Salta al contenuto principale
sebastiano canu
«In famillia teneus su calciu in su DNA»

Sebastiano Canu fait chistionai su coru: «Cussu chi nc'est tra mei e Oscheri no si podit contai a fueddus».

Sebastiano Canu è torrau a domu, in sa scuadra de sa bidda cosa sua, a Buddusò, a pustis de doxi annus a giru. Is cosas funt andendi beni meda, at giai fatu trexi gol in sexi bessidas, e de custus, seti ant decidiu sa partida. Is biancus – asullus dominigu passau ant bintu contras a cussus de Ceraxu e funt currendi forti, facias a is prìmus postus de sa lista.

Po Canu, perou, su Buddusò no est s'unicu amori: difatis unu de is primus pentzamentus, candu acabat de giogai, est po s'Oschirese, sa scuadra innui est stètiu me is'ùrtimus noi annus e innui at lassau un arrogu mannu de coru. Ddu scieus beni: su calciu no est sceti a curri avatu a una bòcia, ma est meda, meda de prus: arregodus, po incumentzai, stòrias chi s'ammesturant cun sa vida, letzionis.

«No arrannèsciu a ti contai, a fueddus, totu cussu chi nc'est tra mei e sa scuadra de Oscheri: cun issus apu fatu calincuna cosa cumenti a duxentu e bintiseti gol. Po is ùrtimus cincu annus seu stètiu puru su capitanu; in custas categorias est una cosa chi tocat a is giogadoris prus matucus de su logu, po custu po mei est stètiu unu prexeri mannu. Chi nc'aciungis su fatu chi mi seu cojau cun d'una picioca de sa bida podis cumprendi beni de ita seus chistionendi».
Agoa sighit: «Pentzu pròpriu de essi unu de is tifosus prus mannus chi tenint (arrit), m'intendu fatu fatu cun s'allenadori, cun su presidenti e is atrus de sa sotziedadi e is giogadoris. Po sa primu partida de sa Coppa Italia de cust'annu, chi eus giogau pròpriu contras a s'Oschirese, is tifosus ant cuncordau unu striscioni feti po mei».

Sa bòcia est una chistioi de famillia po Sebastiano. «Babu miu fait s'allenadori, is fradis mius, Mario e Enrico, giogant impari a mei in su Buddusò, funt is portieris; fradibi miu, Marco Canu, chi est puru gopai, giogat in s'Oschirese. Tengiu atrus duus fradibisi chi giogant cumenti a portieris in duas scuadras de sa zona. Teneus su calciu in su DNA (arrit meda), deu giogu de candu seu pipiu»

In questo articolo
Squadre:
Giocatori:
Campionato:
Argomenti:
Stagione:
2019/2020
Tags:
Promozione
Girone A