Su TDR, sa Sardigna e s'unidade

Sa rapresentativa juniores est lòmpida in finale in su TDR e at pèrdidu contra a su Lazio. Pecadu. Ca sos pitzinnos de Busanca ant fatu unu torneo perfetu, gioghende a su matessi livellu, si non de prus, cun totu sas iscuadras de sas àteras regiones italianas. Ma non chèrgio faeddare de custu. De tàtica, ischemas e cronoistòria de sas partidas, nde at giai chistionadu cun cumpetèntzia manna su collega Antonello Lai. A mie sa cosa chi mi faghet a pensare sunt sas fotografias de sas garas. Abbaidendelas, casi mi cummovent sas caras, sos bartzos in chelu, sos risos, sa cuntentesa, s'allirghia. Leghide sos nòmenes, abbaidade dae ue benint: da Casteddusardu a Ceraxius, dae Aristanis a Lanusè. Cun s'isport onni distàntzia si mesurat cun su coro e logos chi a bortas nos narant chi sunt atesu intre issos totu in unu s'acostant a pare. Abbaidende cussa màllias su chi bio est chi Sardigna faghet a l'iscrìere in su tretu de sas petorras, comente faghiat a iscrìere Asia, o mundu. Ca cando sos òmines e sas fèminas tenent sos matessi obietivos, totu, finas sas culturas prus diferentes podent èssere castiadas dae un'àtera prospetiva. Abarrende in tretos nostros s'esperièntzia de su pallone e de totu sos isport nos depet fàghere a pensare. Ca s'investimentu nostru diat a dèpere èssere semper in diretzione de sas atividades chi nos ponent paris, comente sardos, comente tzitadinos de custa terra. Cussos pitzinnos, sos juniores, una die ant a èssere mannos e si nde ant a ammentare. Ant a ischire ca sa Sardigna no acabbat a segus de sa contonada de domo, ma chi sighit, finas a sa làcana de su mare, finas a ue at a ischire abbaidare su coro. Tore Cubeddu