Salta al contenuto principale
ferrini camba esulta
Eccellenza: sa Ferrini sighit a bobai sèmpiri prus in artu, sa Nuorese torrat a arrui

S'Usinese bìncit sa Copa Italia, is scuadras de sa Sèrie D ndi cabant in campu po sa primu giorronada

E duncas s'atonzu puru nd'est arribbau, cumenti dònnia annu, a nai sa beridadi, e cun issu nd'est arribbau puru su tempus mau, cun s'acua chi at icumentzau a infriscorai is diis, apustis de totu cussa basca lègia chi in s'istadi pariàt chi si podessit scallai a totus. Chistionaus de su tempus, po incumentzai, poita mi praxit de ammachiai custu fatu de s'intendi, a su mancu po una borta dònnia tanti, animabis (e no feti ominis),e duncas, cumenti totus is atrus animabis etotu, abarraus acapiaus a is cunditzionis de su tempus: candu fait frius meda sunfreus, diaici po sa basca, e no podeus fai atru ca ndi chistionai tra nosus. Po su primu articulu chi scrieus in custu atonzu, duncas, nci teneus, cumenti est sucèdiu me is ùrtimas cidas etotu, una biga manna, unu muntoi de nobas de torrai a contai, scritas in su sardu chi si chistionat in su Campidanu de Mesu e, duncas, innoi in Bidd'e Sorris puru, chi est su logu, sa bidha innoi seu cresciu, de candu seu nasciu. E duncas si seus lassaus a is pabas un antru bellu domìnigu, prenu de partidas: is scuadras de s'Eccellenza, difatis, funt cabadas in campu po sa de duas giorronadas de su campionau de su duamilla e bintunu \ duamilla e binti-duus, impari a is scuadras sardas chi currint in su campionau de sa Sèrie D, chi ant giogau po sa primu partida. Una de is nobas de importu prus mannu, 'tendei 'tendei (diaici si narat in bidha mia, candu unu intendit una noba, unu contixedhu chi arregalat ispantus e afrodhiu), est chi, apustis de giai un annu, funt torraus a partiri puru is giogus po is scuadras de sa Promotzione, cun sa batalla tra is de s'Usinese e is de sa Macomerese chi ballit po sa finalissima de sa Copa Italia de su duamilla e binti, chi ndi est stètia sciusciada, cumenti scieus beni, po crupa de su tialu de Covid. Candu mancant feti ses diis po torrai a partiri cun is partidas de sa Promotzione, e de sa Primu Categoria puru, si parit unu bellu modu (seus chistionendi sèmpiri de sa batalla de sa Copa Italia, est craru) po torrai a bivi, e a gosai, de totus is fainas e is atividadis chi festus costumaus a sighiri me is annus passaus. Diaici, is domìnigus po is tifosus sardus de bòcia ant a torrai a essi arricus, e prenus de prexu, e de custu ndi seus cuntentus nosu puru de su Diario Sportivo, est craru, chi de su chi sucedit me is campus innoi si giogat a bòcia nci biveus, dhi naraus diaici. Ma nc'est una cosa chi m'iat a praxi a torrai a arrepiti, e chi tengiu badda badda in conca, est berus, de una bella pariga de cidas: eus arremonau totu una biga de fainas bellas e de importu (no si podeus scaresci chi su sport, dhi naraus diaici, est una atividadi chi no serbit feti a fai spàssiai sa genti, ballit po is mannus e mescamente po is piciochedhus prus piticus), ma serbit puru po mantenni in saludi su corpus, e su ciorbedhu puru, est craru; is partidas de su domìnigu, peròu, serbint puru a fai atobiai is cristianus fra de issus, dhi naraus diaici; in certas bidda, mi contàt una piciochedha chi bivit in Ruinas, s'unicu modu po podi biri genti strangia est cussu de andai a su campu a castiai sa partida de su domìnigu. Me is annus passaus, est custa sa chistioni de importu prus mannu, a su mancu diaici mi parit de cumprendi, is cristianus si atobiant fra de issus puru po is festas de is bidhas (is festas funt sèmpiri stètias, de annus e annus, unu de is modus po ndi pesai amoris e amigantzias nobas) e puru candu nci funt cussus chi tzerriaus spetàculus, ballit po su teatru e ancora de prus, fortzis, po is cuncertus in pratza e po is badhus. E funt pròpriu is festas de is bidhas, impari a is cuncertus, is atividadis chi ancora no funt torradas a partiri e no scieus diaderus, a su mancu po immoi, candu is cosas ant a torrai a essi cumenti festus costumaus a dhas bivi. De