Ceraxius a su primu postu de sa lista; Uda e Academia Sulcitana a s'ùrtimu postu e cun s'allenadori nou: custas funt is novas chi nd'arribbant de sa Lista A de su campionau de sa Promotzioni

E duncas, seus sighendi a curri in su mesi de ladàmini, chi mi permiteis de ddu narai diaici, e chi mi permiteis de atacai cun s'artìculu de custa cida cun custus fueddus; e cumenti s'apu narau giai sa cida passada, de su restu, custu benit a essi, a su mancu po mei, a su mancu po su chi mi pertocat, su perìodu prus druci (o po ddu narai mellus puru, unu de is perìodus prus drucis chi nci funt aintru de s'annu), ca cumenti ndi torrat s'atonzu, intzandus mi torrant is energias, is fortzas e, cumenti si narat, mi torrat su sangui a conca. 

E duncas, eia, po immoi, no potzu fai atru ca torrai gràtzias a su Cielu (cumenti fatzu fatu fatu de su restu, e chi eis lìgiu a su mancu unu de is artìculus chi nd'apu bogau aforas po is novas de su Diàriu Sportivu in custus ùrtimus duus – tres annus, scieis beni de ita deu chistionendi) po su fatu de mi intendi beni po oi puru, po custa cida puru, est a narai chentza daboris e chentza de arroris de mi depi scroxai. 
E duncas, eia, chi pròpriu si ddu depu narai, deu creu ca no depeus circai a su Cielu (o a Deus, po chini nci creit, est craru) feti candu stadeus mabi, ma puru e mescamente po totus is diis chi si capitat de bivi chentza de strobbus (chentza de strobbus tropus mannus, si iat a podi narai diaici puru, po si cumprendi mellus a pari), e chentza de dannus, ca a bortas bastat diaderus sa metadi de unu mesu segundu (chi mi permiteis de brullai unu pagheddeddu cun is fueddus, a trassa de cumenti iat a fai unu poeta, prus ca unu giornalista sportivu) po si ghetai a pari sa vida; a bortas bastat a ponni mabi unu pei, po si fai un esèmpiu e po circai de si fai a cumprendi mellus de ita seu chistionendi, po dda acabbai totu sciasciau in terra, in centu mila arrogus. E custa, a su mancu po su chi mi pertocat, benit a essi una de is letzionis prus mannas chi apu arriciu in custa vida, e diaici sigu a andai ainanntis, intzandus, cun su coru prenu, fintzas a cucuru, de prexu e de afròddiu, po no essi serrau aintru de unu aposentu de calincunu uspidali, nemmancu po oi, po incumentzai, e torru gràtzias, puru, po tenni sa possibbilidadi, in dì de oi puru, de sighiri su trabballu e is fainas chi mi pertocant, e chi a sa fini mi permitint de bivi in custu mundu, macu e totu ghetau a pari, innoi m'agatu , impari a bosatrus, de calincuna cosa cumenti a corantacincu annus (e megu a chistionai po su chi mi pertocat, mi parrit bastanti craru). 

