Sa Serie D torra in campu su binti de su mesi de Cabudanni cun sa Coppa Italia; su campionau incumenzat su binti-seti

Su tempus, cumenti a dònnia istadi, parit diaderus chi si nci bolat: mancant difatis feti dexi diis po spaciai puru su mesi de Trìulas e s'afroddiu po sa stagioni chi at a benni est sempri prus mannu, pruschetotu poita is giogus, in su duamilla e binti, si ndi funt studaus prima de s'ora, dhu scieus beni, e is tifosus, cumenti a is giogadoris e is allenadoris, funt abarraus a buca asciuta tropu chitzi, e a brenti mesu sbuida.

In s'interis che totus is scuadras, partendi de cussas chi ant a giogai in su campionau de Serie D, fintzas a arribai a cussas de sa Secunda Categoria, funt traballendi, dii e noti, po pesai is rosas, conca a su benidori, nc'est sèmpiri de cumprendi candu ant a torrai a partiri is fainas in campu.
Po ndi cumprendi calincuna cosa de prus no podeus fai atru chi s'apicuai a is nobas chi nd'aproillant de is de sa Lega Natzionali Diletantis, cun su presidenti Cosimo Sibilia chi at scoviau, me is cidas passadas, chi is partidas po sa stagioni duamilla e binti \ duamilla e bintunu iant a podi partiri giai de s'ùrtimu domìnigu de su mesi de Cabudanni, est a nai su binti-seti.

«Si biri e s'intendit chi nc'est gana meda de torrai a giogai — contat Sibilia —, custu afroddiu est una cosa chi fait beni a totu su mundu de sa bòcia».

Su domìnigu ainnantis, invècias, a cantu si ligit me is nobas ghetadas aforas de cussu chi tzerriant "Dipartimento Interregionale", nc'ant a essi is primus partidas po sa Coppa Italia, cun is de su Lanusè, de s'Altzaghena e de su Cràbonia chi ant a cabai in campu po si gherrai is primu bìncidas. Apustis at a tocai puru a Torres, Latte Dolce e Murera.
No si sciri ancora (e nc'at a passai un antru pagheddu de tempus) candu ant a torrai a partiri is giogus po is scuadras de s'Eccellenza, de sa Promotzione, de sa Primu e Secunda Categoria, ma a cantu parit, a su mancu po su chi si cumprendit in dii de oi, eus a depi abertai su mesi de Ladàmini.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020