seguru scieus chi is de su Guvernu funt sighendi a nai chi su vacinu est una de is cosas de importu prus mannu po torrai a sa vida chi totus s'arregodaus, chenza arriscus po sa saludi; nc'est de nai puru chi de sa metadi de su mesi de Làdamini, est a nai de su cuindixi, su Green Pass (diaici dhu ant tzerriau is de su Guvernu: seus chistionendi, est craru, de su certificau chi pertocat su Covid o, po dhu nai mellus, su certificau chi tocat a totus cussus chi ant fatu sa puntura de su vacinu o a totus cussus chi si ndi funt buscaus sa mobadia e ndi funt sanaus) at a benni a essi un obbrigu po podi trabballai, est a nai po brintai me is logus innoi trabballaus, ma is condierras no ammancant e, custu est pagu ma seguru, ant a andai ainnantis po un antru bellu paghedhu. In s'interis chi in Italia seus circhendi de si ndi scabulli de totu custu arriori lègiu, a mei mi prangit su coru, poita po su segundu annu de sighiu nd'at a sartai sa festa de Sant'Arega, in Deximumannu, chi est (o ia a depi nai fiat?) sa festa chi, prus de totu, m'allirgàt sa vida. Ma torraus a nosu, e duncas si nci ghetaus in cussu mari de nobas chi pertocant su mundu de sa bòcia, e boleus pròpriu partiri de sa finalissima de sa Copa Italia de Promozione, chi eus giai arremonau ainnantis. E duncas, apustis de un annu e mesu, is de s'Usinese e is de sa Macomerese si funt atobiaus in Tiesi po si gherrai sa bìncida de sa partida chi ballit po sa Copa e chi si depiàt giogai, in d'unu primu tempus, su catodixi de su mesi de Martzu de su duamilla e binti, duas cidas apustis de s'incomintzu de totu custu dannu mannu acapiau a su Covid. Fadendi su contu de cumenti funt andadas is cosas s'annu passau, cun is giogus chi funt stètius torra sciusciaus a sa fini de su mesi de Làdamini (e nosu, est craru, isperaus chi cust'annu is cosas potzand andai mellus), po cust'annu is de su Cumitau Regionali ant scerau de no fai partiri is giogus po sa Copa Italia de su duamilla e bintunu \ duamilla e binti-duus, circhendi peròu, a su mancu, de ndi recuperai sa partida de s'annu passau, e diaici funt andadas is cosas. Is duas scuadras, tra is atras cosas, po cust'annu, seus chistionendi po su chi pertocat is campioaus, est craru, ant a curri in duas listas diversas: is de sa Macomerese funt in sa "Lista B", is de s'Usinese, invecias, funt stètius postus in sa "Lista C". Is biancus-asullus de sa Macumerese, chi funt sighius sèmpiri de Massimiliano Mura (chi est s'allenadori de sa scuadra de Macumere giai de una pariga de annus de sighiu) ant fatu unu trabballu bonu meda in sa fentana de su mercau in s'istadi, cun s'arribbu de Ninu Pinna, po su chi pertocat s'atacu, cun su giogadori chi nd'aproillat apustis de is stagionis cun sa camisedha de is de su Bosa; impari a Pinna nd'est arribbau puru Giuseppe Pitruzello, unu centrucampista chi at giogau me is ùrtimus annus cun is de su Valledoria; in porta, invecias, torrat Gianluca Nieddu, chi s'annu passau at giogau, pagu meda, a nai sa beridadi, cun is de su Logusantu. Po su chi pertocat is arrubius-brau de s'Usinese, invecias, una de is nobas de importu prus mannu pertocat s'arribbu de s'allenadori nou, Luca Calledda, chi ndi pigat su postu de Giampiero Loriga, chi in s'interis d'at acabbada, apustis de duus annus de trabballu, a sighiri is de s'Ossese, chi currint in su campionau de s'Eccellenza. Calledda at trabballau, invecias, tra is atras, cun is de sa Sogma e is de su Fiolinas, ma at fatu esperièntzias togas cun is scuadras de is piciochedhus de su Porto Torres, de su Latte Dolce, in Tattari, e cun is de sa Torres puru. Is de s'Usinese in sa fentana de su mercau de custa istadi no funt abarraus a castiai is atrus, de seguru, ma si funt acapiaus cun d'una bella pariga de giogadoris nous, partendi de is difensoris Giuseppe Daga (chi nd'aproillat de su Latte Dolce) e Francesco Zichi, chi at giogau me is ùrtimus annus cun is de s'Ossese. Po s'atacu, invecias, nd'est torrau unu giogadori forti cumenti a Domenico Saba, chi at giogau me is ùrtimus duus mesis impari