E duncas, cumenti eis a sciri giai, chi eis lìgiu (cumenti megamu a si narai giai immubagora) a su mancu unu de is artìculus chi ndi pesu in sardu (in su sardu, mescamente, chi si fueddat innoi in su Campidanu de Mesu, e pruschetotu in Bidd'e Sorris, chi est su logu, sa bidda innoi seu stètiu nàsciu e pàsciu, cumenti si narat) e chi ndi bessint aforas in su giàssu de su Diàriu Sportivu, una de is cosas chi fatzu, ainanntis de atacai cun is arraxonamentus apicaus a is istorias chi nd'arribbant de su mundu de is giogadoris diletantis sardus de bòcia, est cussa de andai a fai su contu de su tempus chi est passau e duncas, eia, de su tempus chi seus arrannèscius a si lassai a is pabas. 
E duncas, eia, megamu a si narai, cumenti podeis ligi a solus, ca seus sighendi a curri in su mesi de ladàmini, e custu fini de cida, 'tendei 'tendei, nd'at a arrui su dexi (chi at a essi su sabudu) e s'undixi (chi at a essi, est craru, domìnigu); e custu bollit narai, pruschetotu, ca sa prima fita de su mesi (eia, est a narai is primus dexi diis apitzus de trintunu diis chi nci funt in totu) est giai bella ca papada e giai giai scarèscia (chi mi permiteis de manigiai custus fueddus, cumenti chi fessi chistionendusì de calincuna cosa de papai, a fitas, eia, mancai una truta); e immoi, chistionu po mei, no depu fai atru ca circai de pentzai a una cida a sa borta, chentza de curri cun sa conca e cun is pentzamentus; est a narai, duncas, cumenti s'apu arremonau pròpriu in s'artìculu chi nd'est bèssiu sa cida passada, ca mi iat a praxi a mi bivi dònnia dì de custu mesi chentza de pentzai a cras (cumenti si narat, o a su mancu, cumenti apu sèmpiri intèndiu narai de babbu miu, e mescamente candu deu fia unu pipieddu), chi est una de is cosas chi mi capitat de fai fatu fatu, e chi pròpriu si ddu depu narai, no est una cosa chi mi andat meda, chi mi praxit meda: ca mancai seu passillendi, cumenti mi capitat de fai dònnia dònnia dì (eia, seu cunvintu ca, cumenti narànt is antigus grecus, is antigus aregus, cumenti m'est capitau de intendi, su de passillai unu pagheddeddu dònnia dì, a su mancu binti minudus iant a serbiri, ma deu arribbu a ndi fai fintzas un'ora, un'ora e mesu dònnia merì, potzat fai beni meda a sa saludi. E de su restu, is antigus aregus fadiant siat is esercìtzius po su cropus, est a narai ca andant in palestra issus puru, ma apustis fadiant puru una passillada, poita is duas cosas funt diferentis; una cosa funt is allenamentus, e un'antra cosa benit a essi su de passillai. E de sa cosa, mancai, nd'eus a chistionai torra, e mellus puru, in su benidori), e mi benit de pentzai, ita ndi sciu, po si fai feti un esèmpiu, a sa dì de su Nadali, a su chi mi iat a praxi a fai (e duncas, eia, custus funt arraxonamentus apitzus a su benidori) o a su chi apu fatu, de bonu, de togu, e mancai de spassiosu, me in totus is annus passaus (e custus, eia, benint a essi arraxonamentus apitzus de su passau); e de seguru, deu creu de podi narai custu, chentza de timi de mi sballiai, no seu s'ùnicu, in custu mundu, ca tenit sa conca prena de custus pensus; antzis, deu creu ca custa cosa chi s'apu contau immoi pertochit una cantidadi manna de personas, fortzis prus de su chi potzu e podeus pentzai (e naru "pentzai" chi a sa truma nci aciungu bosatrus e bosatras puru, ca custus artìculus chi ndi pesu ddus ligeis). 
E in prus, si potzu narai ca, de su chi si faint sciri is grandus dotoris chi studiant is cosas chi pertocant sa conca cosa nosta (chi mi cumprendeis po su chi seu circhendi de si narai), candu unu fait unu sbàlliu, in s'interis chi est sighendi una calesisiat faina (e immoi fia de meda chi no manigiamu, e chi no intendia, su fueddu "calesisiat", chi est unu de cussus fueddus chi mi praxint fintzas a m'amachiai, chi pròpriu si ddu depu narai), ddi sucedit pròpriu poita no est pentzendi a su chi est fadendu, ma est pentzendi a s'incras, o a su chi at fatu ariseu (chi mi permiteis de ndi pesai custu arraxonamentu, e sèmpiri isperendi ca si cumprendat su chi tengu badda badda in conca). 
E invècias, su giogu chi seu circhendi de fai deu, pròpriu in custas ùrtimas diis, est pròpriu su de circai de abarrai cuncentrau (cumenti si iat a podi narai, furendindi sa trassa de s'italianu etotu) apitzus de su momentu chi seu bivendi, apitzus de is cosas chi seu sighendi, ca sa conca mia nci ponit pagu meda a si ndi bobai a travessu, mancai feti cun su pensu. 
E duncas, eia, apu fatu custa promissa, a su Cielu ma pruschetotu a mei etotu: apa a provai a mi bivi dònnia segundu, dònnia minudu e dònnia ora de is diis chi nci funt po su chi pertocat su mesi de ladàmini, cumenti chi fessit s'ùrtimu, e duncas, eia, cun atentzioni e cuncentratzioni. 
E de su restu, is cosas po mi intendi allirgu, po mi intendi su coru prenu de afròddiu no m'ammancat de seguru, e gràtzias a su Cielu, mi megu a solu a solu, e fatu fatu puru, ca is cosas bellas aintru de sa vida cosa mia, aintru de custas diis, funt una biga manna; e su giogu prus togu chi fatzu (chi arrannèsciu a fai, po ddu narai mellus puru), dònnia dònnia dì chi su Cielu m'arregalat, est cussu de mi prexai (cumenti si narat innoi in Bidd'e Sorris, cumenti apu sèmpiri intèndiu narai innoi in bidda, a su mancu) fintzas po is cosas bellas prus piticheddas chi agatu: is matas chi tengu in su corratzeddu chi abarrat aranti a sa domitedda innoi bivu, e chi in custu perìodu funt a cabori de unu birdi diaici bellu, craru craru, ca fait ispantus; po no si chistionai de is duus pisiteddus (unu maschiteddu, e una feminedda prus matuchedda) chi benint a m'agatai dònnia dònnia dì (e si iat a podi fintzas narai, eia, ca bivint impari a mei, mancai sa pisitedda prus matuchedda de edadi siat sèmpiri a travessu, e innoi in domu abarrit pagu e nudda, mancai feti po su tempus chi nci ponit a papai su chi ddi dongu), e chi mi faint fintzas cumpangìa in s'interis chi trabballu, in s'interis chi ndi pesu e scriu is artìculus po su giàssu de su Diàriu Sportivu; e arrannèsciu a mi prexai, e meda puru, chi pròpriu si ddu depu narai, fintzas po dònnia folla nova chi ndi bogat aforas sa mata de su limoni chi tengu aranti de sa domitedda innoi bivu; e cun custa mata de limoni, a fai is contus, nci seu bivendi impari de candu seu nàsciu, de candu m'ant portau a bivi in custa domu, est a narai apustis de unu mesi (o fintzas de unu mesi e mesu) chi seu arribbau in custu mundu, ddi naru mancai diaici, fadendi su contu ca seu nàsciu a otu mesis (invècias ca a noi mesis, cumenti iat a depi essi) e duncas, sa primu cosa chi apu bintu, ddi naru diaici, est stètia una bella vacantza, toga meda, aintru de s'incubatrici (cumenti si iat a podi narai, sighendi su chi megat a mi consillai su fueddariu), chi si podit tzerriai puru, in sardu campidanesu (diaici naràt su fueddàriu, a su mancu), màchina frucidora; e chi pròpriu si depu narai sa beridadi, custu fueddu mi praxit meda po cumenti est stètiu pesau; e una de is abbilidadis, ddi naru diaici, ca tenit sa lingua sarda, est cussa de abarrai a su passu cun is tempus; e fadendi su contu de totus is fueddus nous chi ndi bogaus aforas, arrannèsceus a cumprendi, est craru, ca sa lingua sarda est ancora bia (mancai siant in pagus, sèmpiri prus pagus, si iat a podi narai diaici puru, is chi dda manigiant, is chi dda chistionant in su fetianu cosa insoru; po no chistionai, apustis, de is chi dda sciint ligi, e de is chi dda sciint scriri, ca benint a essi sèmpiri prus pagu, e si cumprendit beni cumenti funt andendi is cosas po su chi pertocat custa lega) e duncas est andendi ainnantis, mancai trisia trisia (chi mi permiteis de manigiai custus fueddus). 

