Salta al contenuto principale
Angelo Borrelli
«Is crais funt me is manus de is dotoris: custa at a essi una batalla traballosa»

Totu Italia est abetendi novas bonas; Borrelli peròu sfridat is afroddius: «In domu a su mancu po un'antra pariga de cidas»

Cun totu s'Italia ancora serrada in domu, a su mancu fintzas a su primu de Maju (est cussu chi timeus), e cun cussa chi tzerriant sa “Parti duus” de sa corantena chi iat a podi partiri me is cidas chi ant a benni in su benidori, in dii de oi no scieus ancora candu eus a podi torrai a bivi cumenti fadestus ainnantis de su spaniamentu de su Coronavirus, chistioni chi ballit, est craru, po su sport, in generali, e duncas po su mundu de sa bòcia puru.
In totu custu carraxu, po cumprendi calincuna cosa in prus, no podeus fai atru chi s'apicai a is nobas chi nd'arribant de su Guvernu e, a sighiri, de is Federatzionis.
Est sempri sa pròpriu cantzoni, si cumprendit, ma de prus po imoi no si podit fai.

Angelo Borrelli, chi est unu de cussus chi sighint is chistionis e pigant is detzisionis in sa “Protezione Civile”, est stetiu craru meda. «Po imoi — at scoviau Borrelli in d-una ciaciarrada a sa radio — no podeus ancora nai candu at a acabai sa primu parti de sa corantena. Est una cosa chi dipendit de cumenti andat su spaniamentu de sa mobadia e de cumenti arrannesceus a sighiri e sanai totus is apuntoraus. Is crais funt me is manus de is dotoris, chi ant a depi arrexonai apitzus de is numerus. De su restu, su Presidenti de su Consiglio est stetiu craru meda: eus a sighiri diaici a su mancu fintzas a su trexi de su mesi de Abrili, apustis s'at a biri».

Su bisu de nci torrai a stupai aforas de domu (chi po imui est su disìgiu de mannus e, pruschetotu, piticus) giai de sa primu dii de su mesi de Maju est studendisindi drabessi.
«No creu ca custa batalla diaici traballosa chi seus cumbatendi at a spaciai in binticincu diis — aciungit Borrelli e comentecasiat s'at a tocai a sighiri cun is sacrìficius».

Est a nai, po nd'arremonai una, chi eus a depi abarrai atesu s'unu de s'antru a su mancu de unu metru, aturendi atentus a no s'imprassai e no si basai, cosas chi attumbant, tra is atrus, pròpriu su mundu de sa bòcia.

In questo articolo
Campionato:
Argomenti:
Stagione:
2019/2020
Tags:
Coronavirus