a is de s'Ossese, in su campioau de s'Eccellenza a otu scuadras, bintu, a sa fini de is giogus, de is de s'Atletico de Uri, cumenti si arregodaus beni. Po su chi pertocat s'atacu, nd'est aproillau puru Michele Pulina, unu de is giogadoris prus fortis chi nci funt in dì de oi in Sardìnnia, chi at giogau impari a is de su Latte Dolce, in Sèrie D, ma feti po una pariga de bessidas, e at fatu esperièntzias de importu mannu me is campionaus de sa Sèrie C, de s'Eccellenza e de sa Promotzione, cun is campionaus giogaus cun sa camisedha, tra is atras, de is de su Sorso e de su Istintinu. Sa partida, duncas, s'est serrada, ma feti apustis de is noranta minudus de giogu (cussus chi in italianu tzerriaus "tempi suplementari"), cun sa bìncida de is de s'Usinese, gràtzias a su gol fatu de Emanuele Pazzola, unu giogadori nasciu in su duamilla e unu, chi iat fatu sa primu partida in Eccellenza cun sa camisedha de su Sorso, candu s'allenadori fiat Pierluigi Scotto, in su duamilla e dexiotu \ duamilla e dexianoi. Custa duncas, cumenti eus giai nau ainnantis, est stètia sa primu partida de duas scuadras chi currint in su campionau de sa Promotzione, e immoi speraus chi is cosas potzant sighiri a andai ainnantis chenza strobus o dannus. Is campionaus, cumenti eus giai nau, ant a torrai a partiri su binti-ses de su mesi de Cabudanni, est a nai domìnigu chi benit: po cust'annu is de su Cumitau Regionali ant decidiu de nc'aciungi un'antra lista a is duas chi fiant costumaus a ndi pesai me is annus passaus (una po is scuadras chi s'agatant in su Sud de sa Sardìnnia e una po is scuadras chi s'agatant in su Nord de sa Sardìnnia), duncas po tres listas in totu; custu po circai de ndi pesai campionaus cun prus pagus partidas de giogai, po tenni, aici, prus tempus, chi is cosas depessint andai mabi, po torrai a recuperai cussas partidas chi ndi depessint sartai po crupa de su virus. Su campionau, intzadus, s'at a serrai su dexi de su mesi de Abrili, est a nai sa cida ainnatis de sa cida santa, chi est cussa de sa Pasca manna. Po su chi pertocat is partidas de s'andada, custas ant acabbai su dexianoi de su mesi de Idas, est a nai sa cida ainnantis de sa Paschixedha. No nc'ant a essi partidas aintru de sa cida, cumenti sucedit invecias po is de s'Eccellenza, chi ant a cabai in campu, tra is atrus, puru s'otu de su mesi de Idas, su trinta (est a nai sa dì ainnantis de s'ùrtima dì de s'annu) e su ses de su mesi de Gennàrgiu, chi est sa dì de sa festa de sa Befana. Is de sa Promotzione, invecias, ant a giogai sa primu partida de s'annu nou, est a nai de su duamilla e binti-duus, de domìnigu, su noi de Gennàrgiu. No nc'ant a essi partidas de giogai, invecias, nè po cussus de sa Promotzione e nemmancu po cussus de sa Primu Categoria, po su binti de su mesi de Friàrgiu, chi at a essi, impari a su domìnigu de su binti-ses de su mesi de Idas, e a su domìnigu de su duus de su mesi de Gennàrgiu, s'unicu chenza bòcia. Apustis de essi nau totu custu, no s'abarrat, po s'articulu de custa cida a su mancu, che andai a castiai cumenti funt andadas is cosas po is scuadras sardas chi currint in Sèrie D e po totus cussas chi si dha gherrant in su campionau de s'Eccellenza. In su "Girone G" nci funt seti scuadras (in totu funt dexiotu) chi ndi lòmpint de sa Sardìnnia; po sa primu giorronada (cussa de dòminigu passau, est craru) de sa stagioni noba, nci funt stètius tres "derby" (po manigiai unu fuedhu ingresu, chi ballit po totus is partidas chi si giogant tra scuadras de sa pròpriu citadi o de sa pròpriu bidha, ma po sa chistioni nosta ballit puru po is scuadras de sa pròpriu regioni): sa partida tra is de su Crabònia e is de su Latte Dolce, po incumentzai, cun is tattaresus chi si ndi funt pigaus su primu puntu de sa stagioni noba, gràtzias a s'unu a unu pesau me is noranta minudus de giogu, cun su gol de Cannas, apustis de una pariga de segundus de giogu, chi at ghetau in aranti is allenus, ma is de domu ant cassau su gol de su parègiu cun Gjuci, unu de is giogadoris chi ant giogau mellus, fadendi