E duncas, eia, fia narendusì, torra, ca custu po mei benit a essi unu perìodu tra is prus drucis, e duncas, eia, est po cussu chi apa a circai de fai su giogu de mi bivi dònnia segundu, dònnia minudu, e dònnia ora, cun su massimu de s'atentzioni, chentza de abarrai a perdi tempus pentzendi a su chi apa a podi fai in su benidori (mellus: a su chi mi iat a praxi a fai in su benidori), o a su chi apu fatu in su passau (e mescamente, candu unu si ponit a arraxonai apitzus de su passau, ndi boddit is arregodus de totus is cosas chi ddi funt andadas trotas, prus ca de is cosas chi ddi funt andadas beni). 

E duncas, custu est unu perìodu tra is prus drucis chi nci funt aintru de s'annu, gràtzias, puru e mescamente, a is temperaduras chi est fadendi: po su chi pertocat is massimas, duncas, eia, su tialu de termòmetru sighit a nci spundi fintzas a bintotu – bintinoi gradus, e no funt pagus, e si cumprendit; ma apustis chi ndi cabat su sobi, e fintzas a arribbai a is primus oras de su mengianeddu e de su mengianu puru, e duncas, eia, fintzas a candu no si ndi torrat a pesai beni su sobi, intzandus fait unu bellu friscu, ca estus giai giai podi tzerriai "frius"; ma chi fadeus su contu, e chi pentzaus ca fintzas a unu mesi fait festus giai giai po si scallai de sa basca (cumenti si iat a podi narai, chentza de timi de si sballiai), intzandus gràtzias a is temperaduras chi est fadendi in dì de oi, mi parrit giai giai de bivi in Cielu, de bivi in Paradisu; ca chi dda castiaus in custu perìodu, est a narai de sa metadi de su mesi de ladàmini, s'isula stimmada cosa nosta mi parrit su logu prus bonu de su mundu innoi unu cristianu podit bivi, e mi nd'apa a acatai mellus de custa cosa chi s'apun apena scritu candu apa a imbecciai, e sèmpiri chi su Cielu at a bolli custu beni po mei, ca deu no ddu potzu sciri cumenti ant a andai is cosas in custa vida; e fortzis andat beni a no ddu sciri, ainanntis chi is cosas sucedant. 

