Su Cràbonia sbatit a pitxus de su Monterotondo: is lazialis bincint sa primu partida de is Ottavi de Coppa Italia po tres a unu

Candu si imbrunchiat nc'est feti una cosa de fai: tocat a si ndi torrai a pesai a lestru, circhendi de cumprendi poita is cosas funt andadas trotas e circhendi, pruschetotu, de imparai in pressi sa letzione. Est cussu chi megant a s'arrepiti in domu de su Cràbonia, a pustis de su tres a unu bodditu in sa primu partida de sa Coppa Italia Natzionali de Eccellenza, contras a i lazialis de su Real Monterotondo Scalo, cun sa partida chi s'est giogada mèrcuis, su bintises de su mesi de friàrgiu.
A nai sa beridadi, is cosas si fiant postas beni po is biancus – brau, chi a su de dexi minudu ant agatau su gol de s'unu a zeru cun Meloni, bravu a si fai agatai scidu po ci tzacai su cropu de conca a pustis de su traballu mannu meda fatu da Gassama, chi at donau s'assist a su cumpàngiu.
A su Monterotondo peròu bastant feti cuatru minutus po torrai a cassai su Cràbonia, cun Lupi chi est su prus lestru de totus e nci ghetat sa bòcia in sa porta po s'unu a unu, a pustis de su pau pigau de Abbondanza, cun dd-unu bellu tiru de atesu meda. Su Monterotondo sighit a curri e a giogai e a su de binticincu minudu agatat su gol de su duus a unu: Mastino atumbat, cun is cambas suas, cussas de Passiatore aintru de s'area de rigore, po s'arbitru non nci funt dudas: de is undixi metrus, Lalli abefat su portieri de su Cràbonia, Fortuna. Is piciocus de Marongiu no perdint sa gana e sighint a ci crei: ci provant Angheleddu e Gassama, chi agatat su tempus e su logu po fai partiri unu tiru, cun Santi chi est bravu meda a nci bogai sa bòcia aforas de su campu. Me is ùrtimus secundus de su primu tempus, Contu tirat ma Palmarucci, unu difensori de su Monterotondo, ndi sciusciat su gol pròpriu in sa linea de sa porta. In su secundu tempus is cosas si faint ancora prus tostadas po su Cràbonia, chi ndi buscat puru su de tres gol, cun Fiorucci chi ndi furat sa bòcia de is peis de Zedda e partit in contropiede, agoa ci penzat Lupi a stampai sa porta de Fortuna. Is duas scuadras sighint a cumbatti fintzas a s'ùrtimu segundu ma is cosas abarrant diaici. Cràbonia e Monterotondo s'ant atobiai torra mèrcuis chi benit, a su Zoboli. Po sighiri a andai a innantis in sa Coppa Italia, su Cràbonia depit bìnci a su mancu po duus a zeru.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020