In totu Europa is giogus si frimant: ballit po sa bòcia cumenti po is machinas de sa Formula 1

Su spaniamentu de su tiau de Coronavirus non est una chistioni chi ballit feti po s'Italia, est craru, ma tocat, in dii de oi, totus is status de s'Europa. In s'interis chi in domu nosta seus circhendi de cumprendi cumenti agiudai is apuntoraus, sperendi chi potzant a essi sempri prus pagu, mancai in tempus lestrus, me is atrus logus funt fadendi a su pròpriu. Tra is chistionis chi baddant in custus tempus legius, nc'est de sicuru cussa acapiada a su sport, chi benit peròu apustis de sa saludi de sa genti. Eus giai chistionau, in custu giassu atotu, de s'Europeo, chi s'at a giogai in s'istadi de su duamilla e bintunu, e de is Olimpiadi, chi de sicuru no ant a partiri in su mesi de làmpadas de su duamilla e binti. Non si sciri nudda, invècias, de is partidas de Europa League e Champions League, chi no ant a benni peròu in su mesi de maju cumenti a dònnia annuu e nisciunus, a narai sa beridadi, at ancora cumprendiu cumenti ant a acabai is cosas. Custu duamilla e binti, si cumprendidi beni su poita, no est stètiu un annu fortunau po su sport: fintzas a imoi funt giai sataus, tra is atrus, su Torneo de Viareggio de bòcia po is scuadras Primavera, chi depiat partiri su sexi de martzu; impari a su Torneo delle Regioni, chi depiat partiri su binticuatru de Abrili, cun is rapresentativas de Giovanissimi, Allievi, Juniores de sa Sardìnnia chi si fiant atobiendi de diora. Su ciclismu puru at tentu dannus po crupa de su Coronavirus: su Giro d'Italia non at a partiri su noi de maju; po su giogu de su tennis, invècias, su virus at sciusciau is Internatzionalis de Roma, chi depiant partiri su cuatru de su mesi de maju, fintzas a su dexiaseti. Si studant puru is màchinas de sa Formula 1: non est partida sa cursa in Australia de su cuindixi de su mesi de martzu e non s'at a curri ne in Melbourne, ne in Cina, in Shanghai, su dexianoi de su mesi de Abrili, ne in su Principato de Monaco, su binticuatru de su mesi de maju. Po is cursas de su Bahrain, de su Vietnam, in Hanoi, de s'Olanda e de Barcellona s'at a biri ita at a sussedi me is tempus chi ant a benni.

Attività realizzata col contributo della Regione Sardegna. LR 22/2018 art. 22, comma 2. Avviso 2019-2020