su contu chi at puru pigau in prenu sa traversa cun unu tiru bellu meda. Acabbat cun su resultau de duus a duus sa partida, toga e bella meda, tra is de s'Altzaghena e is strangius de su Lanusè: is meris de domu arrannescint a aciapai su gol po duas bortas cun Kacorri, ma Ravanelli e Lazazzera arrespundint po duas bortas a is biancu-birdis e arregallant unu bellu puntixedhu a Nappi, chi peròu boliàt incumentzai sa stagioni noba cun una bìncida. Festa manna invecias in domu de is de su Murera, chi in domu cosa insoru bincint sa batalla contra a is de s'Atletico de Uri, po una de is partidas prus togas de totu su domìnigu: Mereu aciapat su primu gol po is de domu, ma is allenus artziant sa conca gràtzias a is gol fatus de Calaresu e, apustis, de Altolaguirre. Is de su Murera peròu arrespundint cun Mancosu, chi fait su gol cun unu tiru de is undixi metrus, e giai a sa fini de sa partida cun Nurchi, chi arregalat diaici is tres puntus a sa scuadra cosa sua. Andat mabi, invecias, sa primu bessida po is de sa Torres, chi in domu cosa insoru no nci dha faint a cassai sa bìncida in sa batalla contras a is de su Giugliano: is tres puntus tocant intzandus a is allenus, chi agatant su gol cun De Rosa. Po su chi pertocat s'Eccellenza, invecias, fini de cida prenu de afrodhiu fintzas a cucuru po is castedhaius de sa Ferrini, chi s'agatant a su primu postu de sa lista gràtzias a is tres puntus bodditus in sa partida, chi s'est giogada sabudu a merì, contras is allenus de s'Ossese: is meris de domu aciapant su primu gol gràtzias a sa giogada de D'Agostino, ma is de s'Ossese arrespundint cun Gueli. Is castedhaius intzandus faint atrus duus gol, cun Camba, tra is giogadoris chi ant giogau mellus. A sa fini nci penzat Argiolas a serrai is contus cun su de cuatru gol. Bincint in domu cosa insoru is cuartesus de su Sant'Aleni puru, cun is duus gol fatus de Mboup, in sa batalla contras a is de su Budune, chi abarrant diaici, est craru, a buca asciuta; sighint a bobai is de su Taloro de Gavoi, chi in domu donant un antru disprexei lègiu meda a is de sa Nuorese, cun is nùgoresus chi no funt partius cumenti bisànt, custu est pagu ma seguru: giai aforas de is giogus in sa Copa Italia e chenza puntus apustis de centu e otanta minudus de campionau. Sa partida si serrat cun su gol firmau de Littarru, chi est sighendi a giogai beni meda e in dì de oi est unu de is giogadoris prus in saludi chi nci funt in domu de su Taloro. Festa manna puru po is de su Gùspini, chi si ndi pigant is tres puntus chi dhoi fiant badda badda in sa batalla contras a is arthanesus de s'Idolo: su gol arribbat gràtzias a una giogada de Fadda. Bìncida afora de domu, de importu mannu mannu meda, po is de su Bosa, chi si ndi pigant is tres puntus gràtzias a su tres a duus scutu in facci a is de s'Ilvamaddalena: Tapparello e Cacheiro faint bobai is meris de domu, ma is allenus no abarrant a castiai is aversàrius e furriant is cosas cun Ongania e is duus gol fatus de Coquin. Domìnigu bellu e druci puru po is de s'Asseminese, chi ndi artziant a Tattari po giogai contras a is meris de domu de su Li Punti e si ndi pigant is tres puntus, est a nai sa bìncida, sa prima in sa stagioni noba, cun is gol fatus de Mattea e Ceresetto. Si serrant invecias chenza nisciunu gol is batallas tra is de s'Arbus e is de su Ghilarza, e tra is de su Poltu Ridundu e is campidanesus de su Muristeni, cun is piciocus sighius de Manunza chi torrant in su Campidanu de Mesu cun su primu puntixedhu de sa stagioni. Acabbat cun unu parègiu, ma cun su resultau de unu a unu, sa partida tra is de su Castiadas e is allenus de sa Villacidrese, po una de is batallas de importu prus mannu de sa giorronada: Figos agatat sa giogada giusta e cassat diaici su primu gol, ma Santoro arrespundit apustis de centu e binti segundus cun su gol chi serrat sa chistioni.

 

Attività realizzata col contributo della Regione Sardegna. IMPRENTAS 2020-2021. LR 22/2018 art. 22

In questo articolo
Squadre:
Campionato:
Argomenti:
Stagione:
2021/2022
Tags:
Eccellenza