E duncas, eia, s'apu arremonau is temperaduras, drucis cumenti a su tzucuru, chi est fadendi in custas ùrtimas cidas: nc'est una bella basca de metadi de su mengianu e fintzas a nc'arriobbai, mancai, a is ses de su merì; e a su noti fait unu bellu friscu, antzis, cumenti m'at fatu a cumprendi Micheli Tamponi, tocat a aturai atentus (e immoi chi cni seu, si nd'arregodu ca Micheli Tamponi est s'allenadori de is de su Tavolara, e chi apu intèndiu a su telefunu pròpriu custa cida, est a narai in custas ùrtimas diis, po ndi pesai una ciaciarrada e po cuncodrai un'intervista, cumenti si iat a podi narai, a trassa de cumenti si narat in italianu etotu) poita custu est su perìodu de s'annu innoi su tempus ti podit frigai, de unu segundu a s'atru; ca aintru de sa dì, e po totu sa giorronada (fadeus de is noi oras e fintzas a arribbai, mancai, a is cincu – is cincu e mesu chi no is ses puru), tenis diaici basca (trinta gradus no funt pagus e antzis, faint prexei meda, fadendi su contu ca fintzas a una pariga de cidas fait su tialu de su termometru nci spundiat fintzas a trintacinu gradus, chi no coranta puru) ca depis abarrai a manigas crutzas, ma apustis, chi no ti imbussas, nci ponis pagu e nudda a ti buscai unu puntori (cumenti est sucèdiu, de su restu, a s'amigu cosa mia, chi s'arremonu fatu fatu, e chi bivit in sa zona de Milanu). 

E duncas, su de podi abarrai cun feti (e parrit una brulla, candu manigiu su fueddu feti) trinta gradus (ca comentecasiat no benint a essi pagus, ma funt, custu est pagu ma seguru, una pariga in mancu, est a narai cincu gradus in mancu, de su chi festus costumaus a s'abertai me is diis de s'istadi, arrori tengiat!) s'agiudat, e m'agiudat (chistionu de mei po primu) a mi bivi mellus custa diis, a ndi pesai su trabballu chi mi tocat a fai chentza de mi fadiai prus de su tanti e, apustis chi serru cun su trabballu, m'agiudat a no mi intendi totu acallellau, o lassau andai, cumenti si iat a podi narai puru. 

E 'tendei 'tendei, sighendi cun sa chistioni acapiada a su tempus chi megat a fai, po custa cida at postu acua, e custu bollit narai ca seus chiostionendi de is previsionis de su tempus po custa cida chi teneus tra is manus, e asuta de is ogus; e duncas, eia, a narai sa beridadi is previsionis pesadas de is grandus dotoris chi sighint custa faina ant intzertau apitzus de su chi est sucèdiu custu martis passau, fadendi su contu ca ant narau ca depiàt proi, e difatis at protziu, e beni puru; e immoi iat a podi torrai a proi puru custu sabudu (su sabudu innoi, in Bidd'e Sorris, si fait sa festa po Santa Vida, cun totu su chi custu cumportat) e mancai puru su domìnigu; e iat a podi a proi a strossas; e totu su chi potzu fai immoi est su de m'augurai, impari a bosastrus, mancai, ca su tempus no fetzat dannus; ca fatu fatu mi nd'arribbant, e m'agatu asuta de is ogus (o aranti a is ogus, chi fortzis cratzat mellus puru) duncas, is fotografias e is filmaus (ddi naru diaici) de is arroris chi su tempus malu at fatu (e est sighendi a fai) me in Spagna, in sa zona de Barcellona etotu, in s'isula de Creta, po su chi pertocat sa Grecia, e in su sud de sa Francia puru; po no chistionai de is arroris chi su tempus malu at fatu in Thailandia, in Cambogia, in Africa (in sa zona de Dakar e, mescamente, me in sa citadi etotu, cun is bias ca funt benidas a essi a trassa de arrius, chi mi cumprendeis po su chi seu circhendi de si narai), in Messico e in Nepal puru (ca candu castiaus is immaginis chi si nd'arribbant de cussus logus, de is logus innoi su tempus malu ndi sciusciat totu, intzandus si parrit de castiai unu de cussus film chi donant a sa televisioni, o a su cinema; e invècias no nc'est nudda de brullai; antzis, immoi chi nci seus deu creu ca nci siat su tanti po augurai a totus is personas chi ant pèrdiu totu su chio teniànt, po crupa de su tempus malu, partendi de sa domu, chi si ndi potzant strantaxai acoitu apustis de custu dannu mannu). 

E immoi, eia, cumenti fia narendusì, a cantu parrit, su tempus malu iat a podi sighiri, innoi in Sardìnnia puru, fintzas a custu fini de cida, est a narai, fintzas a su lunis chi at a benni; isperendi ca is cosas potzant andai concas a su beni, e no concas a su mabi. 

E immoi chi seu arribbau a custu puntu de sa chistioni, e de s'artìculu, intzandus potzu narai, puru, de mi intendi pràndiu, apustis de totus is strollichiminis chi nd'apu bogau aforas de sa conca cosa mia (e gei ddu scieis, de su restu, de sa cantidadi manna meda de legas, e de chistionis, de contus e de contixeddus, chi m'agatu aintru a sa conchitedda dònnia dì; e no sciu no sciu chi custa cosa dipendat de is cosas chi ligu, e chi studiu, o dipendat de is istùdius chi apu fatu a s'universidadi; fadendi su contu ca, cumenti s'apu arremonau giai una bella biga de bortas, apu sighiu su cursu de Filosofia, in s'Universidadi de Casteddu, cun totu su chi custu cumportat), e isperu diaderus de no si nd'essi furau totu su tempus chi mancai no teneis de perdi; ma sa nova bona, po immoi, est ca si podeus incarai (e fiat ora puru, s'at a megai calincunu de bosastrus o, ballit aguali, de bosatras; berus est?) po castiai, de acanta, cumenti funt andendi is cosas po su chi pertocat is campionaus de bòcia chi si giogant innoi in Sardìnnia, tra totus cussus chi ndi benint pesaus de is de sa Federatzioni Italiana de su Giogu de su Càlciu, e de is de sa Lega Natzionali de is Diletantis. 

