Salta al contenuto principale
paolo rossi

Adiosu a Paolo Rossi, unu de is giogadoris italianus de bòcia prus fortis de totus is tempus

Is ùrtimus fueddus in sardu campidanesu, a su mancu po custa cida, dhu sus arregalaus, chi si podit narai diaici, a Paolo Rossi, unu de is prus grandus giogadoris italianus de bòcia de totus is tempus, chi si nd'est andau de custu mundu, concas a su cielu, pròpriu custa notti passada, po crupa de cussa  mabadia (diaici dha tzerriant is becius de sa bidha mia, chi dha timint diaici meda, a su mancu parit, de no arrannesci mancu a dha arramonai cun su nomini chi d'ant donau is dotoris).

S'iat a praxi, mancai feti po una pariga de segundus, a si nd'arregodai, in custu duamilla e binti diaici marigosu e totu ghetau apari (chi at fatu dannus mannus meda in sa vida de sa genti), ca s'omi, de candu s'agatat in sa Terra, est sèmpiri "sugetu a milli mabadias" (cumenti naràt su poeta Cubeddu), poita benit a essi unu de is animabis prus dilicaus chi nci siant, mancai, de conca, siat su prus abbili e inteligenti. A bortas, fortzis, s'omi abarrat tropu scidu puru, ca parit giai chi totu cussa biga de pentzmentus chi si portaus avatu no nci capat prus in sa conca, e intzandus incumentzant is daboris. E, a bortas, giai si ndi scaresceus, mancai, de tenni unu coru puru, e no feti su crobedhu.

Torraus duncas a Paolo Rossi, chi est stetiu imprassau de sa morti feti cuìndixi diis apustis de un antru grandu campioni de su sport, seus chistionendi, est craru, de Diego Armando Maradona.
Rossi, chi fiat nasciu su binti-tres de su mesi de Cabudànni de su milli e noicentus cinquanta-ses, teniat feti sessanta-cuatru annus. Is sportivus italianus (ma ballit puru po cussus de is atrus logus de s'Europa), dhu stimànt mescamente po su chi iat fatu a is campionaus de is Mondialis de su milli e noicentus otanta-duus, chi si funt giogaus in Spagna, innoi iat fatu calincunca cosa cumenti a ses gol: addiritura tres contras a su Brasili, scuadra forti meda chi teniat in sa pròpriu rosa, tra is atrus, duus grandus campionis cumenti a Zico e Socrates; duus gol contras a sa Polonia de Boniek, in s'urtima partida innantis de sa finali, e a apustis, duncas, contras a is tedescus de Rummenigge, cun sa Germània chi nd'iat buscau tres gol in totu.

Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Campionato:
Argomenti:
Stagione:
2020/2021
Tags:
Paolo Rossi