muravera.

Si fiat pensadu chi podiat èssere seberadu su Comunale de Biddexidru, pro more ca ddi at duas tribunas distintas pro pòdere separare sos tifosos, ma a sa fine s'est agatadu unu acòrdiu subra de s'impiantu de Santa Justa. S'istrutura de Sa Rodia non tenet tribunas separadas, tenet cussa tzentrale de 900 postos in tubos innotzentes sena una cobertura pro amparare sa gente dae s'abba proina. Mancari custas caraterìsticas, giai in custa istajone ddi ant giogadu sa finale de Copa Itàlia de Ecellèntzia Nuorese e Porto Corallo e sa de Promotzione intre Lanusei e Tonara, cun sos tifosos chi si sunt postos a sas alas de sa tribuna cun in mesu ispetadores neutrales, e non ddi at istadu problemas de òrdine pùblicu.