E duncas, eia, est de una bella pariga de cidas, chi pròpriu si depu narai sa beridadi, chi tengu su disìgiu, ddi naru diaici, de si contai cumenti funt andendi is cosas me in su campionau de sa Promotzioni, e mescamente po su chi pertocat sa Lista A (chi est sa lista innoi s'agatant totus is scuadras de su sud de sa Sardìnnia, e ddu megu a narai po totus cussus chi, mancai, no funt acapiaus a istrintu cun is fainas e is chistionis chi pertocant is campionaus de bòcia, ma chi mancai tenint agradessu de podi ligi calincunu fueddu in sardu o, andat mellus puru, fintzas un artìculu pesau in sardu campidanesu, mancai feti po fai esercìtziu). 
E duncas, eia, si potzu incumentzai a narai, puru, ca chi apa a acudi, apustis de is chistionis chi pertocant sa Lista A de su campionau de sa Promotzioni, intzandus eus a podi andai a castiai puru cumenti funt postas, cumenti funt cuncodradas (po ddu narai mellus puru) is cosas me in su campionau de s'Ecellenza, e me in su campionau de sa Sèrie D puru, e chistionu mescamente de su gironi innoi agataus is scuadras sardas. 

Ma torraus a nosu, duncas. 
A su primu postu de sa lista, apustis chi si funt giogadas cuatru giorronadas (e a castiai is cosas diaici, benit giai giai de narai: gei currit pagu su tempus!) de su campionau, agataus is de su Ceraxius, chi funt sighius de un allenadori bravu, e forti, e cun un'esperièntzia manna a is pabas, cumenti est Antoniu Prastaru; e duncas, fortzis mancu issus s'abertànt, a s'incumintzu de sa stagioni nova (e mi parrit bastanti craru, seus chistionendi de sa stagioni de su duamilla e bintises – duamilla e bintiseti; e si ddu torru a narai: gei mi parrit ca su tempus siat bobendusì, fadendu su contu, mescamente, ca deu apu incumentzau a scriri po is amigus de su Diàriu Sportivu candu festus in su mesi de donniasantu de su duamilla e undixi; e torru gràtzias giai giai dònnia dì, po sa bona sorti chi apu tentu), de partiri diaici beni, e diaici a forti, fadendu su contu (e a fai is contus nci poneus pagu meda), ca is de su Ceraxius funt s'ùnica scuadra chi nd'at cassau sa cantidadi màssima de puntus chi nci fiant de ndi boddiri, e seus chistionendi de calincuna cosa cumenti a doxi puntus; e immoi, custu est pagu ma seguru, is de su Ceraxius funt bivendi unu bisu a ogu obertus, cumenti si iat a podi narai, puru; e deu ddu sciu beni (fadendi su contu, cumenti s'apu scoviau immubagora etotu, ca sigu su mundu de su càlciu de is diletantis sardus de unu bellu arrogu de tempus, de una bella pariga de annus, e naraus "pariga" a sa sarda, mi parrit bastanti craru) cumenti ti intendis su coru prenu de afròddiu candu is cosas ti andant beni; e immoi is de su Ceraxius ant a circai de sighiri a curri in cust'arrastu etotu, po su chi ant a arrannèsci, fadendi su contu, cumenti est craru, ca comentecasiat in campu ndi cabant puru is scuadras de is aversàrius, e no nci funt scuadras, a su mancu in dì de oi, ca faint regalus a is aversàrius (chi mi scusais e chi mi permiteis, intzandus, de fai custu giogu de fueddus chi mi nd'est bèssiu aforas chentza, giai giai, de mi nd'acatai); e custu bollit narai, eia, po incumentzai, ca chi ndi bolis cassai is tres puntus chi nci funt in su pratu (ddi naru diaici, a trassa de cumenti si narat in italianu puru), intzandus depis curri, e fadiai, e meda puru, a partiri de is allenamentus chi ndi pesas aintru de sa cida, e fintzas a arribbai, est craru, a is noranta minudus de sa partida. 

