Salta al contenuto principale
sat'elena esultanza
Is scuadras sardas abetant de ndi cumprendi de prus po cuncodrai su preparamentu

Una precunta imbuddidat su mesi de Agustu: candu ant a torrai a partiri is giogus?

Seus intraus, giai de cuatru diis a nai sa beridai, in su mesi de Agustu, su prus callenti de totu s'annu: is scuadras, ballit po cussas de sa Lega Pro e de sa Sèrie D, fintzas a arribai a is de sa Secunda Categoria, funt sighendi a murigai in su mercau po ndi pinnigai is giogadoris prus fortis, pentzendi giai a su campionau chi at a benni, cun su disigiu de torrai in campu a giogai chi no est mai stetiu diaici mannu e forti, contendi, pruschetotu, chi su duamilla e binti est stetiu mali fortunau po su chi pertocat su mundu de su sport, ma no feti, e dhu scieus.

Totu beni, duncas, fintzas a imoi, ma in s'interis nc'est una precunta chi est incumintzendi a atrotoxai is ciorbedus de is giogadoris, is allenadoris e totus is presidentis de is assotzius sportivus: candu ant a torrai a partiri is partidas? In dii de oi no si sciri ancora nudha, ma podeus cicai de ndi cumprendi calincuna cosa in prus fadendi duus contus.

Me is cidas passadas, difatis, seus benius a sciri chi sa Sèrie D at a torrai a partiri s'ùrtimu domìnigu de su mesi de Cabudanni, est a nai su bintiseti, cun sa Coppa Italia chi s'at oberri sa cida ainnantis, su domìnigu de su binti.

Cun is cosas cuncodradas diaici, is diletantis, cun is de su campionau de Eccellenza in primu fila, iant a podi torrai a incumentzai cun is fainas giai de is primu cuindixi diis de su mesi de Ladàmini. Scieus puru chi cussu chi tzerriant "stato d'emergenza" at a sighiri a su mancu fintzas a mitadi de su mesi de Ladàmini: est craru, a custu puntu, ca su spaniamentu de su virus (su numeru de is apuntoraus in medas logus est torrendi a artziai) at a essi una chistioni de importu mannu meda po su benidori.

Is scuadras, intzandus, funt abetendi de ndi cumprendi calincuna cosa in prus: sa prima cosa de decìdiri at a essi candu torrai a incumentzai cun su "preparamentu atleticu" de is giogadoris, ma po immoi is cosas funt ancora pagu craras po di podi nai calincuna cosa de siguru.

In questo articolo
Campionato:
Argomenti:
Stagione:
2020/2021
Tags:
Eccellenza