Sa Sardinnia sperat de brintai chitzi in sa "Fase 2", in Germània funt giai prontus a partiri torra cun su campionau de sa Bundesliga

Totu sa Sardinnia, ddu podeus nai craru e tundu chenza bregùngias, est abetendi cussa chi tzerriant "Fase 2" de is fainas e de is arregulas po cumbati su spaniamentu de su Covid-19.
Su guvernadore de sa nosta isula, Christian Solinas, at mantenniu sa lerta arta meda, a su mancu fintzas a su binti-ses de su mesi de Abrili; apustis de su tres de su mesi de Maju, at a tocai a su Guvernu detzidi cumenti manigiai is cosas.
De nai nc'est puru chi in Sardinnia, fintzas a imoi, funt motas "feti" otanta-ses personas; cun custu no bolleus fai finta de nudda, o brullai apitzus a su disisperu de is parentis de totus is poburus, omis e femias, chi no nci funt prus, ma si permiteus de manigiai su fueddu "feti" poita, castiendi is numerus pesaus me is atrus logus, a cantu parit is cosas si funt andadas beni meda. Difatis sa Sardinnia est sa de cincu in sa lista de is regiones, in totu Italia, chi at tentu prus pagu dannus e imoi podeus sighiri a bisai chi sa nosta vida potzat torrai chitzi a essi cumenti fiat ainnantis de custu dannu legiu chi si nd'est proziu in conca.

Sa duda chi abarrat sèmpiri in peis, in custu giassu, est: candu at a torrai a partiri sa bòcia?
In Gèrmania, ddu scieus giai de meda tempus, funt ainnantis: is giogus iant a podi torrai a incumintzai giai de su noi de su mesi de Maju, ma imoi po ndi sciri calincuna cosa in prus tocat abertai a s'atobiu chi sa DFL (chi ballit po sa nosta FIGC) at a cuncodrai po cenabara binti-cuatru de su mesi de Abrili.

Is cosas, de su restu, funt craras: s'at a giogai a portas serradas, est a nai chenza pùbblicu. Unu bellu agiudu po totus is tedescus acorraus in domu po sa corantena, poita, cumenti narat su guvernadore de sa Baviera, Markus Soder, «unu dominigu cun sa bòcia si sumportat mellus de unu dominigu chentza de sa bòcia».
In s'interis, sèmpiri de sa Germania, nd'arribant atras nobas, custa borta apitzus de is diletantis: is scuadras de sa Baviera, difatis, funt pentzendi de frimai is giogus fintzas a su trintunu de su mesi de Agustu.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020