E duncas, si iat a podi narai, puru, ca a is de su Ceraxius totus is cosas ddis funt andendi beni: ca si cumprendit, podis binci una partida gràtzias a unu mesu tiru chi nci scudis concas a sa porta de is aversàrius, ma diaici etotu iast a podi perdi una partida, po crupa de mesu tiru (chi mi cumprendeis po su chi seu circhendi de si narai manigendi custus fueddus) chi ndi ingollis. E duncas, eia, si cumprendit bastanti beni, su de binci is partidas benit a essi, po primu cosa, una chistioni de bona sorti (cumenti si narat: chi sa bòcia no ndi bolit sciri nudda de nci brintai in porta, intzandus tui iast a podi abarrai a giogai po cuatru, cincu, ses oras de sighiu chentza de ndi cassai nemmancu mesu gol, po sighiri cun custu fueddu chi, a su mancu mi parrit de podi narai diaici, cratzat e meda puru po su chi seu circhendi de si contai); ma a sa bona sorti nci depis aciungi sa passioni, sa gana bona, ddi naru diaici, po curri avatu de sa bòcia, mancai prus a forti de su chi faint, de su chi arrannèscint a fai is aversàrius cosa tua (ca sa bona sorti a bortas no abbastat, custu megu a si narai, po binci is partidas e po ndi cassai is tres puntus; o mellus puru, sa bona sorti si furriat in maba sorti in una pariga de segundus; e su giogu de sa bòcia benit a essi unu maistu de importu mannu po su chi pertocat custa letzioni chi s'apu intregau immoi immoi). 

E duncas, eia, po immoi si potzu contai ca is de su Ceraxius funt stètius bonus a ndi pesai seti gol e a ndi ingolli feti duus (e nc'est chi narat, tra is alleandoris etotu, e duncas, eia, tra is allenadoris chi intendu po ndi pesai is ciaciarradas a su telefunu, e is intervistas, dònnia dònnia cida, chentza de ndi sartai nemmancu una, ca una de is cosas de importu prus mannu, candu tui bolis curri po binci su campionau, benit a essi cussa de circai de no incasciai tropus gol, chi mi cumprendeis po su chi seu circhendi de si narai), a su mancu po su chi pertocat is primus trescentus e sessanta minudus de su campionau de sa stagioni nova. E duncas, eia, is de su Ceraxius funt arrannèscius a partiri cun su pei deretu (cumenti si iat a podi narai, de su restu, chi ndi furaus sa trassa de cumenti si narat in italianu etotu), fadendi su contu, po incumentzai, ca funt arrannèscius a binci, in sa primu bessida, contras a is de su Sant'Aleni de Cuartu, chi tra is atras cosas ndi funt cabaus cust'annu etotu, apustis de s'annu chi ant fatu gioghendi in su campionau de s'Ecellenza (e chi benit a essi a trassa de sa Sèrie A po su chi pertocat totus is campionaus de is diletantis sardus): e duncas, eia, sa primu partida de s'annu po su chi pertocat su campionau s'est serrada, est acabbada cun su resultau, togu meda, de unu a zeru po is meris de domu; e si cumprendit s'importu chi tenint is tres puntus candu nd'arribbant de una bìncida cun feti unu gol de diferèntzia; ca in custas partidas, mi parrit bastanti craru, nci bolit pagu meda po nci fuiai a s'abiga, in mesu segundu, totu su trabballu bonu chi, mancai, nd'as pesau in cussa ora e mesu de giogu (e custa letzioni cratzat beni, deu creu, po su chi pertocat sa vida chi s'agataus tra is manus dònnia dònnia dì: po ndi pesai una cosa, mancai, serbint mesis e mesis de trabballu, chi no annus puru, ma po dda sciusciai abbastat mesu segundu de machimi, o fintzas feti unu mesu sbàlliu). 

E duncas, apustis de essi bintu sa primu partida, po su chi pertocat sa primu bessida de su campionau, is de su Ceraxius funt arrannèscius a binci, puru, in domu de is de s'Atleticu de Masainas, chi funt, invècias, una de cussas scuadras chio ndi funt artziadas in su campionau de sa Promotzioni (e chi benit a essi, duncas, su segundu campionau de importu tra totus cussus chi si giogant in Sardìnnia, e a is pabas feti de su campionau de s'Ecellenza) apustis de essi bintu su campionau de sa Primu Categoria de s'annu passau. 
A sa de tres bessidas, is de su Ceraxius ant giogau torra in domu cosa insoru, e duncas, eia, aranti de is tifosus cosa insoru: e sa partida contras a is de s'Arbus Guspini (eia, is duas scuadras si funt unidas, chi mi cumprendeis po su chi seu circhendi de si narai; est a narai, duncas, ca de duus assòtzius nd'ant pesau feti unu, cun sa bidea in conca ca candu ti ponis impari cun calincunu, intzandus benis a essi prus forti) s'est serrada cun su resultau de duus a unu po is meris de domu, sighius de Prastaro, chi ant fatu a biri a totus cantu ballint (cantu ballint cust'annu, si iat a podi narai diaici puru) contras a una de is scuadras prus togas chi nci funt in su campionau de su duamilla e bintises - duamilla e bintiseti. 
E is cosas (e megu a sighiri a chistionai de is de su Ceraxius) ddis funt andadas beni meda puru in sa partida chi ant giogau custu domìnigu passau, fadendi su contu ca is arrùbius (ddus tzerriaus diaici po su cabori de sa camisedda ca funt costumaus a si ponni in pitzus, mescamente po is partidas chi giogant in domu cosa insoru) funt arrannèscius a binci, cun su resultau, torra, de duus a unu, in domu de is de s'Atleticu de Casteddu. 

