Salta al contenuto principale
Cagliari Serie A

Arribant atras novas bonas po is de sa Sèrie A: su trexi de su mesi de Làmpadas iant a podi torrai a partiri is giogus

Su mundu de sa bòcia, po imoi seus chistionedi feti de is professionistas de sa Sèrie A ma isperaus de podi nai chitzi su pròpriu puru po cussus de sa Sèrie B, sighit a curri, naraus diaici, conca a sa luxi: apustis de sa noba bessida aforas me is urtimas diis, apitzus de is allenamentus in trumas mannas, chi ant a podi torrai a incumentzai lunis chi benit, su dexiotu de su mesi de Maju, est arribada puru cussa apitzus de is datas po torrai a partiri cun su campionau, po su prexu mannu de totus is tifosus.

Is de sa Lega, difati, chi si funt atobiaus pròpriu ariseu impari a totus is presidentis de is sotziedadis, ant scerau su trexi de su mesi de Làmpadas cumenti a su primu domìnigu bonu po torrai in campu po is partidas. Is giogadoris, diaici, ant a tenni totus su tempus po traballai e si ponni torra apostu, poita funt frimus de su dexi de su mesi de Martzu e no podint arriscai de si ingolli o, peus ancora, de si strupiai, pruschetotu chi pentzaus chi nc'ant a essi partidas dònnia tres diis e si cumprendit beni s'istrachesa e su fadiori chi ant a podi tenni.

In s'interis, est a su mancu cussu chi bisaus totus, su numeru de is apuntoraus de su virus iat a podi sighiri a ndi cabai.

Is scuadras de sa Sèrie A iant a bolli serrai is giogus in su mesi de Trìulas o, mancai, in su primu domìnigu de su mesi de Austu. Spaciaus is campionaus, nc'iant a depi essi de giogai puru is ùrtimas partidas de sa "Champions League" e de s'"Europa League"; est cussu, a su mancu, chi iant a bolli fai is de sa Uefa, chi funt stetius sèmpiri crarus in custu sensu.
Po s'Italia, ant a curri Juventus e Napoli, chi depint ancora giogai sa partida de sa torrada de is otavus: is biancu-nieddus si dha depint biri contras a cussu de su Lione, is asullus, invècias, contras a is ispagnolus de su Barcellona. S'Atalanta, in s'interis, est abetendi de connosci su nomini de sa scuadra chi at a depi atobiai po is quartus de finali.
In Europa League, nc'ant a essi is partidas tra is de s'Inter e su Getafe e tra sa Roma e cussus de su Siviglia.

In questo articolo
Campionato:
Argomenti:
Stagione:
2019/2020
Tags:
Coronavirus
Serie A