Salta al contenuto principale
pallone fermo serie a dilettanti
«Istadius obertus giai de su mesi de Cabudanni? Iat a essi bellu ma at a essi difìcili»

Is timorias de Gravina: «Nc'est meda de traballai apitzus de is règulas de sighiri; su mundu de is diletantis arriscat de si ndi sciusciai»

Nisciunus, in dii de oi, podit diaderus sciri candu ant a torrai a partiri is giogus: nd'eus giai arrexonau meda me is urtimus artìculus, de su restu, ma sa chistioni iat a podi abarrai in peis po totu su mesi de Agustu puru. Po su presidenti de sa FIGC, Gabriele Gravina, is timorias no ammancant de siguru, pruschetotu pentzendi a su mundu de is diletantis, chi iat a podi sunfriri, meda prus de is professionistas, est craru, po sa chistioni de cussu chi tzerriant "protocollo sanitario".

«Su mundu de sa bòcia — contat Gravina — tenit timorias e pentzamentus grais meda po cumenti funt andendi is cosas apustis de su lockdown e, pruschetotu, po su chi pertocat s'incumintzu de sa stagioni noba. Scieus giai chi cincu - sesi scuadras de sa Sèrie A de is feminas funt in ritiru e funt cichendi de arrispetai totus is règulas chi ballint po is professionistas, ma si cumprendit beni sa cantidadi de sacrifìcius chi funt fadendi, no feti po su chi pertocat su dinai, est craru».

Is de sa FIGC, impari a is dotoris chi sighint sa faina po contu de su Guvernu, ant a depi agatai unu modu po aderetzai is cosas. «Scieus giai— aciungit agoa Gravina — chi nc'at a essi meda traballu de fai, poita is règulas chi nci funt imoi no podint andai beni po is diletantis, e no seus chistionendi feti de is chi giogant a bòcia, ma est una chistioni chi ballit po totus. Su sport in Italia arriscat de si ndi sciuciai».

In s'interis, is de sa Sèrie A funt arrannescius a acabai is giogus, mancai chenza genti, est a nai is tifosus, a castiai sa partida. «Seus traballendi meda e arrexonendi a totu dii apitzus de custa chistioni puru: is timorias nci funt, no dha sas podeus cuai, ma obeus agiudai is de su Guvernu, is ministrus Speranza e Spadafora, po nd'arremonai duus, donendi mancai calincuna bidea, calincuna solutzioni. Nosu seus sigurus chi is istàdius ant a torrai a oberri chitzi, sèmpiri chi is numerus apitzus de su spaniamentu de su virus si dh'ant a permiti».

Poi serrat sa chistioni: «Istadius obertus giai po sa primu giorronada de sa Sèrie A, su dexianoi de su mesi de Cabudanni? Iat a essi bellu, ma in dii de oi mi parit una cosa difìcili».

In questo articolo
Campionato:
Argomenti:
Stagione:
2020/2021