E Immoi is de su Ceraxius si dda ant a depi biri contras a is de su Castiadas, chi funt una de is scuadras prus togas, e custu giai de diora, tra totus cussas chi nci funt in sa Lista A de su campionau de sa Promotzioni. 
A su segundu postu, cun dexi puntus (est a narai, duncas, duus puntus in mancu de is chi tenint is de su Ceraxius) agataus is de s'Arborea, cun tres partidas bintas e una partida ca, invècias, ant serrau cun su resultau siddau in paridadi (chi mi permiteis de cuncodrai sa fràsia diaici). 
Cun noi puntus, chi ballint po su de tres postus in sa lista, agataus duas scuadras de Casteddu, a partiri, a incumentzai de is de sa Ferrini (chi fintzas a s'annu passau, e de una pariga de stagionis, curriànt, peròu, in su campionau de s'Ecellenza, cun totu su chi custu pertocat) e is de su Vecchio Borgo Sant'Elia, ca invècias in dì de oi benint a essi una de is scuadras prus togas de totu sa categoria, fadendi su contu ca is piciocus sighius de Miro Murgia funt giai arrannescendi a fai a biri a totus cantu funt fortis, e custu giai de duas-tres stagionis, chi pròpriu depeus narai sa beridadi. 
Is de su Castiadas (chi apu giai arremonau, de su restu), invècias, tenint feti otu puntus in buciaca, apustis de essi bintu duas partidas e apustis, mescamente, de nd'essi serrau atras duas cun su resultau in paridadi; e si cumprendi, is biancus-birdis immoi ant a circai de fai de totu po binci sa partida contras a is primus de sa lista, e su campionau de sa Promotzioni de cust'annu (e megu a chistionai mescamente de sa Lista A, mancai sa chistioni potzat balli, puru, e mi parrit bastanti craru, po su chi pertocat sa Lista B puru) benit a essi togu e spassiosu meda poita no podis sciri ita totu nd'at a bessiri aforas, e custu ballit po dònnia giorronada de giogus. 
Tra is scuadras chi funt fadendi a biri is cosas prus togas, nci funt, custu est pagu ma seguru, is de su Samugheo e is de s'Antiochense: is primus funt giai de una pariga de annus, a fai is contus, ca megant a curri in su campionau de sa Promotzioni, e si iat a podi narai, puru, ca funt arribbaus a cumprendi, e beni puru, cumenti andant is cosas (eia, po su chi tzerriaus, de su restu, esperièntzia); is de s'Antiochense, invècias, ndi funt artziaus cust'annu feti in su campionau de sa Promotzioni, apustis chi ant giogau is partidas finalis (cussas ca seus costumaus a tzerriai play-off, a trassa de cumenti narant is ingresus) po circai de ndi cassai s'artziada de categoria, fadendi su contu ca s'annu passau iant serrau sa stagioni a is pabas de is de s'Atleticu de Masainas; ma cumenti si narat (e cumenti si iat a podi narai, duncas) dònnia stagioni benit a essi una istoria diversa, chi pentzaus (po cumprendi mellus su chi seu circhendi de si narai) ca is de s'Atleticu de Masainas (chi s'annu passau ant bintu su campionau cosa insoru, e duncas, eia, su campionau po su chi pertocat sa Lista B de sa Primu Categoria) in dì de oi s'agatant cun calincuna cosa cumenti a tres puntus, ca funt cuatru in mancu (a fai is contus nci poneus pagu meda) de cussus chi tenint is de s'Antiochense; e duncas, eia, totu su chi as fatu me is annus ainnantis torrat a nudda, benit a balli a trassa de su zeru, e s'ùnica cosa chi contat, po s'apicuai, po s'apicai torra a sa lega, a sa chistioni chi apu pigau a s'incumintzu de cust'artìculu etotu, est su chi arrannèscis a fai dì po dì, sèmpiri chi seu arrannèscendi a si fai a cumprendi su chi seu circhendi de si narai. 

