Salta al contenuto principale
demurtas ghilarza
In sa rosa de is grogus-arrubius dhoi funt puru Marcello Mancosu, Alessandro Boi, Patteri, Galasso e Contu

Su Ilàrtzi currit sèmpiri prus forti in su mercau: nd'arribat puru Stefano Demurtas de su Crabònia

Candu mancant feti cuatru diis a s'acabbu de su mesi de Trìulas, totus is scuadras sighint a trabballai e a murigai po si ndi pigai is giogatoris prus fortis: intzandus is nobas prus callentis, e funt medas, ndi arribant, cumenti a dònnia istadi, de su mercau. Is de su Ilàrtzi, po nd'arremonai una, parint is prus scidus: me is ùrtimas oras is grogus-arrubius ant agatau un acòrdiu cun Stefano Demurtas, chi torrat a domu apustis de sa aventura cun sa màglia de su Crabònia, cun sa bìncida de su campionau e de sa Coppa Italia in buciaca. De sicuru est unu arregalu de importu mannu meda po is duus allenadoris, Massimiliano Pani, torra in panchina po un antru annu, e Guido Fenza, chi ndi lompit apustis de su trabbalu fatu cun is campidanesus de sa Virtus de Santu Sparau. Su centrucampista, classi milli e noicentus norantacuatru, cresciu in Paulle, at a giogai impari, tra is atrus, a Alessandro Boi, un atacanti forti meda nasciu in su duamilla, chi s'annu passau at fatu gol grais meda.

Su Ilàrtzi, si cumprendit, est fadendi is cosas po beni: me is cidas passadas, difati, is ilartzesos ant imprassau puru Marcello Mancosu, chi at giogau, tra is atras, cun su Ceraxius, in Sèrie D, po tres stagionis e mesu; cun su Pavia, in Lega Pro, cun su Gubbio e in sa stagioni de su duamilla e cuindixi \ duamilla e sexi cun su Lumezzane. In su duamilla e sexi \ duamilla e dexiaseti, Mancosu at giogau cun sa Lupa Roma e apustis cun su Catanzaro.
Agoa Mancosu est torrau a giogai in Sardìnnia, cun is de sa Nuorese, ma a mitadi de s'annu si ndi partit ancora in continenti, de is de su Tuttocuoio.
In su duamilla e dexiotu \ duamilla e dexianoi cumentzat cun is de su Sestri Levante, agoa nd'aproillat in Assèmini, po giogau cun sa San Marco, po duus annus, cun su sartidu in Eccellenza e, apustis, sa salvatzioni in s'ùrtimu campionau.
Su Ilàrtzi, in s'interis, iat giai pigau su centrucampista Mauro Patteri, chi ndi lompit de sa Ferrini de Casteddu impari a su portieri Enrico Galasso, e Simone Contu, ex de su La Palma e de s'Arbus.

In questo articolo
Campionato:
Argomenti:
Stagione:
2020/2021
Tags:
Eccellenza