A is ùrtimus postus, invècias, agataus is de s'Uda, impari a is de s'Academia Sulcitana, e pròpriu de custas duas scuadras nd'arribbant is novas prus callentis, ddi naru diaici (sperendi ca is novas callentis si potzant speddiai, mancai sa basca chi est sighendi a fai, e megu a brullai, gei s'at a cumprendi bastanti beni, deu creu a su mancu), fadendi su contu ca custus duus assòtzius ant giai decìdiu de nci bogai is allenadoris chi teniànt a s'incumintzu de sa stagioni. 
E de su restu, si cumprendit beni cumenti andant is cosas: candu no arrannèscis a binci is partidas e, mescamente, candu no arrannèscis a ndi cassai is puntus ca nci funt in su pratu, po una, duas, tres bortas de sighiu, intzandus s'allenadori (diaici andant is cosas, de su restu) est cussu chi depit pagai su contu po totus. E torraus a sa chistioni chi apu pigau a s'incumintzu de custu artìculu etotu, e torraus a sa chistioni chi s'apu arremonau puru immubagora: su chi as fatu, mancai de bonu, in su passau, no ballit nudda; su chi contat est su chi ses bonus a ndi pesai in su presenti, chi arrannèsceis a cumprendi su chi seu circhendi de si contai. 
E duncas, eia, is de s'Uda, intzandus, ant decìdiu, e giai de una pariga de cidas, chi pròpriu si depu narai sa beridadi e chi pròpriu depu essi pretzisu (cumenti unu giornalista iat a depi essi, sèmpiri chi bollit fai beni su trabballu cosa sua), de segai s'acàpiu chi teniànt, giai de s'annu passau, cun Toniu Madau, ca in sa stagioni de su duamilla e binticincu – duamilla e bintises, fiat arrannèsciu a ndi cassai sa sarvesa, ca po una scuadra pitichedda (cumenti iant a podi essi cussa de is de s'Uda) benit a essi giai giai a trassa de una bìncida de unu campionau; ma apustis, cust'annu a is de s'Uda is cosas no ddis funt andadas beni, a su mancu fintzas a immoi, fintzas a oi, fadendi su contu ca me is primus tres bessidas ant sèmpiri pèrdiu, mancai de pagu: sa primu partida de su campionau dda ant giogada in domu cosa insoru, contras a is de su Castiadas (chi eus arremonau giai in custu artìculu etotu), cun su resultau de unu a zeru; e in sa partida avatu puru, chi is de s'Uda ant dèpiu giogai in domu de is de s'Arbus Guspini, ant torra pèrdiu po crupa de unu gol, e duncas, eia,  torra cun su resultau de unu a zeru; e no nc'eis a crei, ca parrit una brulla, ma puru sa de tres partidas dda ant pèrdia, e sèmpiri cun su resultau de unu a zeru, ma candu in sa panchina ddoi fiat giai Raffaeli Picciau, chi est su giogadori chi nd'at pigau su postu de Madau (eia, Piciau immoi at a sighiri a giogai, est a narai a ndi cabai in campu, ma at a trabballai, puru, cun is pannus in pitzus de s'allenadori, chi arrannèsceis a mi sighiri po su chi seu circhendi de si contai); peròu sa giogada, dda tzerriu diaici, chi si funt tentaus is dirigentis de s'assòtziu campidanesu po immoi no at portau is resultaus chi si bisànt, poita sa scuadra in s'ùrtima bessida at pèrdiu sa de cuatru partidas puru, cun su resultau, ma peròu, de tres a unu, in domu de is de su Samugheo. 
E nemmancu a ddu fai aposta (cumenti si iat a podi narai, a trassa de cumenti si narat in italianu), is de s'Uda ant fatu sa primu partida cun Piciau, est a narai, cun s'allenadori nou sètziu in panchina, pròpriu contras a is de s'Atleticu de Casteddu, chi funt sighius, est a narai, ca funt allenaus de Carletu Saba, ca me is annus passaus fiat s'allenadori, pròpriu, de is de s'Uda; e fait a narai, puru, immoi chi nci seus, ca Saba e is de s'Uda no si funt lassaus beni (funt cosas chi sucedint in su mundu de sa bòcia, antzis, funt cosas chi si intendint fatu fatu meda); e duncas, custa est giai sa segunda borta de sighiu (est a narai, sa segunda borta in custus ùrtimus duus annus) ca Saba nd'arribbat a Uda cun is de s'Atleticu de Casteddu e arrannèscit a ndi cassai is tres puntus; e si podeisi immaginai a solus de totu su prexu, e de s'afròddiu, chi nd'at tentu, e si cumprendit beni su motivu, deu creu. 
E intzandus, sa pròpriu chistioni iat a podi balli (e ballit, de su restu) po is de s'Academia Sulcitana, ca s'annu passau fiant arrannèscius a binci su campionau de sa Primu Categoria gràtzias, puru, a su trabballu, bonu meda e de importu mannu, ca fiat arrannèsciu a ndi pesai Andrea Loi, ca peròu, cust'annu, me is primus tres bessidas, no est arrannèsciu a ndi ingolli nemmancu unu puntixeddu, apitzus de is noi (noi in totu, po si cumprendi mellus) ca ddoi fiant in su pratu. E diaici, a su postu de Loi, is dirigentis ant tzerriau a Cristian Dessì. Ma de custa cosa, mancai, nd'eus a sighiri a chistionai mellus in su benbidori. Po oi no potzu fai atru ca si saludai e si imprassai.




Attività realizzata col contributo della Regione Sardegna. IMPRENTAS 2025-2026. LR 22/2018 art. 22